Tarix müəllimi olmağa hazırlaşan 4 qat dünya çempionu: “Hər iki sahəni sevirəm”

Tarix müəllimi olmağa hazırlaşan 4 qat dünya çempionu: “Hər iki sahəni sevirəm”

Adını idman tarixinə yazdıran və uğurları ilə seçilən gənclərimizin sayı az deyil. Onlardan biri 20 yaşlı idmançı-tələbə Qənbər Ağayevdir. Əzmi, qərarlılığı ilə fərqlənən, idman və təhsil həyatını düzgün idarə edən Qənbərlə söhbət edərək maraqlı məqamları yazıya köçürdük. 

2005-ci ildə Ağdamda anadan olan Qənbər Ağayev orta təhsilini də bu rayonda alıb. 7 yaşından idmanla peşəkarcasına məşğul olmağa başlayan,  ilk vaxtlar özünü cüdo və digər idman növlərində sınayan gənc 2016-cı ildən Alpaqut Turan döyüş sənətinə maraq göstərir:

“Hazırda Alpaqutla məşğulam. Bu sahədə 4 qat dünya çempionu, 2 dəfə dünya kubokunun sahibi, 7 qat Azərbaycan çempionu, Prezident Kubokunun sahibiyəm. Tezliklə idman ustalığına namizədliyim təsdiq ediləcək. Qara kəmərim var. Alpaqut Turan döyüş sənəti Azərbaycanın ilk milli döyüş sənətidir və hazırda 25-dən çox ölkə tərəfindən tanınır. Bütün uğurlarıma görə anama borcluyam”.

“Anam hər zaman uğur qazanacağıma inanıb”

Qənbər idmana ailəsinin təşəbbüsü, özünümüdafiə məqsədilə başladığını deyir. Zaman keçdikcə idman onun həyatının ayrılmaz bir hissəsinə çevrilib. O, uğurlarında anasının rolunun mühüm olduğunu vurğulayır:

“Anam hər zaman mənim enerji mənbəyim olub. Uğur qazanacağıma inanıb, mənə dəstək verib və çox güvənib. Bəlkə də buna görə yarışlarda inamla çıxış etmişəm”.

O, 2022-ci ildə Azərbaycan Dövlət Pedaqoji Universitetinin Ağcabədi filialında “Tarix müəllimliyi” ixtisasına qəbul olub:

“Tələbə adını qazanmaq mənim üçün böyük uğur idi. Hər bir nailiyyət insanı növbəti qələbəyə hazırlaşdırır. Universitetdə çətinlik yaşamadım, çünki uşaqlıqdan dərs və idman arasında balans qurmuşdum. Yarış və dərslər üst-üstə düşəndə Gənclər və İdman Nazirliyindən “icazə” kağızı təqdim olunur. Müəyyən çətinliklər yarananda isə müəllimlər mənə dəstək olurlar. Bəzən çəkimi azaltmaq üçün günlərlə ac qalıram, bu da idmanın bir parçasıdır.”

“İnanıram ki, idman fəaliyyətim müəllimlik həyatımı kölgədə qoymaz”

Qənbər tələbə olmasına baxmayaraq, məşqçi köməkçisi kimi fəaliyyət göstərir. O, 2017-ci ildən iştirak etdiyi döyüşləri məğlubiyyətsiz başa vurub:

“İnanıram ki, idman fəaliyyətim müəllimlik həyatımı kölgədə qoymaz. Hər iki sahəni sevirəm. Ailəm də müəllim ailəsidir, nənəm əməkdar müəllimdir”.

“Rəqibimi ilk dəqiqədə nokaut etdiyim vaxtlar olub”

Qənbər unudulmaz döyüşlərindən birini belə xatırlayır:

“Türkiyənin Bursa şəhərində olan döyüşlərdən biri yaddaqalan idi. 4 döyüşün 3-nü vaxtından əvvəl bitirdim. İranlı olan 5-ci rəqibim isə mənimlə döyüşə çıxmaqdan imtina etdi. Rəqibimi ilk dəqiqədə nokaut etdiyim vaxtlar da olub”.

O, gənclər və idman naziri Fərid Qayıbovla bir neçə dəfə görüşdüyünü və bundan qürur duyduğunu bildirir:

“Sonuncu dəfə fevral ayında görüşmüşük. Nazir hər görüşdə bizə dəstəyini və səmimiyyətini hiss etdirib. Düşünürəm ki, daha böyük nailiyyətlərim hələ qarşıdadır”.