Məktəb sənədləri rəqəmsallaşdırılır

Məktəb sənədləri rəqəmsallaşdırılır

Ümumi təhsil müəssisələrində tədris-pedaqoji sənədləşdirmə işlərinin aparılması Elm və Təhsil Nazirliyinin 2022-ci il 13 iyul tarixli F-438 nömrəli əmri ilə təsdiq edilmiş “Ümumi təhsil müəssisəsinə aid tədris-pedaqoji sənədlərin aparılması və saxlanılması haqqında Təlimat”a əsasən tənzimlənir. Lakin tədris-pedaqoji sənədlərin çoxluğu və onların kağız formasında olması təhsil işçilərinin məktəbdə fəaliyyəti üçün müəyyən narahatlıqlar yaradır. Bu, eyni zamanda, onlar üçün vaxt itkisinə də səbəb olur. 

“Azərbaycan müəllimi” bu fikirləri nəzərə alaraq nazirliyə sorğu ünvanlayıb.

Elm və Təhsil Nazirliyindən mövzu ilə bağlı “Azərbaycan müəllimi”nin sorğusuna cavab olaraq bildirilib ki, tədris-pedaqoji sənədlərin hər biri ümumi təhsil müəssisəsində müxtəlif fəaliyyətlərlə bağlı məlumatların toplanılması, uçotunun aparılması üçün zəruridir. Bu zərurət formal təhsilin sonunda dövlət təhsil sənədinin verilməsi ilə bağlıdır.

Qeyd edilib ki, hazırda həmin sənədlərin optimallaşdırılması deyil, operativliyin təmin olunması məqsədilə rəqəmsallaşdırılması istiqamətində tədbirlər görülür.