Şəhidin xatirə lövhəsinin sinif otağından çıxarılması ilə bağlı AÇIQLAMA

Sosial şəbəkələrdə Samux rayonu İnstitut qəsəbə tam orta məktəbində şəhid Həsən Həsənovun qardaşı Nahid Həsənov tərəfindən sinifdən şəhidin xatirəsinə həsr olunmuş lövhənin sökülməsi ilə bağlı videogörüntülər yayılıb.

Məsələ ilə bağlı məktəbdən “Azərbaycan müəllimi”nə bildirilib ki, ümumi təhsil müəssisəsində şəhidin xatirəsinə həsr olunmuş lövhə məktəbin ibtidai sinfinin təlim-tədrisə cəlb olunduğu sinif otağına yerləşdirilib.

"Məktəbin sinif otaqlarının yeni avadanlıqlarla təchizi və yenidən təşkili prosesi həyata keçirildiyindən adıçəkilən sinif digər otaqlardan birinə keçirilib. Vətəndaş Nahid Həsənov prosesdən narazılığını ifadə edərək öz istəyi ilə xatirə lövhəsini məktəbin divarından çıxarıb.

Məktəb rəhbərliyi tərəfindən şəhidin ailəsinə lövhənin yenidən eyni sinif otağına və ya onların təklifinə uyğun digər bir sinif otağına yerləşdirilməsi təklif olunub.

Bu prosesdə məktəb rəhbərliyi şəhidin xatirəsinə və ailə üzvlərinin təkliflərinə hörmətlə yanaşır, tərəflərin razılığı əsasında məsələnin həllini təmin etməyə çalışır.

Hər bir azərbaycanlının öz doğma vətəninə, onun tarixinə, mədəniyyətinə, adət-ənənələrinə və qəhrəmanlarına qarşı dərin hörmət və sevgi hissi ilə böyüməsi, vətənpərvər ruhda tərbiyəsi bizim əsas vəzifəmiz və məqsədimizdir.  

Bütün bu istiqamətlərdə təhsil müəssisələrimizdə mütəmadi olaraq maarifləndirmə tədbirləri, ədəbi-bədii kompozisiyalar, “dəyirmi masa”lar və s. təşkil olunur. Təhsil müəssisələrinə, eyni zamanda müəssisələrin sinif otaqlarına şəhid və qəhrəmanlarımızın adının verilməsi, sinif otaqlarında şəhid şəkillərinin asılması gənc nəslə şəhidlərimizin qəhrəmanlıq nümunələrini aşılamaq, onların vətənpərvərlik hisslərini gücləndirmək və milli dəyərlərimizi təbliğ etmək məqsədini daşıyır.

Samux rayonu İnstitut qəsəbə tam orta məktəbində də tədris ili boyunca bu istiqamətdə müxtəlif tədbirlər həyata keçirilib, 7 nəfər I və II Qarabağ müharibəsi şəhidinin adını daşıyan sinif otaqları təşkil edilib. Bununla yanaşı, məktəbin həyətində şəhidlərin xatirəsinə bulaq inşa edilib", – deyə açıqlamada qeyd olunub.