Sentyabrda Zərdabda yeni məktəb istifadəyə veriləcək

Elm və Təhsil Nazirliyinin sifarişi ilə Zərdab rayonunun Dəli Quşçu kəndində inşa olunan məktəb binası bu ilin sentyabr ayında istifadəyə veriləcək. 

Mərkəzi Aran Regional Təhsil İdarəsindən “Azərbaycan müəllimi”nə verilən məlumata əsasən, Mikayıl Müşfiq adına Dəli Quşçu kənd tam orta ümumtəhsil məktəbinin köhnə binası sökülərək yerində 264 şagird yerlik yeni bina inşa edilir. İkimərtəbəli binada müasir standartlara uyğun sinif otaqlarının, 180 yerlik akt zalının olması və digər zəruri infrastrukturun qurulması nəzərdə tutulur.

Tikinti işlərinə 2023-cü il dekabrın 26-dan başlanılıb. Bu layihənin həyata keçirilməsi şagirdlərin daha müasir mühitdə təhsil almasına imkan verəcək.

Qeyd edək ki, Mərkəzi Aran Regional Təhsil İdarəsinin tabeliyində fəaliyyət göstərən ümumtəhsil müəssisələrinin maddi-texniki bazasının gücləndirilməsi, müasir avadanlıqlarla təmin edilməsi, yeni məktəb binalarının inşası və mövcud binaların əsaslı təmiri idarənin prioritet istiqamətlərindən biridir. Bununla yanaşı, Zərdab rayonunda tikinti-quruculuq və təmir işləri də davam etdirilir.