Göy qutabı necə hazırlandı? - “Açıq dərs”də

Onlar bir qutab bişirdilər ki, el tamaşasına durdu. Söhbət Bərdə Dövlət Peşə Təhsil Mərkəzində “Aşpaz” ixtisası üzrə təhsil alan III kurs tələbələri ilə “Göy qutabının hazırlanması” mövzusunda keçirilən “Açıq dərs”dən gedir. Tələbələr böyük coşqu, fərəh hissi ilə öz səriştələrini nümayiş etdirib qrup işləri təqdim etdilər. Gördükləri işdən çox məmnun görünürdülər. Ancaq üzlərində sevincə qarışmış həyəcan işartılarını da sezməmək mümkün deyildi. Tamaşaçısı çox olan bu dərsin ortaya çıxartdığı göy qutabının dadı gərək damaqlarda qala, axı.

“Yeni dadlar yaratmaq üçün bu yolu seçdim”

“Açıq dərs”in iştirakçılarından biri uşaqlıqdan bəri yeni dad axtarışında olan İlkin İbrahimovdur. Aşpazlıq onun üçün rəsm çəkmək kimidir: “Bu işi sevməyən biri heç vaxt davam etdirə bilməz. Yeni dadlar yaratmaq üçün bu yolu seçdim. Ən böyük məqsədim ölkəmizin ləzzətlərini dünyaya tanıtmaq, adımı ən yaxşı şeflərin siyahısına yazdırmaqdır”. 

“Açıq dərs” İlkini həyəcanlandırsa da, özünü sındırmır: “Belə dərslər, sadəcə ixtisas sahəmiz üzrə deyil, həyatda vacib olan bir çox başqa bacarıq və xüsusiyyətlərimizin inkişafına da təsir edir. Məsələn, özgüvənli olmağı, daxili nizam-intizamı idarə etməyi, daha məsuliyyətli olmağı öyrədir, bacarıqlarımızı nümayiş etdirməyə şərait yaradır. Sözsüz ki, tamaşaçı – müəllimlərimizin, valideynlərimizin, tələbə yoldaşlarımızın qarşısında öz bacarığımızı nümayiş etdirməyimiz sosial həyatımıza təsirsiz ötüşmür. Tanıdıqlarımız, bizi tanıyanlar artır”.

İlkinur Əsgərzadənin də aşpazlığa uşaqlığından həvəsi var. Peşə təhsili ilə bu həvəsini peşəkarlığa çevirir: “Təhsil aldığımız 3 il ərzində çoxlu yeməklər bişirmişik. Dərs prosesində etdiklərimiz bizi bu qədər həyəcanlandırmır. Amma dost-tanışlarımızın, müəllimlərimizin, mərkəzimizin rəhbər şəxslərinin, hətta valideynlərimizin toplaşdığı bir dərs həm həyəcanverici, həm maraqlı, həm də əyləncəli olur. Bu, peşə bacarıqlarımızın formalaşmasına olduğu kimi həyatımıza da öz təsirini göstərir. Burada qarşımıza qoyulan tələblərdən biri də tapşırığı komanda şəklində icra etməkdir. Bunu bacarmaqla biz gələcəkdə də iş yerimizdə də uğur qazanacağımızı sübut edəcəyik”.
İlkinur deyir ki, tamaşaçılar qarşısında yemək hazırlamaq, sonra hazırladığı işə insanların münasibətini görmək, əməyi olduğu bir yeməyi dadanların bəyənməsi onun üçün hər zaman maraqlı olub: “Aşpazlıq peşəsi, sadəcə, yemək hazırlamaqla məhdudlaşmır. Bu peşədə uğur qazanmaq üçün təqdimatın da önəmini dərk edirəm. Bu gün bu həyəcanı yaşadım. Dadlı olduğu qədər həm də gözoxşayan əl işimizi təqdim edərkən gözlərdəki marağı izləmək, verilən reaksiyanı görmək çox xoşuma gəldi”.

Bu, elə bir layihədir ki

Bərdə Dövlət Peşə Təhsil Mərkəzində “Aşpaz” ixtisası üzrə fənn müəllimi kimi fəaliyyət göstərən Nərgiz Əbdülova deyir ki, belə dərslərin keçirilməsində məqsəd tələbələri sosial fəaliyyətə hazırlamaq, bilik və bacarıqlarını tam sərbəst şəkildə nümayiş etdirməyə imkan yaratmaqdır. Həm nəzəri, həm də praktik formada keçirilən açıq dərslər tələbələrə müsbət təsir göstərir, bilik-bacarıqlarının və səriştələrinin nümayiş etdirilməsində mühüm rol oynayır: “Açıq dərsi “Aşpaz” ixtisasında təhsil alan III kurs tələbələrilə təşkil etmişik. Tələbələrimiz bu formada tədbirlərdə bacarıq və səriştələrini möhkəmləndirir, sosial əməkdaşlıqları, əlaqələrin qurulması, özünü ifadə etmə, ünsiyyət bacarıqlarını formalaşdırır. Bundan əlavə, bu,  elə bir layihədir ki, burada xidmət sahəsi üzrə hər bir tələbəyə ayrıca vəzifə veririk. Məsələn, tələbələri aşpaz, aşpaz köməkçisi, ofisiant, kassir və s. kimi vəzifələrə bölərək təlimatlar verdim və bu öhdəliklərini necə yerinə yetirə biləcəklərini yoxladım. Tələbələrimiz hər birinə verilən vəzifəni layiqincə yerinə yetirdilər”.

O bildirib ki, təhsil mərkəzində tədris ilinin əvvəlində dərs cədvəli əsasında rəhbərlik tərəfindən açıq dərslərin qrafiki tutulur və ona uyğun açıq dərslər təşkil edilir: “Bu, keçirilən ilk açıq dərsimiz deyil. Yaxın günlərdə "Aşpaz gecəsi" adı altında tədbirimiz baş tutacaq. Bunun üçün hazırlıqlarımız davam edir. Bundan əlavə, "Master klass" adlı daha bir layihə hazırlamağı düşünürük. Hər zaman milli bəşəri dəyərlərimizi tələbələrimizə aşılamaq, bu yöndə daim açıq dərslər, tədbirlər təşkil etməyi diqqətdə saxlamışıq. Mart ayında keçirəcəyimiz açıq dərsdə düşünürük ki, milli xörək və şirniyyatları hazırlayaq. Təbii ki, bunun hazırlanma texnologiyasını da canlı nümayiş etdirək”.