“Əmək münasibətlərində təhsil və yaradıcılıq məzuniyyəti hüququnun yaranması prosesi necə tənzimlənir” – ELCAN QULUYEV

“Əmək münasibətlərində təhsil və yaradıcılıq məzuniyyəti hüququnun yaranması prosesi necə tənzimlənir” – ELCAN QULUYEV

Ümumiyyətlə, AR Əmək məcəlləsinə əsasən, hər bir işçinin məzuniyyət hüquqları var və bu hüquqları məhdudlaşdırmaq qanun pozuntusu hesab edilir.

Məzuniyyətin bir çox növləri vardır:

1. Əmək məzuniyyəti
2. Sosial məzuniyyət
3. Təhsil və yaradıcılıq məzuniyyəti
4. Ödənişsiz məzuniyyət

Təhsil məzuniyyəti bir qayda olaraq qiyabi təhsil alan tələbələr üçün nəzərdə tutulub.

Belə ki, qanuna əsasən, ali təhsil müəssisəsinin 1 və 2-ci kurslarında qiyabi təhsil alan şəxslər üçün 30 təqvim günü, qalan kurslarda isə 40 təqvim günü olaraq hesablanır (iş ili ərzində)

Yaradıcılıq məzuniyyəti isə işçinin doktorantura təhsili zamanı elmi işlərinin müdafiəsi, dissertasiya işlərinin müdafiəsi üçün verilir.

Müddətləri nəzərdən keçirək:

Fəlsəfə doktoru elmi dərəcəsi almaq, dissertasiya işini tamamlamaq üçün – 2 ay

Elmlər doktoru elmi dərəcəsi almaq, dissertasiya işini tamamlamaq üçün – 3 ay

Əlavə olaraq, əmək məcəlləsində qeyd edilir ki, doktoranturada təhsil alan və bu pilləyə hazırlaşan şəxslər üçün ayrıca hər iş ili üçün də 30 təqvim günü məzuniyyət verilir.

Lakin praktikada insanları ən çox çaşdıran proses, təhsil və yaradıcılıq məzuniyyətinin istifadə hüququnun yaranması məsələsidir.

Bilirik ki, əmək məzuniyyətindən istifadə hüququ,işçinin həmin müəssisədə 6 ay iş stajından sonra yaranır. Yəni işçi 6 ay çalışdıqdan sonra öz əmək məzuniyyəti hüququndan istifadə edə bilər.Bəs təhsil və yaradıcılıq məzuniyyətindən istifadə üçün 6 ay iş stajının olması şərtdir mi?

Maraqlı nüans burada yaranır.Əmək məzuniyyətində tələb olunan 6 ay məsələsi, təhsil və yaradıcılıq məzuniyyətindən istifadə etmək istəyən şəxslərə də şamil edilir mi?

Cavab olaraq bunu bildirmək olar ki, xeyr. Çünki qanunvericilikdə bununla bağlı hər hansısa iş stajı tələb olunmayıb. Belə anlamaq olar ki, işçi təhsil və yaradıcılıq məzuniyyətindən istifadə edən zamanı 6 ay stajının olmsı şərt deyil.İlk 2-ci ayından və ya 3-cü ayından rahat şəkildə təhsil məzuniyyəti hüququndan yararlana bilər.