Həm rəssamdır, həm də tədqiqatla məşğul olur - Oğuz məktəblisinin uğuru

Həm rəssamdır, həm də tədqiqatla məşğul olur - Oğuz məktəblisinin uğuru

Oğuz şəhəri Emin Abdullayev adına 2 nömrəli İnternat tipli texniki və təbiət fənləri təmayüllü liseyin 9-cu sinif şagirdi Selcan Süleymanzadə “Sabahın alimləri” müsabiqəsində “Kimya” kateqoriyası üzrə təqdim etdiyi “Plastik tullantıların nanokatalizatorlar vasitəsilə təkrar emalı” layihəsi ilə 3-cü yerin qalibi olub.

“Məqsədim təhsilimi yüksək səviyyədə davam etdirmək, dövlətimizin xaricdə təhsil proqramına qoşulmaq, kimya və biologiya üzrə biliklərimi daha da genişləndirməkdir”, – deyə Selcan “Azərbaycan müəllimi”nə müsahibəsində bildirib.

O qeyd edib ki, “Plastik tullantıların nanokatalizatorlar vasitəsilə təkrar emalı” adlı layihənin əsas hədəfi plastik tullantıların təbii şəraitdə min illərlə sürən parçalanma prosesinə alternativ yanaşma ortaya qoymaqdır. 

Selcanın sözlərinə görə, plastik tullantıların ekoloji fəsadlarını azaltmaq üçün onların sürətli və səmərəli emal üsullarının tapılması vacibdir. Bu məqsədlə o, nanokatalizatorlar vasitəsilə polimer tullantıların parçalanmasını sürətləndirməyi, eləcə də yenidən istifadə oluna bilən faydalı maddələr əldə etməyi qarşısına məqsəd qoyub.

Layihənin icrası zamanı aparılan tədqiqatlar göstərir ki, PET, polietilen, polipropilen kimi müxtəlif növ plastiklər inert qaz mühitində, müəyyən temperatur və vaxt çərçivəsində yüksək çevrilmə dərəcəsi ilə emal oluna bilər. Eyni zamanda, katalizatorların təkrar istifadə üçün əlverişli qalması prosesin rentabelliyini artırır.

Layihənin elmi rəhbəri, kimya müəllimi Gülnar Kərimli Selcanın elmi-tədqiqat fəaliyyətində yüksək potensiala sahib olduğunu vurğulayır:

“Şagirdimiz layihə müddətində ardıcıl şəkildə tədqiqat metodlarını öyrənib, laborator analizlər aparıb və ortaya ciddi nəticələr qoyub. Onun bu istedadı kimya və biologiya sahəsində daha dərin araşdırmalar aparmasına imkan verəcək”.

Selcan qeyd edir ki, biologiya fənni üzrə builki Respublika fənn olimpiadasının final mərhələsinə vəsiqə qazanıb və qalib olmaq üçün var gücü ilə çalışır. O, həmçinin 2023-cü ildə “Kenquru (KGL)” ingilis dili olimpiadasında iştirak edərək B1 səviyyəsi üzrə rəsmi sertifikat əldə edib, Fərqli layihələrə qatılmağı sevən Selcan 2023-cü ildə keçirilmiş “Korrupsiyaya yox deyək” adlı rəsm müsabiqəsinin də qalibidir. O, gələcək planlarından  danışarkən ali təhsili xaricdə davam etdirmək və kimya-biologiya sahəsində  biliklərini dərinləşdirərək daha böyük nailiyyətlər qazanmaq istədiyini açıqlayıb.

Selcan “Sabahın alimləri”ndə qazandığı təcrübənin onun elmi araşdırmalara olan marağını daha da artırdığını qeyd edir.