Rəqəmsal məktəb: Müasir təhsilin sərhədsiz imkanları

Rəqəmsal məktəb: Müasir təhsilin sərhədsiz imkanları

Müasir təlim texnologiyalarının tədris prosesinə inteqrasiyasını təmin etmək, təhsilin əlçatanlığını artırmaq, müəllim-şagird-valideyn əməkdaşlığını genişləndirmək məqsədilə “Rəqəmsal məktəb” adlanan milli onlayn təhsil platforması fəaliyyətə başlayıb. Platforma ilkin mərhələdə yalnız Bakı şəhərindəki ümumi təhsil müəssisələrində test rejimində tətbiq edilir. Platformadakı “Şagird”, “Valideyn”, “Müəllim” və “Məktəb rəhbəri” fərdi kabinetləri təhsil prosesinin iştirakçısı olan bütün tərəflərin ondan istifadəsinə imkan yaradır.

“Platforma valideynlərin idarəetmədə daha yaxından iştirakına imkan verəcək”

"Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz “Azərbaycan müəllimi”nə açıqlamasında “Rəqəmsal məktəb”i təhsil sahəsinin ən əhəmiyyətli platformalarından biri kimi dəyərləndirib: 

“Bu platforma istifadə baxımından daha effektiv və çevikdir. Təhsil sistemini idarəedənlər bu platforma vasitəsilə idarəçiliklərini daha da gücləndirəcəklər. Valideynlərin məktəblə əlaqəsi artıq bu platforma üzərində qurulacaq. Valideyn ondan istifadə edərək məktəbin təhsil mühitinin idarəolunmasında daha yaxından iştirak edəcək. Məlumdur ki, bir çox valideynlər işləyirlər. İş yükləri çox olan valideynlər məktəblə sıx əlaqə qura bilmirlər. Buna görə də övladının təhsil fəaliyyətindən az məlumatlı olurlar. Bu tətbiq imkan verir ki, valideyn telefonundan istifadə edərək platformaya daxil olsun və məktəb rəhbəri ilə əlaqə saxlasın, uşağının nəticələrinə baxsın, onun davranışını nəzarətdə saxlasın. Bu, çox vacib məsələdir. Eyni zamanda, platforma valideynlərin məktəbin idarəedilməsində daha yaxından iştirakına imkan verəcək. Bu baxımdan “Rəqəmsal məktəb” mühüm əhəmiyyət kəsb edir”.

“Məktəblərin idarə olunması daha sistemli və şəffaf olacaq”

Osman Gündüzün sözlərinə görə, bu platforma müəllim-direktor münasibətlərinin möhkəmlənməsində, direktorun fəaliyyətinin təkmilləşməsində, digər qurumlarla əlaqəsinin daha effektiv qurulmasında xeyli əhəmiyyət kəsb edəcək: “Bu platformalar vasitəsilə məktəblərin idarə olunması daha sistemli və şəffaf olacaq. Platformada bütün statistik göstəricilər, şagirdlərin davamiyyəti, tədris vəziyyətləri, qiymətləri görünəcək. Hesab edirəm ki, rəqəmsal təhsil platforması uğurlu layihədir. Təkcə Bakı məktəblərində deyil, region məktəblərində də bunun tətbiqi istiqamətində addımların atılması düzgün olar”. 

Osman Gündüz vurğulayıb ki, sistemin istifadəsi üçün xüsusi bacarıq tələb olunmadığından istənilən valideyn mobil tətbiq vasitəsilə bu platformaya daxil ola bilər: 

“Demək olar ki, bir çox xidmətlər artıq onlayn platformalar üzərindən aparılır. İnsanlar telefon vasitəsilə bütün xidmətlərdən onlayn yararlana bilirlərsə, bu xidmətdən də problemsiz istifadə edəcəklər. “Rəqəmsal məktəb” platformasından effektiv və çevik istifadə üçün təlimat materialları yerləşdirilib. Bu materiallara nəzər salan istənilən şəxs ondan effektiv istifadə edə bilər. Regionlarda platformanın tətbiqindən əvvəl rəqəmsal məsələlərə diqqət yetirmək, bununla bağlı daha asan qavranılacaq materiallar hazırlamaq ondan istifadəni rahatlaşdıra bilər. Ümumiyyətlə, bu tətbiqdən istifadə bütün tərəflərə fayda verəcək. Burada şagirdlərin tədris resurslarına çıxışı da təmin edilir. Bunun hesabına onların bu resurslara əlçatanlığı daha da artacaq. Bununla da şagirdin müəllimlə əlaqələri güclənəcək. Düşünürəm ki, bunun ən böyük səmərəsi valideynlər üçündür. Bu, valideyn üçün əla bir rəqəmsal alətdir ki, övladının məktəblə bağlı fəaliyyətinə nəzarət etsin və məktəblə əlaqəni daha da gücləndirsin. Sadəcə, bir mesajla valideyn məktəb rəhbərliyi ilə əlaqə yaradacaq, vəziyyətlə bağlı məlumatlı olacaq. Buna görə də bu platformanın bütün tərəflər üçün faydalılıq əmsalı çoxdur”.

“Övladlarımın dərs davamiyyəti, qiymətləndirilməsi ilə bağlı məlumatlar ala bilirəm”

Valideynlər də “Rəqəmsal məktəb” platformasından faydalandıqlarını dilə gətirirlər. Yeniliklərə açıq olan valideynlərdən biri Xanım Babayevadır. 2 övlad anası X.Babayevanın bu platforma ilə 1 və 11-ci siniflərdə təhsil alan uşaqlarının sinif rəhbərlərinin təşəbbüsü ilə tanış olub: 

“Mən “SIMA” tətbiqi üzərindən keçid edərək hər iki övladıma görə şifrə təyin etdim. Övladlarım Bakı şəhəri 71 nömrəli tam orta məktəbdə təhsil alırlar. Əvvəllər məktəblə əlaqə saxlamaqda çox çətinlik çəkirdim. Daha doğrusu, vaxt məhdudiyyəti ilə əlaqədar əməkdaşlıq yaratmaq çətin idi. Bu tətbiq çox işlərdə mənə kömək oldu. Tətbiqə daxil olaraq övladlarımın dərsə davamiyyəti, biliklərinin qiymətləndirilməsi ilə bağlı məlumatlar ala bilirəm. Daha interaktiv və əlçatan bir platformada iki məqam daha çox diqqətimi çəkdi. Birbaşa məktəb direktoru ilə əlaqə saxlamaqla istədiyim məlumatları əldə etmək və ona fikrimi bildirmək imkanım yaranıb. 2-ci maraqlı məqam isə məktəbin sorğusunda iştirak edə bilməyimdir. Platformaya keçid edərək şagirdlərin dərs prosesində iştirakı, onların fəaliyyəti və müəllim-şagird münasibətləri kimi məsələlərlə bağlı fikrimi bildirirəm”.