Ali məktəbə qəbul olanların sayı 10,6 faiz artıb

“Ali təhsildə keyfiyyət naminə say yox, nəticə əsas götürülməlidir”

“Azərbaycan müəllimi” xəbər verir ki, bunu elm və təhsil naziri Emin Əmrullayev Milli Məclisdə Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında çıxışı zamanı deyib.

Nazir bildirib ki, 2025–2026-cı tədris ili üçün ali təhsil müəssisələrinə qəbul planı 10,6 faiz artımla müəyyən olunub. Onun sözlərinə görə, son illərdə qəbul göstəricilərində ciddi dinamika müşahidə olunur:

“2025–2026-cı tədris ili üçün ali təhsil müəssisələrinə qəbul olunanların sayı ötən illə müqayisədə 10,6 faiz artıb. Əgər 2005-ci illə müqayisə etsək, bu göstərici 2,3 dəfə, 2017-ci illə müqayisədə isə təxminən 1,5 dəfə yüksəlib. Bu, ölkədə ali təhsilə marağın artdığını və təhsil imkanlarının genişləndiyini göstərir”.

Nazir qeyd edib ki, “SABAH” proqramı ali təhsildə keyfiyyətin artırılması baxımından uğurlu model kimi özünü doğruldub:
“Növbəti il üçün bu proqramlara 412 milyon manat vəsaitin ayrılması nəzərdə tutulur. Bu da 135 min nəfərin təhsil xərclərinin dövlət tərəfindən qarşılanması deməkdir. Bu proqram vasitəsilə biz həm təhsildə ədalət prinsipini qoruyuruq, həm də istedadlı gənclərin daha keyfiyyətli təhsil almasına şərait yaradırıq”.

Emin Əmrullayev bildirib ki, bu yanaşma ali təhsil müəssisələri üçün də yeni imkanlar açır:
“Məsələn, ADA Universitetində “SABAH” proqramı vasitəsilə tələbələrin ödənişləri dövlət tərəfindən qarşılanır. Bu həm universitetin maliyyə sabitliyini təmin edir, həm də daha çox tələbəyə keyfiyyətli təhsil almaq imkanı yaradır. Faktiki olaraq, tələbə təhsil haqqı ödəmədən yüksək səviyyəli proqramlarda oxuya bilir”.