“Məktəbim uğurlu gələcəyim üçün möhkəm təməl yaradıb” – DP təqaüdçüsü

“Məktəbim uğurlu gələcəyim üçün möhkəm təməl yaradıb” – DP təqaüdçüsü

Müsahibimiz “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı" çərçivəsində dünyanın ən nüfuzlu ali təhsil müəssisələrinin ilk 10-da yerləşən Böyük Britaniyanın London İmperial Kollecində təhsil alan Nərmin Abdullayevadır.

“Azərbaycan müəllimi” qəzetinin “Dövlət Proqramı təqaüdçüləri” rubrikasının növbəti qonağı N.Abdullayevanı oxucularımızla yaxından tanış edirik. 

Tanıtım: 11 oktyabr 1997-ci ildə Tərtər şəhərində anadan olub. 2013-cü ildə Tərtər şəhər Rafiq Nuriyev adına 6 nömrəli tam orta məktəbi fərqlənmə attestatı ilə bitirib. 2013-cü ildə ali təhsil müəssisələrinə qəbul imtahanında 626 bal toplayaraq təhsil aldığı orta məktəbin bütün qruplar, Tərtər şəhərinin isə III qrup üzrə ən yüksək nəticə göstərən abituriyenti olub. Bakalavr təhsilini Azərbaycan Dillər Universitetinin Tərcümə (ingilis dili) fakültəsində dövlət sifarişi əsasında alıb. Təhsil dövründə yerli və beynəlxalq şirkətlərdə, eləcə də dövlət əhəmiyyətli layihələrdə tərcüməçi kimi fəaliyyət göstərib.

2017-ci ildə universiteti fərqlənmə diplomu ilə bitirib. 2020-ci ildə UNEC Biznes Məktəbində MBA, Menecment (təhsil ingilis dilində) üzrə magistr təhsilini yüksək göstəricilərlə başa vurub. Magistratura təhsili dövründə və daha sonra SOCAR-ın müxtəlif müəssisələrində tərcümə və layihələrin idarə edilməsi sahəsində çalışıb. Dövlət əhəmiyyətli layihələrdə aktiv iştirakı və bu sahəyə olan yüksək marağı onu Bakı Şəhər Halqası Əməliyyat Şirkətində Formula 1 yarışları zamanı media-kommunikasiya və korporativ sosial məsuliyyət sahəsində fəaliyyət göstərməyə yönəldib. 

Akademik fəaliyyəti çərçivəsində Xəzər Universitetində bakalavr səviyyəsində “Tərcümə” ixtisası üzrə fənləri tədris edib. Daha sonra COP29 Azərbaycan Əməliyyat Şirkətində kommunikasiya üzrə menecer vəzifəsində çalışıb, ölkəmiz üçün mühüm əhəmiyyət kəsb edən bu tədbirin uğurla həyata keçirilməsində əzm və qürurla çalışıb. 

Nərmin Abdullayeva ilə söhbətimizə orta məktəb illəri ilə körpü salırıq. 

Məktəbim mənim uğurlu gələcəyim üçün möhkəm təməl yaradıb

– Orta təhsil illərim akademik uğurlarımda və şəxsiyyətimin formalaşmasında mühüm rol oynayıb. Məktəb illərində daim yüksək nəticələr göstərmiş, müxtəlif fənn olimpiadaları və müsabiqələrdə iştirak edərək uğurlar qazanmışam. 

Xüsusilə, humanitar elmlərə – ədəbiyyat, ingilis dili və tarix fənlərinə böyük maraq göstərirdim. Dil və kommunikasiya bacarıqlarımın təməli məhz orta məktəb illərimdə atılıb. Dərslərimdən əlavə daim inkişaf üçün müəllimlərimin dəstəyi ilə əlavə araşdırmalar aparır, bədii və elmi ədəbiyyat oxuyurdum. Eyni zamanda, riyaziyyat fənni üzrə biliklərimi təkmilləşdirməyə, analitik düşüncə tərzimi inkişaf etdirməyə səy göstərirdim. Qeyd etmək istərdim ki, riyaziyyata olan sevgim ailəmdən gəlir. Uşaqlıqdan ailə üzvlərim mənə riyazi düşüncənin əhəmiyyətini öyrədib, məntiqi yanaşmanın təkcə dərslərdə deyil, həyatda da faydalı olduğunu göstəriblər.  

Bundan əlavə, məktəb illərində şahmatla da aktiv məşğul olmuşam və bu, məntiqi düşünmə qabiliyyətimin inkişafında xüsusi rol oynayıb. Şahmat üzrə məktəblərarası yarışlarda iştirak edərək müxtəlif mükafatlar qazanmışam. Bu idman növü mənə strateji düşünməyi, səbirli olmağı və qərar qəbuletmə bacarıqlarımı təkmilləşdirməyi öyrədib. 

Məktəbim mənim uğurlu gələcəyim üçün möhkəm təməl yaradıb. Peşəkar və qayğıkeş müəllimlərimin dəstəyi təkcə akademik biliklərimə deyil, həm də liderlik, məsuliyyət və davamlı çalışmaq kimi keyfiyyətlərimin formalaşmasına böyük töhfə verib. Məktəb illərində qazandığım bilik, bacarıq və təcrübələr məni ali təhsil yolunda böyük uğurlara aparan əsas amillərdən biri olub.

Burada qazandığım biliklər mənim üçün misilsiz bir inkişaf mərhələsidir

– Xaricdə Dövlət Proqramı ilə tanışlığınız nə vaxt başladı, proqramın təhsilinizdə rolu, əhəmiyyəti barədə nə deyə bilərsiniz?

– Xaricdə təhsil almaq arzusu məndə hələ məktəb illərindən formalaşmışdı. Həmişə düşünürdüm ki, beynəlxalq akademik mühitdə təhsil almaq təkcə yeni biliklər əldə etmək deyil, eyni zamanda innovativ yanaşmalarla tanış olmaq və qlobal şəbəkənin bir parçasına çevrilmək baxımından misilsiz imkanlar yaradır. Universitet illərində və peşəkar fəaliyyətimdə tanıdığım əcnəbi ekspertlər, qazandığım təcrübələr bu istəyimi daha da möhkəmləndirdi və beynəlxalq səviyyədə ixtisaslaşmış mütəxəssis kimi formalaşmaq arzusunu daha da gücləndirdi.

"Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı" ilə tanış olduqdan sonra onun məqsədlərinin və yaradılan imkanların məhz mənim akademik və peşəkar hədəflərimlə üst-üstə düşdüyünü gördüm. Ölkə başçısı Prezident İlham Əliyevin uzaqgörən siyasətinin və gənclərin inkişafına göstərdiyi xüsusi qayğının təzahürü olan bu proqram azərbaycanlı gənclərə qlobal bilik və təcrübəyə yiyələnmək, dünya elmi və biznes mühitində öz sözünü demək üçün bənzərsiz bir fürsət yaradır. 

Hazırda "2022–2028-cı illər üçün Dövlət Proqramı"nın qalibi olaraq ikinci magistr təhsilimi QS reytinqində dünya üzrə top 10-luqda 2-ci yerə layiq görülən London İmperial Kollecində “Strateji marketinq” ixtisası üzrə davam etdirirəm. Burada qazandığım biliklər, akademik müzakirələrdə iştirakım, sahəmin aparıcı mütəxəssisləri ilə qurduğum əlaqələr və real biznes problemlərinin həllinə yönəlmiş layihələrdə əldə etdiyim təcrübə mənim üçün misilsiz bir inkişaf mərhələsidir. Bu təhsil yalnız nəzəri biliklərlə məhdudlaşmır, eyni zamanda innovasiya və strateji yanaşma qabiliyyətimi daha da gücləndirir, məni gələcəyin peşəkar və yenilikçi mütəxəssisi kimi yetişdirir. 

Proqramın mənə qazandırdığı bilik və bacarıqları ölkəmin inkişafına yönəltmək, əldə etdiyim təcrübələri müxtəlif sahələrdə tətbiq edərək Azərbaycanın elmi, iqtisadi və biznes ekosisteminin daha da güclənməsinə töhfə verməyi böyük həvəs və məsuliyyət hissi ilə gözləyirəm. Bu təşəbbüs gənclərə göstərilən yüksək etimadın və Azərbaycan dövlətinin insan kapitalının inkişafına verdiyi dəyərin bariz nümunəsidir. Mən də bu etimadı doğrultmaq və ölkəmin beynəlxalq arenada mövqeyini daha da gücləndirmək üçün var gücümlə çalışmağa hazıram.

Dövlət Proqramı Azərbaycan gəncləri üçün qlobal təhsil imkanları açan əhəmiyyətli bir layihədir

– Ölkəmizdə gənclərin xaricdə ali təhsil almasına dövlət dəstəyi və diqqəti barədə fikirlərinizi bölüşərdiniz.

– Azərbaycan dövləti gənclərin qlobal bilik və bacarıqlara yiyələnməsi, müasir elmi və texnoloji yeniliklərə çıxış imkanlarının genişlənməsi istiqamətində mühüm addımlar atır. Cənab Prezident İlham Əliyevin təşəbbüsü ilə həyata keçirilən "2022–2028-ci illər üçün Dövlət Proqramı" Azərbaycan gəncləri üçün qlobal təhsil imkanları açan əhəmiyyətli bir layihədir. Bu proqram gənclərin dünyadakı ən qabaqcıl universitetlərdə təhsil almasına şərait yaradır, onlara beynəlxalq mühitdə öz bilik və bacarıqlarını inkişaf etdirmək fürsəti verir. Hazırda təhsil aldığım proqramda 53 fərqli millətin nümayəndələri iştirak edir. Burada təhsil alarkən, dünyanın ən inkişaf etmiş ölkələrindən olan tələbələrlə bir arada olmaq, həm müasir təhsil və tədqiqat metodları ilə tanış olmaq, həm də müxtəlif mədəniyyətlərdən olan insanlarla əməkdaşlıq etmək mənim üçün böyük bir şansdır. Öz ölkəmi bu cür prestijli və nüfuzlu bir mühitdə təmsil etmək, yalnız akademik deyil, həm də şəxsi və peşəkar inkişafım üçün dəyərli bir təcrübədir.

Dövlətimizin xaricdə təhsilə verdiyi bu dəstək, həm də ölkənin gələcək inkişafı üçün əvəzsiz bir yatırımdır. Mənim üçün bu proqram yalnız təhsil almaq deyil, həm də Azərbaycanın beynəlxalq səviyyədə daha da tanıdılması, ölkəmizin təhsil və bilik sahəsində daha yüksək pillələrə çatması üçün vacib bir addımdır. Yaxın gələcəkdə burada qazandığım bilik və təcrübələri Azərbaycanda tətbiq etmək və ölkəmin inkişafına töhfə vermək istəyirəm.

Burada bizə biznesin A-dan Z-yə bütün aspektləri öyrədilir

– Ali məktəb və ixtisasınız  barədə nə deyə bilərsiniz? Bu ixtisasa marağınız nə ilə bağlıdır? 

– London İmperial Kollecində təhsil almaq mənim üçün böyük bir fürsət və təcrübədir. Bu universitet, dünya miqyasında tanınan və yenilikçi yanaşmaları ilə seçilən bir təhsil müəssisəsidir. “Strateji marketinq” ixtisası mənim gələcəkdəki peşəkar inkişafım üçün zəruri əhəmiyyət daşıyır. İctimaiyyətlə əlaqələr və kommunikasiya sahəsində çalışdığım zamanlarda strateji qərarların qəbulu zamanı data (verilənlər) əsaslı analitik qərarlar verilməsinin vacibliyini müşahidə edirdim. Bu sahəyə marağım məhz bu zamanlardan yaranmışdır. 

Kollecin zəngin tədqiqat resursları və dünya üzrə tanınmış ekspertləri tələbələrə sahə üzrə ən müasir məlumatları və innovativ yanaşmaları təqdim edir. Burada yalnız marketinq sahəsində deyil, həm də biznes layihələrinin idarə edilməsi, iqtisadi dəyişikliklərə adaptasiya və dayanıqlı biznes modellərinin qurulması sahələrində dərin biliklər əldə edirəm. Bu cür yanaşmalar mənə gələcəkdə dayanıqlı və effektiv strategiyalar hazırlamaq üçün vacib olacaq. Burada bizə biznesin A-dan Z-yə bütün aspektləri öyrədilir. Maliyyə, data analitikası, bazar araşdırılması, strateji idarəetmə, müxtəlif proqramlaşdırma dilləri də öyrədilir. Dünya ölkələrində Strateji marketinq sahəsi artıq yalnız kommersiya məqsədli deyil, həm də dayanıqlı inkişaf və iqtisadi, sosial və mədəni dəyişikliklərlə bağlı qərarların qəbul edildiyi əsas sahəyə çevrilib. Qlobal miqyasda strateji marketinq daha çox rəqəmsal innovasiya, data analitikası və dayanıqlılığa yönəlir, qabaqcıl innovasiya və texnologiyadan istifadə edərək data yönümlü qərarlar qəbul edilir. Dayanıqlılıq bu sahədə yalnız ətraf mühitin qorunması ilə bağlı deyil, həm də uzunmüddətli sosial və iqtisadi inkişafın təmin olunmasına yönəlmiş bir yanaşma kimi ön plana çıxır. 

Məqsədim öyrəndiklərimi öz ölkəmdə tətbiq edərək Azərbaycanın inkişafına töhfə verməkdir

– Magistratura təhsilinizdən gözləntiləriniz, gələcək hədəfləriniz barədə nə deyə bilərsiniz?

– Magistratura təhsilimi gələcək hədəflərimə doğru əhəmiyyətli bir addım olaraq görürəm. Bu təhsil mərhələsində əsas gözləntim liderlik bacarıqları və dayanıqlı biznes strategiyalarının formalaşdırılması sahəsində daha da təkmilləşməkdir. Mənim məqsədim öyrəndiklərimi öz ölkəmdə tətbiq edərək, Azərbaycanın inkişafına töhfə verməkdir. Kollecin təklif etdiyi tədris proqramı və professional mühit, mənə müasir biznes dünyasında qarşılaşdığımız çətinliklərə cavab verə biləcək strateji yanaşmaları və dayanıqlı inkişaf, eynilə də iqtisadi dəyişikliklərə adaptasiya və səmərəli idarə etmə prinsiplərini tətbiq etməyə imkan verir. Bu bilik və bacarıqları ölkəmin inkişafına yönəldərək, dövlətin sosial, ekoloji və iqtisadi layihələrinə dəyər qatacağıma inanıram. 

Ölkəmiz sürətlə inkişaf edir və bu inkişafın bir hissəsi olaraq həyata keçirilən qlobal layihələrin sayı artmaqdadır. Ölkəmizi dünyaya tanıtmaqda və beynəlxalq arenada tutduğu mövqenin gücləndirilməsində müstəsna əhəmiyyəti olan bu layihələrin, xüsusilə də Qarabağda həyata keçirilən sosial və iqtisadi inkişaf layihələrinə töhfə vermək ən böyük hədəflərimdəndir. Mən Tərtərdə böyüdüyüm üçün Qarabağda baş verən hər bir yenilik mənim üçün çox dəyərlidir. Ölkəmə qayıtdıqda Qarabağın inkişafına öz töhfəmi vermək əsas məqsədimdir.

Tələbələrin elmi-tədqiqatlara təşviqi universitetin əsas prioritetlərindən biridir

– Universitetdə tədris mühiti, müəllim-tələbə münasibətləri, əcnəbi tələbələrə münasibət, eləcə də gənclərin elmi-tədqiqatlara təşviqi sahəsində nə kimi müsbət təcrübənizi qeyd edə bilərsiniz?

– London İmperial Kolleci akademik mükəmməlliyi, elmi-tədqiqatlara verdiyi töhfə və innovasiya yönümlü yanaşması ilə seçilən universitetlərdən biridir. Buradakı tədris mühiti tələbələrin təkcə bilik əldə etməsinə deyil, həm də onları müstəqil düşünən strateji liderlərə, innovativ problemlərin həllinə yönəlmiş peşəkar mütəxəssislərə çevirməyə xidmət edir. Tədris yanaşması empirik tədqiqat, data əsaslı qərar qəbuletmə və strateji analiz kimi müasir biznes metodologiyalarına əsaslanır. 

Müəllim-tələbə münasibətləri akademik mentorluq və intellektual əməkdaşlıq prinsipləri üzərində qurulub. Burada professorlar təkcə bilik ötürən deyil, həm də tələbələrin analitik və tənqidi düşüncə qabiliyyətlərini inkişaf etdirən mentorlar kimi çıxış edirlər. Tələbələr real biznes problemləri ilə işləyir, sənaye ekspertləri və qlobal liderlərlə birbaşa ünsiyyət qurmaq imkanı əldə edirlər. 

Elmi-tədqiqatların təşviqi və tələbələrin bu sahəyə cəlb olunması universitetin əsas prioritetlərindən biridir. Kollec qlobal miqyasda etibarlı və aktual məlumat bazalarına çıxış imkanı verən, dayanıqlı biznes modellərinin inkişafını təşviq edən və tədqiqat yönümlü qərarların qəbulunu stimullaşdıran qabaqcıl institutlardan biridir. Universitet dayanıqlılıq və iqlim dəyişikliyi, süni intellekt və marketinq analitikası, böhran kommunikasiyası və strateji idarəetmə kimi sahələrdə elmi-tədqiqatları dəstəkləyir və tələbələrin bu tədqiqatlara aktiv şəkildə cəlb olunmasını təşviq edir. 

Qlobal tələbə icması və beynəlxalq şəbəkələşmə universitetin ən güclü tərəflərindəndir. Təhsil aldığım proqramda 53 fərqli millətin nümayəndələri təmsil olunur ki, bu da müxtəlif iqtisadi modellər, mədəni perspektivlər və biznes yanaşmaları ilə tanış olmaq, eləcə də qlobal baxış bucağımın genişlənməsi üçün əvəzolunmaz bir imkan yaradır. Qruplar şəklində həyata keçirdiyimiz layihələr çərçivəsində biz sanki müxtəlif millətlərin təmsil olunduğu bir şirkəti təmsil edirik. Qarşılıqlı hörmət və inklüziv mühit yaradaraq bir-birimizi hər bir sahədə dəstəkləyirik. Bu mühit təkcə akademik inkişafı deyil, həm də liderlik bacarıqlarının, qlobal düşüncə tərzinin və strateji baxış bucağının formalaşmasını da dəstəkləyir.

Qeyd etmək istərdim ki, əcnəbi tələbələr, müəllimlər və universitet heyəti ilə söhbət zamanı onların Azərbaycan haqqında çox məlumatlı olmaları, əksəriyyətinin artıq Azərbaycana səfər etdiyini və ya səfər planladığını görmək məni çox sevindirir. Onlar daim mənə ölkəmiz haqqında suallar verir və daha çox məlumat almağa çalışırlar. Fikrimcə, bu məsələdə ölkəmizin həyata keçirdiyin beynəlxalq tədbirlərin rolu çox böyükdür.

Xaricdəki tələbə icmamız üçün önəmli vəzifə

– Britaniyada azərbaycanlı tələbələrin şəbəkələşməsi barədə nə deyərdiniz?

– Düşünürəm ki, xaricdə təhsil alan tələbələrimiz təkcə akademik bilik qazanmaqla kifayətlənməməli, həm də ölkəmizin mədəniyyətini, tarixini və dəyərlərini beynəlxalq mühitdə tanıtmaq missiyasını daşımalıdırlar. Xüsusilə, Azərbaycanın zəngin irsini və müasir inkişafını dünyaya çatdırmaq xaricdəki tələbə icmamız üçün önəmli bir vəzifədir.

Böyük Britaniyada azərbaycanlı tələbələrin şəbəkələşməsi bu istiqamətdə mühüm rol oynayır. Burada təhsil alan tələbələrimiz müxtəlif rəsmi və qeyri-rəsmi təşkilatlarda birləşərək, həm sosial, həm də akademik müstəvidə bir-birilərinə dəstək olurlar. Universitetlərdə Azərbaycan Tələbə Cəmiyyətlərinin aktiv fəaliyyəti tələbələr arasında həmrəyliyi gücləndirməklə yanaşı, Azərbaycanı tanıdan tədbirlərin təşkil edilməsi və Azərbaycanın zəngin mədəniyyətini və tarixi irsini dünya ictimaiyyətinə tanıtmaq baxımından da zəruridir. Mən də öz növbəmdə Britaniyada təhsil alan azərbaycanlı tələbələrin bir-birilə daha sıx əlaqədə olmasının, qarşılıqlı dəstək göstərməsinin və ölkəmizi yüksək səviyyədə təmsil etməsinin zəruriliyini vurğulamaq istərdim. Xaricdə əldə etdiyimiz bilik və təcrübə yalnız fərdi inkişafımıza deyil, Azərbaycanın gələcək strateji inkişafına və beynəlxalq nüfuzunun möhkəmlənməsinə də xidmət etməlidir.

Qızlarımızın reytinqli universitetlərdə yer tutması məni çox qürurlandırır

– Xaricə üz tutan gənclər arasında qızlarımızın sayı artır. Öz timsalınızda bunu necə izah edərdiniz? 

– Son illərdə xaricdə təhsil alan azərbaycanlı qızların sayının artması, ölkəmizdə qadınların elmə, akademik və peşəkar inkişafına verdiyi dəyərin göstəricisidir. Mən öz təcrübəmdə bunun həm ailəmin dəstəyi, həm də şəxsi məqsədlərimə sadiqliyim sayəsində mümkün olduğunu deyə bilərəm. Uşaqlıqdan elmə və biliklərə olan marağım, eləcə də peşəkar sahədə yüksəlmək istəyim məni daha geniş perspektivlər axtarmağa sövq etdi.

Qızların təhsil alması mənim üçün çox həssas mövzulardan biridir. Öz növbəmdə hər bir qızın təhsil almasını dəstəkləməyə çalışıram. Tərtərdə təhsil aldığım müddətdə müharibənin nəticələri və ya gələcəyə olan motivasiya çatışmazlığı səbəbindən bəzi şagirdlərin məktəbdən və təhsildən uzaqlaşdığını görürdüm. Bu halların qarşısının maksimum alınmalı olduğunu düşünürəm, çünki təhsil həm də cəmiyyətin güclənməsinə aparan ən fundamental yoldur. 

Gənc qızlarımızın dünya reytinqli universitetlərdə yer tutması məni çox qürurlandırır. Bu tendensiya göstərir ki, Azərbaycan qızları artıq yalnız yerli mühitlə məhdudlaşmır, qlobal arenada öz bacarıqlarını nümayiş etdirməkdən çəkinmir və müxtəlif sahələrdə uğur qazanmağa çalışırlar. Xaricdə təhsil almaq həm də ölkəmizə faydalı olmaq üçün yeni biliklər qazanmaq deməkdir. Mən də burada əldə etdiyim bilik və təcrübələrlə Azərbaycanda qadınların peşəkar və akademik inkişafına dəstək olmağa hər zaman hazıram.

Qızlarımızı çalışqan, özünəinamlı və cəmiyyətin müxtəlif sahələrində yüksək mövqelərdə görmək ən böyük arzularımdandır. Gənc qızların xaricdə oxumağa marağının artması isə Azərbaycan qadınının özünü ifadə etməyə, bilik və bacarıqlarını reallaşdırmağa daha çox imkan əldə etdiyini göstərir.

Düzgün universitet seçimi çox vacibdir 

– Sizin üçün uğurun sirri nədədir? Xaricdə təhsil almaq istəyən gənclərə nə kimi tövsiyələriniz olardı?

– Mən çox şanslı insanam, çünki həyatımda hər zaman məni dəstəkləyən və yolumu işıqlandıran valideynlərim olub. Onlar hər zaman təhsilimi prioritet görüb, mənə daim öyrənməyi aşılayıblar. Məhz bu dəstək və sevgi sayəsində uğur qazanmaq üçün lazım olan fürsətləri dəyərləndirə bilmişəm. Əlbəttə, mənim üçün uğurun sirri hədəflərə sadiqlik, davamlı öyrənmə və disiplindir. 

Dəqiq məqsədlər müəyyən etmək, daim öz üzərində işləmək və qarşıya çıxan fürsətləri dəyərləndirmək uğurun əsas açarlarıdır. Tələbələrin ixtisaslaşmaq istədikləri sahəni düzgün və sevərək seçmələrini çox vacib hesab edirəm. Bundan başqa, düzgün universitet seçimi də çox vacibdir. Hər universitetin yanaşması fərqlidir və seçim edərkən sadəcə prestijə deyil, təqdim etdiyi akademik imkanlara və tədqiqat resurslarına da diqqət etmək lazımdır. Beynəlxalq mühitdə uğur qazanmaq üçün ingilis dili biliklərinin yüksək səviyyədə olması olduqca vacibdir.

Xaricdə təhsil almaq üçün müraciət prosesləri uzun və çətin ola bilər. İmtina cavabları almaq mümkündür, lakin əsas olan ruhdan düşməmək, səbirli olmaq və alternativ imkanlar axtarmaqdır.Uğura gedən yol üçün, zənnimcə, hər kəsin özünəməxsus bir düsturu var. Əsas məsələ o yolda irəliləmək üçün özünə inanmaqdır. Hər bir insanın içində həyatını dəyişəcək gücü var, əsas məsələ həmin gücü kəşf etmək və doğru istifadə etməkdir.