COP29 başlayır: Bakı dünya liderlərini iqlim dəyişikliyi ilə mübarizəyə çağırır

COP29 başlayır: Bakı dünya liderlərini iqlim dəyişikliyi ilə mübarizəyə çağırır

Bu gün Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) başlayır.

"Azərbaycan müəllimi" xəbər verir ki, 11-22 noyabr tarixlərində keçiriləcək bu mötəbər tədbirə COP28 zamanı qəbul edilən qərara əsasən, Azərbaycan ev sahibliyi edir.

Bakı Olimpiya Stadionunda baş tutan COP29 Azərbaycanın indiyə qədər təşkil etdiyi ən böyük tədbirlərdən biridir və regionda ilk dəfə təşkil olunur.

COP29 çərçivəsində iqlim dəyişikliyi ilə mübarizə və adaptasiya məsələləri ətrafında geniş müzakirələr və tədbirlər nəzərdə tutulub.

Əsas tədbirlərdən biri olaraq noyabrın 12-13-də Dünya Liderlərinin İqlim Fəaliyyəti Sammiti baş tutacaq. Sammitdə 80-dən çox dövlət və hökumət başçısı iştirak edərək, iqlim dəyişikliklərinə qarşı mübarizə ilə bağlı fikirlərini bildirəcək, milli bəyanatlar verəcəklər.

Yüksək səviyyəli sessiyalarda iqlim maliyyəsi, adaptasiya və davamlı gələcək məsələləri müzakirə olunacaq.

Xatırladaq ki, COP29-un məqsədi qlobal iqlim dəyişikliklərinə qarşı səyləri gücləndirmək, tərəf dövlətlərin əməkdaşlığını və milli tədbirləri inkişaf etdirməkdir.

Konfrans iqlim fəaliyyətinə dair ambisiyaların artırılması və tədbirlərin icrasının təkmilləşdirilməsi üçün platforma rolunu oynayır. Gözləntilər arasında iqlim maliyyəsi üzrə ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılması və xüsusilə inkişaf etməkdə olan ölkələr üçün maliyyə dəstəyinin artırılması yer alır.

COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqələri gücləndirmək üçün yaşıl enerji dəhlizləri, təmiz hidrogen, metanın azaldılması və yaşıl rəqəmsal fəaliyyət daxil olmaqla 14 təşəbbüs təqdim edilib. Bu təşəbbüslərdən biri olaraq, iqlim maliyyəsi üzrə fəaliyyət fondunun yaradılması da nəzərdə tutulub.

Azərbaycanın bu tədbirə ev sahibliyi etməsi ölkənin ətraf mühitin qorunması və iqlim dəyişikliyi ilə mübarizədə beynəlxalq əməkdaşlığa verdiyi əhəmiyyətin göstəricisidir.