Uşaqların Beynəlxalq Müdafiəsi Günü çərçivəsində maraqlı təşəbbüs

Uşaqların Beynəlxalq Müdafiəsi Günü çərçivəsində maraqlı təşəbbüs

1 İyun – Uşaqların Beynəlxalq Müdafiəsi Günü münasibətilə Elm və Təhsil Nazirliyi yanında İctimai Şuranın katibi Günay Əkbərovanın təşəbbüsü ilə maraqlı sosial layihə həyata keçirilib.

"Azərbaycan müəllimi" xəbər verir ki, layihə çərçivəsində Abşeron rayonu Mehdiabad qəsəbəsi 5 nömrəli tam orta məktəbin rəhbərliyi, peşə təmayüllü siniflərində təhsil alan şagirdlər və onların müəllimləri uşaq sığınacaq evində olublar.

Belə ki, məktəbdə "Aşpaz köməkçisi" və "Qənnadçı köməkçisi" ixtisasları üzrə təhsil alan şagirdlər müəllimlərinin rəhbərliyi ilə hazırladıqları müxtəlif yeməklər və şirniyyatları uşaq sığınacaq evinə aparıblar. Oradakı körpə qəlblərlə bir araya gələn şagirdlər həm öz bilik və bacarıqlarını nümayiş etdirmək, həm də qayğıya ehtiyacı olan uşaqlara sevinc bəxş etmək imkanı qazanıblar.

Bu təşəbbüs həm peşə təhsilinin tətbiqi yönümünü gücləndirib, həm də şagirdlərdə humanist dəyərlərin, sosial məsuliyyət və empatiya hissinin formalaşmasına xidmət edib.

Belə layihələrin davamlı olması uşaqların cəmiyyətə faydalı və dəyərli fərdlər kimi yetişməsində mühüm rol oynayır.