Yayın sonunda müəllimlərin əksəriyyəti sertifikatlaşdırmadan keçəcək – Nazir

“2022–2025-ci illərdə 84 minə yaxın müəllim bu mərhələyə cəlb olunub. Bu prosesdən uğurla keçmiş 49 mindən çox müəllimin əməkhaqqına 10%, 24 mindən çox müəllimin isə əməkhaqqına 35% əlavə tətbiq edilib”.

“Azərbaycan müəllimi” xəbər verir ki, bunu Milli Məclisdə bu gün keçirilən Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında elm və təhsil naziri Emin Əmrullayev deyib.

Onun sözlərinə görə, əməkhaqqına 10% əlavə edilən müəllimlərin sayına uyğun olaraq dövlət büdcəsindən əlavə 58,4 milyon manat vəsait ayrılıb: “Ümumilikdə, sertifikatlaşdırma çərçivəsində əməkhaqqı əlavələri üçün bu məbləğ proqnozlaşdırılıb”.

Nazir vurğulayıb ki, sertifikatlaşdırma prosesi artıq əsas mərhələsini keçib. Gələn ilin yay aylarının sonunda, demək olar ki, bütün fənlər üzrə müəllimlərin əksəriyyəti bu prosesdən keçəcək və nəticələr tətbiq mərhələsinə daxil olacaq. Bununla bağlı ötən görüşlərdə Elm və Təhsil Nazirliyinin məsul şəxsləri də mediaya ətraflı məlumat veriblər.