BSU-nun Strateji inkişaf plan və hədəfləri müzakirə edilib

Fevralın 1-də Bakı Slavyan Universitetinin (BSU) 2024-2025-ci illər üzrə fəaliyyət planına uyğun olaraq Strateji inkişaf planı (SİP) və 2025-ci il üçün strateji hədəflərinin müzakirəsi təşkil edilib.

Bu barədə universitetdən “Azərbaycan müəllimi”nə məlumat verilib. Bildirilib ki, fakültə əməkdaşları və tələbə nümayəndələrinin iştirak etdiyi tədbirdə BSU-nun rektoru Anar Nağıyev təqdimatla çıxış edərək 2025-ci il üçün müəyyənləşdirilmiş fəaliyyət planının istiqamətlərini təqdim edib.

Rektor təqdimatında səriştə əsaslı təhsil proqramlarından, məzmun və tədqiqat, ömürboyu öyrənmə və fasiləsiz təhsil imkanlarından danışaraq rəqəmsal transformasiya istiqamətində görülmüş işləri qeyd edib. Anar Nağıyev təhsilin beynəlmiləlləşdirilməsi, elm və tədqiqat istiqamətində planlaşdırılma, tədris və öyrənmə prosesinin BSU-nun elmi ehtiyaclarının əsasında təşkil ediləcəyini, onun beynəlmiləlliyi kontekstində inkişafı və birgə beynəlxalq tədqiqatların həyata keçirilməsini qeyd edərək universitetin keyfiyyət təminatı və resursların inkişafından danışıb. Rektor əmək bazarı ilə əlaqəliliyin artırılmasını vurğulayaraq universitetin SİP-in müəyyən etdiyi orta və uzunmüddətli inkişaf hədəflərinə nail olmaq üçün 2025-ci il üzrə fəaliyyət planının əsas addımlarını qeyd edib.

Yüksək Təhsil Mərkəzinin direktoru Ülviyyə Məmmədova təqdimatla çıxış edərək elmi-tədqiqatlardan və innovasiya potensialının artırılması istiqamətində danışaraq bu məqsədlə yaxın gələcəkdə müvafiq infosessiyanın təşkil ediləcəyini bildirib. 
Ü.Məmmədova SİP-də nəzərdə tutulan 2025-ci il üçün fəaliyyət planından danışaraq həmkarların suallarını cavablandırıb.

Tədbirdə BSU-nun Maliyyə və təsərrüfat işləri üzrə prorektoru Elçin Hüseynov təhsilin maliyyəşməsi və keyfiyyətin təminatı, diferensial əməkhaqqı sistemindən, infastrukturun müasirləşdirilməsi və resursların inkişafından danışıb.

SİP-nin əsas istiqamətlərini təşkil edən tədbirdə geniş və məhsuldar müzakirələr aparılaraq bir çox maraqlı təklif və qeydlər toplanıb.

Daha sonra universitet əməkdaşları arasında komanda ruhunun və işinin gücləndirilməsi çərçivəsində keçirilən tədbir (teambuilding) fakültə əməkdaşları və tələbə nümayəndələrinin iştirakı ilə “Fibonacchi” intellektual oyununun keçirilməsi ilə yekunlaşdı.