“Yaradıcı yanaşma və qətiyyət uğurun açarıdır” - Peşə məzunları ilə söhbət

“Yaradıcı yanaşma və qətiyyət uğurun açarıdır” - Peşə məzunları ilə söhbət

Məlumdur ki, peşə təhsili iqtisadiyyatın inkişafı və əmək bazarının tələblərinə uyğun ixtisaslı kadrların hazırlanması baxımından vacib bir sahədir. Hazırda peşə təhsili iş qüvvəsinin hazırlanmasından tutmuş sosial inklüzivliyə qədər bir çox sahədə mühüm rol oynayır.
  
Bu yazıda peşə təhsilinin cəmiyyətə və fərdlərə gətirdiyi faydaları, əhəmiyyətini bir daha vurğulamağa çalışdıq.  
Müsahiblərimizlə İsmayıllı Dövlət Peşə Təhsili Mərkəzində tanış oluruq. İlk növbədə, geyim dizaynının incəliklərinə nüfuz etmək və bu sənətin arxasındakı yaradıcı zəkanı anlamaq üçün gənc dizayner Aysel Əlixanova ilə həmsöhbət olduq. Onun dünyasına səyahət edərək, moda sənayesindəki təcrübələrini, yaratdığı unikallığı və gələcək planlarını müzakirə etdik.  

Aysel Əlixanova 1998-ci ildə Qəbələ rayonunda anadan olub. Onun bu sahəyə marağı uşaqlıq illərindən başlayıb. İlk olaraq Bakıda modelyer dizayner kurs təhsili alıb. 2022-ci ildə İsmayıllı Dövlət Peşə Təhsili Mərkəzinin “Geyim üzrə dizayner” ixtisasına qəbul olub, 2024-cü ildə isə oranı bitirib. Hazırda bu sahədə fəaliyyət göstərir. 

Peşə təhsili aldığı 2 il ərzində yalnız öz ixtisası ilə kifayətlənməyib, bir çox yeni sahələr üzrə təlimlərdə də iştirak edib. Həmçinin IT sahəsi üzrə birillik dövlət təqaüdü qazanıb və müxtəlif layihələrdə iştirak edərək satış və biznes sahəsində yeni məlumatlar əldə edib.

Aysel bizimlə söhbətində qeyd edir ki, ilkin olaraq dizayn edəcəyi məhsulu təxəyyülündə canlandırır, sonra isə geyimin eskizini hazırlayıb, cizgilərini çəkir, daha sonra parça üzərində işə başlayır. Hazırda əsasən tikiş sahəsində fəaliyyət göstərsə də, digər sahələrə də marağı və bacarığı var. 

Əl işlərinə olan böyük marağı və bacarığı vasitəsilə gələcəkdə hazırlayacağı geyim kolleksiyalarına çox fərqlilik qatacağına inanan Aysel hər zaman yeniliklərə açıqdır, sosial şəbəkələr üzərindən bir çox kolleksiyaları və geyim mütəxəssislərinin işlərini  yaxından izləyir.

Aysel həm də Mərkəzdə yaradılmış “Tələbə Parlamenti”nin sədri seçilib, təcrübə qazandıqca vaxtından daha səmərəli istifadə etməyi öyrənib. “Tələbə Parlamenti”nin sədri olduğu müddətdə bir çox sosial fəaliyyətlər təşkil edib və bu təcrübə ona idarəetmə bacarıqlarını inkişaf etdirməkdə kömək edib. Təhsilini başa vurduqdan sonra Aysel dərziliyə aid avadanlıqlar alaraq kiçik bir müəssisə açıb, təhsil zamanı öyrəndiklərini artıq öz praktik işində uğurla tətbiq etməkdədir.

Digər bir müsahibimiz İsmayıllı Dövlət Peşə Təhsili Mərkəzinin həm məzunu, həmçinin əməkdaşı, eyni zamanda özünü kifayət qədər inkişaf etdirmiş sahibkar Valeh Əliyevdir. Onun rəhbərlik etdiyi şirkətin uğurlu layihələri və yaradıcı yanaşmalarına dair maraqlı fikirlərini dinlədik. Müsahibəmiz reklam dünyasındakı yeniliklərdən, dizaynın gücündən və gələcək perspektivlərdən bəhs edir. 

V.Əliyev İsmayıllı Dövlət Peşə Təhsil Mərkəzində “Qrafik dizayn” ixtisası üzrə birillik təhsil alıb. Bu peşəni seçməsinin səbəbinə gəlincə, qeyd edir ki, 2010-cu ildə məktəbi bitirdikdən sonra "Reklamena" adlı reklam şirkətinin təsisçilərindən biri olaraq reklam sahəsinə daxil olub. Hazırda həmin şirkət Azərbaycanın ən böyük reklam şirkətləri arasında ilk 10-luqda yer alır. 2013-cü ildə bu sahə üzrə təhsil almaq ona həm diplom əldə etməyə, həm də bilik və bacarıqlarını daha da təkmilləşdirməyə kömək edib. 

Valeh Əliyev faktiki olaraq İsmayıllı Dövlət Peşə Təhsil Mərkəzinin istehsalat təlim ustası olaraq çalışır. Təhsil müddətində əsasən dizayn proqramları ilə maraqlanıb, çünki bu, onun iş sahəsi üçün vacib idi. O, xüsusilə “Photoshop”, “İllustrator” və “CorelDRAW” proqramlarında biliklərini möhkəmləndirib. “İsmayıllı Dövlət Peşə Təhsil Mərkəzinin kadr hazırlığında öndə olması və imkanlarının yüksək olduğuna, gələcəyim üçün önəmli faktor olacağına görə bu müəssisəni seçdim. Tətbiqi proqramlar və əməliyyat sistemlərinin incəliklərini öyrəndim, bunlar məndə təşkilatçılıq, özünü inkişafetdirmə kimi bacarıqlar formalaşdırdı”, - deyən Valeh ilk dizayn işlərinin və layihələrinin tam peşəkar olmadığını etiraf edərək, onları beş ballıq sistemlə üç balla qiymətləndirildiyini qeyd edir. 

O, həmtəsisçisi olduğu "Reklamena" şirkətinin hazırda bütün Azərbaycanı əhatə etdiyini, bu sahədə uğurlu olmaq üçün daim çalışdığını  vurğulayıb. Valeh Əliyev gənc dizaynerlərə tövsiyə edərək bildirib ki, mütləq şəkildə “Photoshop”,”İllustrator”, “CorelDRAW” kimi müxtəlif dizayn proqramlarını bilməli, daim yeni dizaynlar üzərində işləməli və axtarışda olaraq bilik və bacarıqlarını möhkəmləndirməlidirlər. 

Valeh Əliyev qeyri-hökumət təşkilatı olan İsmayıllı İnnovasiyalar Mərkəzinin sədri, daha sonra “İstech” İsmayıllı Texnologiyalar MMC-də baş menecer vəzifəsində çalışıb. İş təcrübəsi və idarəçilik bacarıqları ilə müxtəlif təşkilatlarda mühüm vəzifələr icra edib. Eyni zamanda, gənclər təşkilatlarında təlimçi kimi fəaliyyət göstərir. 

İsmayıllı Dövlət Peşə Təhsili Mərkəzinin məzunları ilə söhbətimiz qrafik dizayn və reklam dünyasında fərqlənmək üçün tələb olunan yaradıcı düşüncənin və strateji yanaşmanın vacibliyini bir daha təsdiqlədi. Bir daha əmin olduq ki, yaradıcı yanaşmalar və qətiyyətli addımlar, hər sahədə uğur qazanmanın açarıdır. Həmsöhbətlərimizin paylaşdığı təcrübələr, yalnız dizayn deyil, həyatın hər sahəsində daha yaxşı işlər görmək üçün bizə motivasiya verdi.