Balaca rəssamların fərdi rəsm sərgisi və animasiya nümayişi keçirilib – FOTOLAR

Balaca rəssamların fərdi rəsm sərgisi və animasiya nümayişi keçirilib – FOTOLAR

Xətai Sənət Mərkəzində paytaxtdakı 3 nömrəli Uşaq-Gənclər İnkişaf Mərkəzinin “Təsviri sənət və dizayn” dərnəyinin istedadlı balaca rəssamları, bir çox respublika və beynəlxalq müsabiqələrinin qalibləri Kövsər Qurban və İnci Qurbanın COP29 və “Yaşıl dünya naminə həmrəylik ili” çərçivəsində “Tumurcuq” adlı fərdi rəsm sərgisi və animasiya nümayişi keçirilib.

"Azərbaycan müəllimi" xəbər verir ki, “Tumurcuq” rəsm sərgisi Kövsərin 3-cü, eyni zamanda 5 illik hesabat sərgisi, İncinin isə ilk fərdi sərgisidir. 16 medal, 100-dən çox sertifikat, diplom, fəxri fərmanın sahibi olan 10 yaşlı Kövsərin rəsm işləri Türkiyə, ABŞ, Yaponiya, Çin, Cənubi Koreya, Rusiya, Fransa, İtaliya, Belarus, Bolqarıstan, Rumıniya və Latviyada keçirilən sərgilərdə nümayiş olunub. Balaca rəssam 8 yaşında V Beynəlxalq Animafilm Animasiya Festivalının qalibi seçilib, beynəlxalq münsiflərin xüsusi seçim mükafatına layiq görülərək “Qalib lövhəsi” ilə mükafatlandırılıb. İstedadlı yeniyetmə rəssamın çəkdiyi qısametrajlı animasiyalar bir neçə beynəlxalq festivallarda qalib olub, həmin ölkələrin kino mərkəzlərində nümayiş etdirilib. 7 yaşlı balaca rəssam İnci isə müxtəlif beynəlxalq və respublika müsabiqələrində 30-dan çox sertifikat və diploma, 3 beynəlxalq medala layiq görülüb. Onlar bacıdırlar. Bakıdaki 116 nömrəli məktəbdə təhsil alırlar.

Sərgidə istedadlı rəssamların COP29 və “Yaşıl dünya naminə həmrəylik ili”nə həsr olunmuş təbiət, mənzərə, natürmort, portret janrlarında, həmçinin “Qarabağ” və milli-mənəvi dəyərlərimizə, vətənpərvərlik mövzusuna həsr olunmuş 200-ə yaxın rəsm işləri sərgilənib, Kövsərin 5 animasiya filmi nümayiş etdirilib.

Yekunda mərkəzin milli rəqs dərnəyinin rəhbəri Samirə Musaimin hazırladığı “Təbiəti sevək” və “Şən rəqs” kompozisiyası ifa olunub.

Sərgidə Azərbaycanın Xalq rəssamları Arif Hüseynov, Sirus Mirzəzadə, Aydın Rəcəbov, Əməkdar rəssam Məmmədhüseyn Hüseynov, Əməkdar incəsənət xadimi, sənətşünaslıq üzrə fəlsəfə doktoru Ziyadxan Əliyev, eləcə də Elm və Təhsil Nazirliyi, Mədəniyyət Nazirliyi, Məktəbəqədər və Ümumi Təhsil üzrə Dövlət Agentliyi, Bakı Şəhəri üzrə Təhsil İdarəsi, Azərbaycan Animasiya Assosiasiyası, müxtəlif səfirliklər və digər qurumların nümayəndələrin iştirakı ilə sərgiyə baxış keçirilib.

Sifai SƏFƏROVA