Emin Əmrullayev: Ali təhsilli valideynlərin övladlarının nəticələri daha yüksək olur

Emin Əmrullayev: Ali təhsilli valideynlərin övladlarının nəticələri daha yüksək olur

“Beynəlxalq təhsil tədqiqatları göstərir ki, ali təhsil almış və ya orta təhsildən sonra təhsilini davam etdirmiş valideynlərin övladlarının nəticələri daha yüksək olur”. 

“Azərbaycan müəllimi” xəbər verir ki, bunu elm və təhsil naziri Emin Əmrullayev bu gün Bakı Dövlət Universitetində “Konstitusiya və Suverenlik ili” çərçivəsində təşkil edilən “Qızların təhsil hüququ” mövzusunda konfransda deyib.

Nazir bildirib ki, PİSA (Beynəlxalq Şagird Qiymətləndirmə Proqramı) nəticələri də bunu təsdiqləyir: 

“Yəni təhsilli ailələrdə böyüyən uşaqların akademik uğurları daha yüksəkdir. Bu, təhsilin uzunmüddətli təsirini göstərən vacib faktordur. Təhsilə daha çox qız cəlb olunarsa, dünyada təxminən 3 milyona yaxın insan yoxsulluqdan qurtula bilər, lakin bu rəqəmlərin arxasındakı real təsirləri dəyərləndirmək vacibdir. Əsas məsələ təhsilin inkişafı və texnologiyaların insanlara necə təsir etməsidir. Bu proses uzun illər tələb edir və hər sahədə fərqli nəticələr doğura bilər”.