MEK-in direktor müavini gənc alim və müəllimlər üçün təlim keçib

MEK-in direktor müavini gənc alim və müəllimlər üçün təlim keçib

Bakı Avrasiya Universitetinin Elm, innovasiya və doktorantura sektorunun təşkilatçılığı ilə gənc alimlərin tədqiqat fəaliyyətinin məhsuldarlığını artırmaq, tənqidi düşüncə və effektiv ünsiyyət bacarıqlarını inkişaf etdirmək, eləcə də əməkdaşlıq mədəniyyətini gücləndirmək üçün iştirakçıları praktiki alətlər, strategiyalar və biliklərlə təmin etmək məqsədilə “Gənc alimlərin və müəllim heyətinin elmi-tədqiqat fəaliyyətinin təkmilləşdirilməsi” mövzusunda vebinar keçirilib.

Vebinar çərçivəsində AMEA-nın Mərkəzi Elmi Kitabxanasının kitabxana xidməti üzrə direktor müavini filologiya üzrə fəlsəfə doktoru, dosent Şəhla Quliyeva çıxış edib. O, “Kitabxanalarda inkişaf etmiş axtarış üsulları və istifadəçi yönümlü xidmətlər (AMEA Mərkəzi Elmi Kitabxanasının nümunəsində)” adlı təqdimatla çıxış edərək iştirakçıları 100 illik zəngin tarixə malik kitabxananın oxuculara xidmət imkanları ilə tanış edib.

Qeyd olunub ki, bu gün Mərkəzi Elmi Kitabxananın yeniləşən fəaliyyətinin ana xəttini dünyada baş verən kitabxana-informasiya prosesləri kontekstində oxuculara xidmət sisteminin müasir modelinin hazırlanıb həyata keçirilməsi, həmçinin oxucu məmnunluğunun təmin olunması təşkil edir.  

Təqdimat zamanı Ş.Quliyeva kitabxanada tətbiq olunan müasir axtarış sistemləri, kitabxana modeli, elektron kitabxana quruculuğu, yenilənmiş rəsmi veb-saytın istifadəyə verilməsi, korporativ kitabxana quruculuğu, İnklüziv kitabxana layihəsi və digər təşəbbüslər barədə ətraflı məlumat təqdim edib.