AzMİU-da tələbələrin əl işlərindən ibarət sərgi açılıb

AzMİU-da tələbələrin əl işlərindən ibarət sərgi açılıb

Azərbaycan Memarlıq və İnşaat Universitetində (AzMİU) tələbələrin yaradıcılıq potensialını nümayiş etdirən “People” adlı sərgi açılıb. 

Universitetdən “Azərbaycan müəllimi”nə bildirilib ki, sərgi Memarlıq və Dizayn fakültələrinin təşkilatçılığı, Təsviri incəsənət kafedrasının dəstəyi ilə baş tutub.

Sərginin açılışında çıxış edən Dizayn fakültəsinin dekanı Fərid Kərimov tələbələrin yaradıcılıq axtarışlarını dəstəkləməyin vacibliyini vurğulayıb və belə sərgilərin onların inkişafına müsbət təsir etdiyini qeyd edib.

Tədris işləri üzrə prorektor professor Akif Qasımov sərginin tələbələrin estetik dünyagörüşünü formalaşdırmaqla yanaşı, sənətə olan maraqlarını artırdığını bildirib. O, tələbə gənclərə gələcək fəaliyyətlərində uğurlar arzulayıb.

Təsviri incəsənət kafedrasının müdiri Pərviz Cəfərov sərgiyə hazırlıq prosesindən bəhs edərək tələbələrin zəhməti və müəllimlərin dəstəyi nəticəsində ərsəyə gələn sərgini yüksək  yüksək qiymətləndirib.

Memarlıq fakültəsinin dekanı professor Zahidə Məmmədova sərgidə təqdim olunan əl işlərinin böyük zövq və peşəkarlıqla hazırlandığını qeyd edib. Sərginin təşkilində əməyi olan hər kəsə təşəkkürünü bildirib. 

Sərginin tələbələrin sənət dünyasına yeni bir baxış qazandıracağına inanan Təsviri incəsənət kafedrasının müəllimi Həsən Həsənov, eyni zamanda onların yaradıcı potensialını daha da gücləndirəcəyinə əmin olduğunu deyib.

THİK sədri Şahmar Rəfili isə tələbələrin istedadını dəstəkləməyin əhəmiyyətini vurğulayaraq, universitetin bu gənc yaradıcıların inkişafına daim diqqət ayırdığını söyləyib.

Daha sonra sərgiyə baxış keçirilib və sənətsevərlər tələbələrin əl işləri ilə tanış olublar. Fərqli texnika və üslublarla hazırlanmış əsərlər sərgi iştirakçılarında böyük maraq yaradıb.

Qeyd edək ki, “People” adlı sərgi tələbələrin yaradıcı dünyasını və sənətə yanaşmalarını sərgilədikləri xüsusi sərgi olub. Burada tanınmış insanların portretləri ilə yanaşı, fərqli similar da yer alıb. Tələbələr müxtəlif üslub və texnikalarla bu simaları canlandıraraq sərgiyə estetik və emosional dərinlik qatıb.