İstedadını böyük səhnədə təsdiqlədənlər - Festival qalibləri ilə söhbət

İstedadını böyük səhnədə təsdiqlədənlər - Festival qalibləri ilə söhbət

“Azərbaycan müəllimi” Uşaq İncəsənət Festivalı qaliblərini oxucuları ilə tanış etməyə, onların tövsiyələrini festivalın builki iştirakçılarına çatdırmağa davam edir. 

“Ən böyük xəyalım ölkəmizin mədəniyyətində silinməz izlər buraxacaq musiqiçi olmaqdır”

Bakı şəhəri 63 nömrəli tam orta məktəbin 6-cı sinif şagirdi Məryam Baratzadə 2013-cü ildə paytaxtda anadan olub. Məryamın sözlərinə görə, nail olduğu bütün uğurlarında ailəsinin rolu danılmazdır: “Ailəmin sənətə olan qayğısını, musiqi sevgisini kiçik yaşlarımdan hiss edirdim və bu, məndə musiqiyə heyranlıq oyandırdı. Həm böyüklərimin, həmçinin bacımın və qardaşımın istedadlı addımları mənə həmişə uğurlu örnək olub”.

34 nömrəli Uşaq Musiqi Məktəbində təhsil alan istedadlı məktəblimiz qeyd edir ki, müəllimi Aygün Ələkbərovanın rəhbərliyi altında pianino ifaçılığı üzrə ümumi olaraq 20-yə qədər mükafata layiq görülüb. Onların arasında 2024 və 2025-ci illərdə Qazaxıstanda keçirilən 3-cü Beynəlxalq piano müsabiqələrində 1-ci yer və “Qran Pri” mükafatı sahibi, 2024-cü ildə Qara Qarayev adına VI Respublika Elmi-İfaçılıq müsabiqəsinin diplomantı, 2023-cü ildə Ümummilli Lider Heydər Əliyevin 100 illik yubileyinə həsr edilən I Uşaq İncəsənət Festivalında “peşəkar” kateqoriyası üzrə 1-ci yerin sahibi, 2022 və 2023-cü illərdə Rəşid Behbudov adına Azərbaycan Dövlət Mahnı Teatrında keçirilən “Payız əfsanələri” müsabiqəslərində “Laureat” və 1-ci yerin sahibi olub.

“Uşaq İncəsənət Festivalı–2025”də iştirak edəcək şagirdlərə öncə uğurlar arzulayan Məryam vurğulayır ki, ölkəmizdə musiqinin inkişafı üçün atılan addımlar, istedadlı uşaqların aşkara çıxarmasına imkan yaradan müsabiqələrin keçirilməsi onu olduqca sevindirir: “Bu cür festivalların istedadlı şagirdlərin arzularına doğru irəliləməsinə, ölkəmizin musiqisinin inkişafına çox böyük töhfə verəcəyinə əminəm”. Yeni iştirakçılara tövsiyəsində festival qalibi özünəinamın və öz üzərində çalışmağın çox önəmli olduğuna diqqət çəkir. O deyir: “Ən böyük xəyalım ölkəmizin mədəniyyətində silinməz izlər buraxacaq musiqiçi olmaqdır. Bu yolda özümü daim inkişaf etdirəcəm, yeni uğurlara doğru irəliləyəcəm”.   

“Səhnəyə çıxarkən həyəcanı arxa plana atıb çıxışınızdan zövq almağa çalışın”

Zirvə Liseyinin 6-cı sinf şagirdi Məsuməmələk Talıblı 2013-cü il təvəllüdlüdür: “Müəllimim Fəridə Kərimova mehriban və gözəl xasiyyəti ilə məni musiqiyə daha da bağladı. Biz dərslərimizi əylənərək keçirdik. Mənim pianino ifaçılığına olan marağım ailəmizdəki musiqi mühitindən qaynaqlanır. Ailə üzvlərimiz musiqiyə yaxın olduqları üçün bu istiqamətə marağım erkən yaşlarda formalaşıb. 7 yaşımdan pianoda ifa etməyə başladım və həmin vaxtdan musiqi həyatımın ayrılmaz hissəsinə çevrildi”.

2023-cü ildə Ümummilli Lider Heydər Əliyevin anadan olmasının 100 illik yubileyinə həsr edilən I Uşaq İncəsənət Festivalında “həvəskar” kateqoriyası üzrə 1-ci yerə layiq görüldüyünü diqqətə çatdıran Məsuməmələk söyləyir ki, bu mükafat onun üçün böyük fəxr və motivasiya mənbəyidir: “UİF-də iştirak etmək qərarını musiqiyə olan sevgim və özümü inkişaf etdirmək arzusu ilə verdim. Ailəmin dəstəyi və müəllimlərimin tövsiyəsi bu qərarı verməyimdə böyük rol oynadı. Festivalın mənə yeni təcrübələr qazandıracağını və öz ifamı daha geniş auditoriya ilə bölüşmək imkanı yaradacağını düşündüm. Festival mənim üçün unudulmaz təcrübə oldu. Orada rəssamlıq, musiqi, rəqs, heykəltaraşlıq kimi müxtəlif incəsənət növləri təqdim olunurdu. Səhnəyə çıxmaq, öz ifamı paylaşmaq çox həyəcanlı idi, amma eyni zamanda çox böyük zövq aldım. Qalib  olduğumu öyrəndiyim o an isə sevincim hədsiz idi. Bütün zəhmətimin nəticəsini görmək və belə bir mühitdə mükafat qazanmaq mənim üçün çox böyük motivasiya oldu”.

Musiqi sayəsində daha diqqətli, səbirli və intizamlı olmağı öyrənən məktəbli dərslərinə məsuliyyətlə yanaşır, yüksək nəticələr əldə etməyə çalışır. Gələcəkdə musiqi sahəsində daha da inkişaf etmək, böyük səhnələrdə çıxış etmək arzusundadır. Qalib olaraq bu il keçiriləcək “UİF-2025”də iştirak edəcək şagirdlərə tövsiyəsi belədir: “Hər kəs öz sənətinə ürəkdən bağlı olsun və məşqlər zamanı əsla yorulmasın. Festivalın əsas məqsədi sadəcə qalib olmaq deyil, özünüzü ifadə etmək və sənətə olan sevginizi paylaşmaqdır. Səhnəyə çıxarkən həyəcanı arxa plana atıb musiqinizdən və ya çıxışınızdan zövq almağa çalışın. Əgər əziyyət çəkib inamla çalışsanız, uğur mütləq sizi tapacaq”.

“Bu qalibiyyət mənə yeni naliyyətlər qazanmaq üçün bir təkan oldu”

Malik Qədimzadə 2009-cu ildə Bakı şəhərində doğulub, 67 nömrəli tam orta məktəbin 10-cu sinfində oxuyur. Eyni zamanda, Qara Qarayev adına Mərkəzi İncəsənət Məktəbində Nigar Məlikovanın sinfində musiqi təhsili alır. 9 yaşından pianinoda ifa etdiyini bildirən Malik qalib olduğu müsabiqələr barədə məlumat verir: 

“2025-ci ildə Bakıda keçirilən 3-cü Beynəlxalq “Grand Piano” müsabiqəsində 14-16 yaş kateqoriyası üzrə “Grand Diplom” mükafatına, 2024-cü ildə Bakıda VII Beynəlxalq “World Harmony” müsabiqəsində 2-ci, “VIVA AZERBAIJAN” Beynəlxalq incəsənət müsabiqə-festivalında 15-18 yaş kateqoriyasında “Qran Pri” mükafatına, 2023-cü ildə IX Beynəlxalq “Astana Children’s Festival” müsabiqəsində 11-13 yaş kateqoriyasında fortepiano üzrə “Qran Pri” mukafatına, Ümumilli Lider Heydər Əliyevin anadan olmasının 100 illik yubileyi çərçivəsində Mədəniyyət Nazirliyi, Heydər Əliyev Mərkəzi və Elm və Təhsil Nazirliyinin birgə təşkil etdiyi I Uşaq İncəsənət Festivalında 10-13 yaş kateqoriyasında “Piano ifaçılığı” nominasiyası üzrə “pəşəkar” kateqoriyasında 2-ci yerə layiq görülmüşəm. Mən bu festivalda müəllimimin tövsiyəsi ilə iştirak etməyə qərar verdim. Festivaldan olan təəssüratlarım çox xoşdur. Festival 3 mərhələdən ibarət idi, seçimlərə çox ciddi yanaşılırdı. Qalibiyyəti əldə edərkən çox böyuk sevinc hissi keçirdim. Bu qalibiyyət mənə yeni naliyyətlər qazanmaq üçün bir təkan oldu və öz ifama olan inamı daha çox yüksəltdi”.

Gənc pianoçu vurğulayır ki, təhsil onun üçün hər zaman ön planda olub: “Musiqi və akademik dərsləri balanslı şəkildə aparmağa çalışıram. Arzum musiqi faliyyətimdə növbəti uğurlara imza atmaq, tələbə adını qazanmaq və təhsilimi daha ali səviyyədə davam etdirməkdir. “UİF-2025”in yeni iştirakçılarına olan əsas tövsiyəm odur ki, məqsədlərinə doğru inamla və ruh yüksəkliyi ilə hərəkət etsinlər. Qalibiyyət çox böyük zəhmət tələb edir!”.