AzMİU-da qonaq olan dizaynerlər oyun yaradıcılığında süni intellekt üzərində işləyirlər

AzMİU-da qonaq olan dizaynerlər oyun yaradıcılığında süni intellekt üzərində işləyirlər

“Dynamic Box”un həmtəsisçisi Yaqub Mehdiyev və "GameSummit"in nümayəndələri Azərbaycan Memarlıq və İnşaat Universitetinin (AzMİU) Dizayn fakültəsinin qonağı olub və dizayner tələbələrlə görüşüblər.  

Universitetdən “Azərbaycan müəllimi”nə bildirilib ki, Rəqəmsal İnkişaf və Nəqliyyat Nazirliyi yanında İnnovasiya və Rəqəmsal İnkişaf Agentliyinin dəstəyi ilə təşkil olunan görüşdə "Süni intellekt və oyun yaradıcılığı" mövzusunda maraqlı çıxışlar baş tutub.  

Görüş çərçivəsində spikerlər süni intellektin oyun sahəsində necə istifadə olunduğunu, rəssam və yaradıcıların müasir texnologiyadan necə faydalandıqlarını ətraflı şəkildə izah ediblər. 

Spikerlər ənənəvi yaradıcılıq metodları ilə süni intellekt alətlərinin sintezini və bu sahənin gələcəyinə dair perspektivləri diqqətə çatdırıblar. Süni intellektin oyun yaradıcılığında necə rol oynadığına dair misallar verərək bu texnologiyanın rəssamların və dizaynerlərin işlərini necə asanlaşdırdığını, sürətləndirdiyini və daha da zənginləşdirdiyini vurğulayıblar. Bununla yanaşı, müasir texnologiyaların, xüsusən də süni intellekt alətlərinin yaradıcı sahələrdə istifadəsinin müsbət və mənfi tərəfləri haqqında geniş müzakirələr aparıblar.

Görüşü təşkil edən Qrafik və media dizaynı kafedrasının müdiri dosent Təranə Bəkirova, baş müəllim Fəridə Qasımova və Dizayn fakültəsinin dekanı dosent Fərid Kərimov bu mövzuda geniş müzakirə və sual-cavab sessiyası təşkil ediblər. 

İştirakçılar süni intellektin oyun yaradıcılığı və qrafik dizayn kimi sahələrdə yeni imkanlar yaratdığı qənaətinə gəlsələr də texnologiyanın təbii yaradıcı proseslərə necə təsir edəcəyinə dair bəzi narahatlıqları da dilə gətiriblər. Görüşdə həmçinin süni intellektin yeni dövrün tələblərinə uyğun yaradıcı potensialı artırma və yeni texnoloji həllər tapma istiqamətində mühüm rol oynayacağı vurğulanıb. 

Tələbələr süni intellektin yaradıcı sahələrə inteqrasiyasını və gələcəkdə bu texnologiyanın tətbiqinin necə inkişaf edəcəyini maraqla izləyərək suallar verib, onun yaradıcılığa təsiri ilə bağlı fikirlərini paylaşıblar. 

Bu görüş dizayn və yaradıcı sahələrdə süni intellektin istifadəsinin əhəmiyyətini və gələcəkdə bizə hansı yenilikləri gətirəcəyini daha da aydınlaşdırmağa kömək edib.