Nazir: Sinifdə bir şagird oxuyursa, ona təxminən 60 min manat vəsait xərclənir

“2-4 nəfər şagirdi olan məktəbləri ən yaxın məsafədə olan məktəblərlə birləşdiririk. Bu, keyfiyyətin artmasına, maliyyə səmərəliliyinə gətirib çıxarır. Bu uşaqların avtobusla digər məktəblərə daşınması daha səmərəlidir”. 

“Azərbaycan müəllimi” xəbər verir ki, bu barədə elm və təhsil naziri Emin Əmrullayev bu gün keçirdiyi brifinqdə məlumat verib.

O bildirib ki, şagird sayı az olan məktəblər, əsasən, keyfiyyəti aşağı olan məktəblərdir. Şagird sayı nə qədər azdırsa, ona çəkilən xərc bir o qədər çox olur:

"Bir sinfə çəkilən xərc ortalama 20-25 min manatdır. Lakin bir sinifdə təhsil almalı olan 20-25 uşaq fərqli siniflərdə oxuyanda xərc daha çox olur. Məsələn, hesablamışdıq ki, əgər sinifdə bir uşaq oxuyursa, xərc 60 min manat təşkil edir. Təxminən 270 məktəb rasionallaşdırılacaq. Mətbuatda yayımlanan 1500-2000 rəqəmi həqiqəti əks etdirmir. Düzdür, şagird sayı 100-dən az olan 1500-2000 məktəbimiz var. Amma həmin məktəblərdən bəziləri rasionallaşdırılacaq. Bütün bu məktəblərin rasionallaşdırılacağı ilə bağlı məlumat nə mənim, nə də nazirlik tərəfindən səsləndirilməyib”.