Göygöldə "PeşədəSən" adlı forum keçirilib

Göygöldə "PeşədəSən" adlı forum keçirilib

Göygöl Rayon İcra Hakimiyyətinin dəstəyi, Göygöl Peşə Məktəbi və Göygöl Gənclər Evinin birgə təşkilatçılığı ilə "PeşədəSən" adlı forum baş tutub. 

"Azərbaycan müəllimi" xəbər verir ki, tədbir çərçivəsində Göygöl Peşə Məktəbinin və Göygöl Gənclər Evinin təqdimat videoçarxları nümayiş etdirilib. Panel müzakirəsində yerli icra hakimiyyəti, məşğulluq xidməti, peşə təhsili və gənclər mərkəzinin nümayəndələri çıxış ediblər.

Çıxış edən Göygöl Rayon İcra Hakimiyyəti başçısının müavini, İctimai-siyasi və humanitar məsələlər şöbəsinin müdiri Kəmalə İbrahimova yoxsulluğun azaldılması istiqamətində yeni iş yerlərinin yaradılması, bu sahədə dövlət siyasəti, məşğulluğun təmin edilməsi, inklüziv və iqtisadi artım, eləcə də kənd təsərrüfatının inkişafı və yeni xarici investorların cəlb edilməsi imkanları barədə ətraflı məruzə ilə çıxış edib. 

Daha sonra Gəncə-Daşkəsən Regional Məşğulluq filialının Təhlil və tərəfdaşlarla iş şöbəsinin müdiri Pərviz Əliyev Dövlət Məşğulluq Agentliyinin işsiz və işaxtaran şəxslərin məşğulluğu istiqamətində həyata keçirilən islahatlar və fəaliyyət istiqamətləri barədə məlumat verib.

Göygöl Peşə Məktəbinin direktoru Kəmalə Nəhmədova çıxış edərək müasir dövrün trend peşələri, peşə hazırlığında tətbiq olunan yeniliklər, mübadilə proqramları, eləcə də kadr hazırlığında istifadə olunan metodiki vəsaitlər haqqında məlumatları diqqətə çatdırıb.

Daha sonra natiqlər tələbə-gənclərin suallarını cavablandırıblar. Tədbirin rəsmi hissəsi bədii proqram və xatirə şəkli çəkilməsi ilə yekunlaşıb. Daha sonra iştirakçılar təlimlər üçün qruplara bölünərək sessiyalara qatılıblar.