Aprel döyüşlərindən Böyük Zəfərə

Aprel döyüşlərindən Böyük Zəfərə

Azərbaycan müasir tarixi inkişafının şanlı səhifələrini yaşayır. Artıq ikinci ildir ki, Aprel döyüşlərinin növbəti ildönümünü müdrik siyasətçi, müzəffər Ali Baş Komandan Prezident İlham Əliyevin rəhbərliyi ilə dövlət suverenliyinin tam bərqərar olunduğu bir dövrdə böyük qürur hissi ilə qeyd edirik.

Doqquz il əvvəl, 2016-cı il aprelin ilk günlərində Azərbaycanın işğal edilmiş torpaqlarında qoşunların təmas xəttində atəşkəs pozuldu. Atəşkəsin imzalandığı 24 il ərzində atışmalar baş versə də, gərginlik bu səviyyəyə çatmamışdı. Ermənistan silahlı birləşmələrinin martın sonlarında ordumuzun mövqelərinə, kənd və qəsəbələrimizə, yaşayış məntəqələrimizə artilleriya silahlarından ağır zərbələr endirməsi cavabsız qala bilməzdi. 

Ermənistan tərəfindən törədilən təxribata qəhrəman ordu hissələrimiz layiqli cavab verdi. Aprelin 1-5-də Azərbaycan ordusunun qəhrəmanlığı sayəsində 2 min hektara yaxın ərazimizin, o cümlədən strateji əhəmiyyət daşıyan Lələtəpə və Talış yüksəklikləri azad edildi. Nəticədə silahlı qüvvələrimiz on minlərlə hektar əraziyə nəzarət etmək imkanı qazandı, arxadakı ərazilərin təhlükəsizliyi təmin edildi, işğalçı ölkənin çoxsaylı təxribatçı qüvvələri zərərsizləşdirildi və hərbi texnikası məhv edildi.  

Qəhrəman Azərbaycan ordusunun zabit və əsgərləri Tərtər, Goranboy və Füzuli rayonları istiqamətində düşmənin atəşkəs dövründə işğal etdiyi ərazilərimizdə durmadan möhkəmləndirdiyi və keçilməz hesab etdiyi ön xətt mövqelərini qısa bir vaxtda yardı və erməni hərbi birləşmələrini qaçmağa vadar etdi.  Bu döyüşlərdə Azərbaycanın zabit, gizir və əsgərləri əsl cəsarət və igidlik nümunələri göstərdilər. Zabit və əsgərlərimizin hər biri cəbhədə, sözün həqiqi mənasında, mətanət, dözümlülük, qələbə əzmi nümayiş etdirdi.

Şanlı Aprel zəfəri günlərində Azərbaycan zabitləri əsl fədakarlıq göstərərək şəxsi heyətə nümunə olmağı, döyüşçülərdə ordumuzun gücünə inam aşılamağı, onları qələbəyə aparmağı bacardılar. Aprel döyüşləri neçə-neçə qəhrəman, cəsur komandir və əsgərlərimizi üzə çıxardı. Onların Aprel zəfərində qəhrəmanlıq göstərərək qələbənin əldə olunmasında zəhmətləri böyük idi. Cəmi bir neçə gün davam edən edən döyüşlərdə şücaət və fədakarlıq göstərən qəhrəman oğullar dövlətimiz tərəfindən yüksək mükafatlara layiq görüldü, zabit və əsgərlərimizin fədakarlığı, mətinliyi ordumuzun real gücündən, yüksək döyüş ruhundan, sarsılmaz iradəsini bariz nümayiş etdirdi. Bu qələbə xalqın inamını özünə qaytardı, ordumuzun gücünü göstərdi, gələcək hərbi uğurların və 44 günlük Vətən müharibəsində böyük zəfərin ilk müjdəçisi oldu.

Aprel qələbəsi bir daha göstərdi ki, Azərbaycan dövləti və milləti öz ərazilərinin işğal altında qalması ilə barışmayacaq, düşmənə layiq olduğu cavabı verəcək və nəyin bahasına olursa-olsun torpaqlarını düşmən tapdağından azad edəcək. Buna qadirdir. Aprel döyüşləri bir daha göstərdi ki, Azərbaycan ərazilərinin işğal altında qalması müvəqqətidir, işğala son qoyulacaqdır, ordumuz bu vəzifəni yerinə yetirməyə qadirdir. Qələbə Azərbaycan əsgər və zabitinin döyüş ruhunun yüksəkliyini və qəhrəmanlığını göstərdi. Azərbaycan əsgəri mərdliyini, mübarizliyini və döyüşkənliyini ortaya qoymaqla bir qəhrəmanlıq məktəbi yaratdı. 

Bu qəhrəmanlıq məktəbi uzaqgörən müdrik siyasəti və qətiyyətli iradəsi ilə 44 günlük Vətən müharibəsində qələbəni təmin etmiş Müzəffər Ali Baş Komandan İlham Əliyevin prezidentliyi dövründə formalaşmışdı. 
 
Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev Azərbaycan Ordusunun Aprel döyüşlərində qələbənin birinci ildönümü ilə əlaqədar bir qrup hərbçimizlə görüşərkən demişdi: "Aprel döyüşləri bizim şanlı hərbi qələbəmizdir, dövlətimizin, xalqımızın, ordumuzun gücünü göstərən qələbədir. Aprel döyüşləri nəticəsində Füzuli, Cəbrayıl və Ağdərə rayonlarının işğaldan azad edilmiş ərazilərində bu gün Azərbaycan bayrağı dalğalanır. Bu döyüşlər onu göstərir ki, Azərbaycan xalqı və dövləti heç vaxt işğalla barışmayacaq, öz ərazi bütövlüyünü nəyin bahasına olursa-olsun bərpa edəcəkdir. Həm peşəkarlıq, həm də vətənpərvərlik ruhu baxımından aprel döyüşləri bir daha göstərdi ki, Azərbaycan xalqı qəhrəman xalqdır. Bir daha onu göstərdi ki, biz bu vəziyyətlə barışmayacağıq. Onu göstərdi ki, xalq-iqtidar birliyi bu gün Azərbaycanda yüksək səviyyədə təmin olunur, möhkəmlənir. Ermənistan-Azərbaycan, Dağlıq Qarabağ münaqişəsinin həlli bizim üçün həmişə olduğu kimi birinci yerdə duran prioritet məsələdir”.

Dövlət başçımızın çıxışında səsləndirdiyi “Biz işğal edilmiş torpaqlara qayıdacağıq. Bu, bizim əsas vəzifəmizdir. Necə ki, keçən il azad edilmiş torpaqlarda bu gün bayrağımız dalğalanır, hələ də işğal altında olan bütün başqa torpaqlarımızda da Azərbaycan bayrağı qaldırılacaqdır” sözləri Aprel döyüşlərindən 4 il sonra 44 günlük Vətən müharibəsində öz təntənəsinə qovuşdu.

İkinci Qarabağ müharibəsində ərazi bütövlüyümüzün və dövlət suverenliyimizin tam bərqərar edilməsi ilə Aprel şəhidlərinin də ruhu şaddır.  

Təhsil Qarabağa qayıdır

Aprel döyüşlərinin ən böyük tarixi əhəmiyyəti bu qələbə sayəsində "Böyük qayıdış" prosesinə start verilməsi olub. “Böyük qayıdış”la yanaşı, işğaldan azad olunmuş kəndlərimizdə məktəb infrastukturunun bərpasına başlanılıb. İlk olaraq 2016-cı ilin aprel əməliyyatlarına qədər Ermənistan ordusunun işğalı altında olduğundan Cocuq Mərcanlı kəndində 150 şagird yeni məktəbin bünövrəsi qoyulub və tezliklə inşa olunaraq müəllim və şagirdlərtin istifadəsinə verilib. Heydər Əliyev Fondu tərəfindən Horadiz şəhərində 3 nömrəli tam orta məktəb inşa olunub. 

Aprel döyüşlərinin birinci ildönümündən sonrakı – 2017-2018-ci yeni tədris ilində ümumi təhsil müəssisələrində ilk dərslər “Cocuq Mərcanlı - tarixi qayıdışın başlanğıcı” mövzusuna həsr olunub.

Qeyd edək ki, 30 ilə yaxın davam etmiş işğal nəticəsində Qarabağda  təhsil müəssisələri tamamilə dağıdılıb. İşğaldan azad edilmiş ərazilərdə təhsil infrastrukturunun bərpası istiqamətində Prezident İlham Əliyevin müvafiq sərəncamları və tapşırıqları ilə hazırda mühüm və ardıcıl işlər görülür. “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na müvafiq olaraq yeni məktəb binalarının inşası, işğaldan azad olunmuş ərazilərimizə köçən şagirdlərin savadlı və bilikli yetişməsi məsələsinə Azərbaycan dövlətinin nə qədər həssaslıqla yanaşdığını aydın nümayiş etdirir.

Böyük Qayıdışa dair I Dövlət Proqramına uyğun olaraq işğaldan azad edilmiş ərazilərdə 960 şagird yerlik Şuşa şəhər 1 nömrəli, 132 şagird yerlik Xocalı şəhəri 1 nömrəli, 624 şagird yerlik Xankəndi şəhər 4 nömrəli, 132 şagird yerlik Laçın rayonu Sus kənd məktəbi, 960 şagird yerlik Cəbrayıl şəhərində akademik Mehdi Mehdizadə adına tam orta məktəbi, 460 şagird yerlik Xocalı rayonu Ballıca kənd məktəbi olmaqla ümumilikdə 6 məktəb istifadəyə verilib və fəaliyyətə başlayıb. Əvvəlki illərdə isə 960 şagird yerlik Füzuli şəhər 1 nömrəli, 510 şagird yerlik Laçın şəhər 2 nömrəli və 176 şagird yerlik Laçın rayonu Zabux kənd, 144 şagird yerlik Ağdərə rayonu Talış kənd və 360 şagird yerlik Zəngilan rayonu Ağalı kənd tam orta məktəbləri istifadəyə verilib. 

Bununla yanaşı, 50 yerlik Laçın rayonu Sus kənd körpələr evi-uşaq bağçası, 40 yerlik Xocalı rayonu 1 nömrəli körpələr evi-uşaq bağçası, 80 yerlik Xankəndi şəhər körpələr evi-uşaq bağçası olmaqla 3 məktəbəqədər təhsil müəssisəsi də istifadəyə verilib. Daha 3 məktəbin və 2 uşaq bağçasının istifadəyə verilməsi nəzərdə tutulur. 2 məktəbin və 3 uşaq bağçasının tikintisi isə davam edir.

Hazırda işğaldan azad olunmuş ərazilərdə 11 ümumi təhsil müəssisəsi fəaliyyət göstərir. Həmin təhsil müəssisələrində 2 minə yaxın şagird (məktəbəhazırlıqla birlikdə) təhsil alır, 270-dən çox təhsilverən çalışır. Ümumi təhsil müəssisələri ilə yanaşı cari tədris ilindən Xankəndidə Qarabağ Universiteti də fəaliyyətə başlayıb. 

Bütün bunlar Aprel döyüşlərində əldə olunan ilk qələbə və 44 günlük Vətən müharibəsinin yaratdığı reallıqlar kontekstində azad olunmuş ərazilərimizdə məktəb infrastukturunun bərpasına, təhsilin inkişafına yönəlik dövlət dəstəyinin, diqqət və qayğısının bariz nümunəsidir.