Corc Vaşinqton Universitetinin professoru ADNSU-da seminar keçib

Corc Vaşinqton Universitetinin professoru ADNSU-da seminar keçib

Fevralın 18-də Azərbaycan Dövlət Neft və Sənaye Universitetində (ADNSU) ADA Universitetinin təşəbbüsü ilə Corc Vaşinqton Universitetinin professoru, IEEE (Institute of Electrical and Electronics Engineers) üzvü və yüksək performanslı hesablama sahəsində tanınmış mütəxəssis Dr. Tarek El-Ghazawi ilə görüş keçirilib.

Universitetdən “Azərbaycan müəllimi”nə bildirilib ki, görüşdə açılış nitqi ilə çıxış edən ADNSU-nun Beynəlxalq Əlaqələr üzrə prorektor müavini, dosent Ülviyyə Abbasova belə beynəlxalq akademik əməkdaşlıqların universitetin inkişafı və tələbələrin qlobal biliklərə çıxışı baxımından böyük əhəmiyyət daşıdığını vurğulayıb.

Dr. El-Ghazawi seminar çərçivəsində "Kompüter Texnologiyaları və Mühəndisliyin Gələcəyi: HPC-dən AI Hardware-ə" mövzusunda təqdimatla çıxış edərək yüksək performanslı hesablama, süni intellekt texnologiyaları və yeni nəsil mühəndislik həlləri haqqında ən son yenilikləri bölüşüb.

Seminarda İT və İdarəetmə fakültəsi, həmçinin Energetika fakültəsinin tələbələri və akademik heyəti iştirak edib. Tələbələr üçün yeni texnologiyalar sahəsində beynəlxalq təcrübəyə əsaslanan dəyərli məlumatlar təqdim olunub.