Bakı Avrasiya Universitetinin magistrant və doktorantları üçün MEK-də açıq dərs keçirilib

Bakı Avrasiya Universitetinin magistrant və doktorantları üçün MEK-də açıq dərs keçirilib

Bakı Avrasiya Universitetinin magistrant və doktorantları elmi-tədqiqat təcrübəsi çərçivəsində bir günlük açıq dərslərini Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) keçiblər.

Magistrant və doktorantlar öz dissertasiya mövzuları üzrə MEK-in elektron və ənənəvi kataloqlarında axtarış aparıb, zəngin kitab fondu ilə yaxından tanış olublar. Onlar kitabxananın informasiya bazalarından yararlanaraq elmi araşdırmaları üçün vacib mənbələr əldə ediblər.

MEK-in direktoru texnika elmləri doktoru Hüseyn Hüseynov magistrant və doktorantlarla görüşərək kitabxananın elmi tədqiqatçılar üçün yaratdığı imkanlardan danışıb. Direktor MEK-in zəngin fondlarının, nadir kitablar və arxiv materialları da daxil olmaqla, müxtəlif elm sahələri üzrə geniş resurslara malik olduğunu vurğulayıb. H.Hüseynov magistrantlara tədqiqat prosesində bu resurslardan səmərəli istifadəni tövsiyə edib və kitabxananın elmi fəaliyyətə daim dəstək göstərdiyini bildirib.

Açıq dərsin sonunda Bakı Avrasiya Universitetinin Azərbaycan və Dünya ədəbiyyatı kafedrasının müdiri filologiya elmləri doktoru Elmira Məmmədova müəllifi olduğu "Ekopoetika və Kıbrıs Türk şeiri" adlı kitabını MEK-ə hədiyyə edib.

Qeyd edək ki, magistrant və doktorantların MEK-də açıq dərsə cəlb edilmələri onların araşdırmalarına dəstək olmaq, elmi biliklərini genişləndirmək və informasiya resursları ilə işləmə bacarıqlarını artırmaq məqsədi daşıyır.