İlk dəfə beyin və süni intellekt arasında dialoq yaradılıb

İlk dəfə beyin və süni intellekt arasında dialoq yaradılıb

Dünyada ilk dəfə beyin neyron interfeys vasitəsilə süni intellektlə dialoq yaradıb.

“Azərbaycan müəllimi” xəbər verir ki, Çinin beyin-kompüter interfeysləri (BCI) üzrə ixtisaslaşan “NeuroXess” startapı klinik sınaqların iki mühüm mərhələsini başa vurub. Bu barədə “Sinxua” xəbər portalı məlumat yayıb.

Təcrübələr zamanı pasiyentlərdən biri robot qolunu idarə etmək üçün beyin-kompüter interfeysindən istifadə edib. Digər pasiyentdə isə kompüter xəstənin Çin dilində olan nitqini müvəffəqiyyətlə deşifr edə bilib.

2024-cü ilin avqustunda Fudan Universitetinin Huashan Xəstəxanasının neyrocərrahları beynin motor nahiyəsində lezyonu olan 21 yaşlı epilepsiya xəstəsinə 256 kanallı yüksək performanslı BCI implantasiya ediblər. 

Xəstə əməliyyatdan 48 saat sonra heç bir fiziki hərəkət etmədən düşüncə gücü ilə stolüstü tennis və “ilan” oyunu oynayıb. İkihəftəlik təlimdən sonra o, “WeChat” və “Taobao” kimi məşhur smartfon proqramlarını idarə edə bilib, həmçinin “XessOS” neyrokompüter əməliyyat sistemindən istifadə edərək ağıllı ev sistemini və əlil arabasını idarə edə bilib ki, bu da onun gündəlik həyatda imkanlarını xeyli genişləndirib. 

Çin 2024-cü ilin dekabrında nitq sintezi üçün yüksək performanslı və çevik beyin-kompüter interfeyslərinin ilk klinik sınaqlarını keçirib. Dil insanın ən mürəkkəb koqnitiv funksiyasıdır. Xüsusilə monohecalı, tonal və loqoqrafik olan Çin dili digər dillərdən fərqli olaraq, emal etmək üçün beynin daha çox sahəsini istifadə edir. 

Bu vəziyyətdə epilepsiya və beynin danışma nahiyəsində şişi olan xəstəyə də 256 kanallı BCI implantasiya edilib. Beş gün ərzində o sağalıb və 100 ms gecikmə ilə ümumi 142 Çin hecasını deşifr etməkdə 71% dəqiqliyə nail olub.

“NeuroXess”in qurucusu Hu Taonun sözlərinə görə, şirkət təcrübə zamanı nisbətən daha az travmatik üsullardan istifadə edir.