Axtaçı kənd məktəbi ilə bağlı rəsmi açıqlama verilib

Axtaçı kənd məktəbi ilə bağlı rəsmi açıqlama verilib

Mil-Muğan Regional Təhsil İdarəsinin əməkdaşları qəzalı vəziyyətdə olduğu bildirilən Sabirabad rayonu Axtaçı kənd ümumi orta məktəbinə baxış keçiriblər.

İdarədən “Azərbaycan müəllimi”nə verilən məlumata görə, sözügedən təhsil müəssisəsinin təmiri üçün aidiyyəti üzrə müraciət edilib: “Məktəblərin təmiri və tikintisi növbəlilik və prioritetlik prinsipi əsasında həyata keçirilir. İdarənin tabeliyində fəaliyyət göstərən ümumi təhsil müəssisələrinin maddi-texniki bazasının gücləndirilməsi, müasir avadanlıqlarla təmin olunması, yeni binaların inşası və mövcud binaların əsaslı təmiri olunması əsas prioritetlərimizdir”.

Məlumatda qeyd edilib ki, son iki il ərzində Mil-Muğan Regional Təhsil İdarəsinin tabeliyində fəaliyyət göstərən 5 məktəb əsaslı təmir edilib, 53 məktəbdə cari təmir işləri aparılıb.  Bununla yanaşı,  8 yeni məktəb tikilərək istifadəyə verilib, 2 təhsil müəssisəsində isə tikinti işləri davam edir. 

Qeyd edək ki, bəzi saytlar Sabirabad rayonu Axtaçı kənd ümumi orta məktəbinin qəzalı vəziyyətdə olması ilə bağlı məlumatlar yayıb.