Eksternat imtahanları ilə bağlı ən çox verilən sualların CAVABLARI

Müxtəlif səbəblərdən ümumi orta və ya tam orta təhsil səviyyəsini başa vura bilməmiş şəxslər bu səviyyələr üzrə eksternat qaydada buraxılış imtahanı verib müvafiq təhsil sənədi ala bilərlər.

Cari ildə imtahan yerli təhsili idarəetmə orqanları tərəfindən 31 yanvar saat 11:00-da təşkil olunacaq.

"Azərbaycan müəllimi" eksternat imtahanları ilə bağlı ən çox verilən suallara cavabları təqdim edir:

– Sərbəst (eksternat) təhsilalma forması nədir?

Sərbəst (eksternat) təhsilalma forması müxtəlif səbəblərdən ümumi orta və ya tam orta təhsil səviyyəsini vaxtında tamamlaya bilməmiş şəxslərə həmin səviyyələr üzrə buraxılış imtahanı verərək müvafiq təhsil sənədi (attestat) almaq imkanı yaradan təhsil formasıdır.

– Aralıq imtahanlarının məzmunu necə müəyyən edilir?

İmtahanların məzmunu IX və XI siniflərin tədris planına uyğun şəkildə hazırlanır.

– İmtahan sualları hansı fənləri əhatə edir?
İmtahan sualları IX və XI siniflərin tədris planına uyğun olaraq aşağıdakı fənləri əhatə edir:
– tədris dili
– ədəbiyyat
– riyaziyyat
– informatika
– Azərbaycan tarixi
– ümumi tarix
– coğrafiya
– fizika
– xarici dil
– kimya
– biologiya

– İmtahan necə qiymətləndirilir?
Hər düzgün cavab 1 balla qiymətləndirilir.
Maksimal bal:
– Azərbaycan bölməsi – 110 bal
– Rus bölməsi – 120 bal

Səhv cavablar düzgün cavablara təsir etmir.

– İmtahan müddəti nə qədərdir?
Hər sual üçün 1.5 dəqiqə, ümumi müddət isə 180 dəqiqədir.

– Aralıq imtahanlarında uğur qazanan eksternləri nə gözləyir?

Aralıq imtahanlarından keçən şəxslər ümumi orta və ya tam orta təhsil haqqında sənəd almaq üçün buraxılış imtahanlarında iştirak etmək hüququ əldə edirlər.

– Attestat kim tərəfindən təqdim olunur?

Buraxılış imtahanlarında müsbət nəticə göstərən şəxslərə attestat onların siyahıya daxil edildiyi məktəb tərəfindən təqdim olunur.

– Eksternat imtahanında iştirak üçün yaş həddi varmı?

Ümumi orta təhsil səviyyəsi üzrə attestat almaq üçün müraciət edən şəxsin yaşı ən azı 16 olmalıdır.
Tam orta təhsil səviyyəsi üzrə attestat almaq üçün isə müraciət edən şəxsin yaşı 18-dən aşağı olmamalıdır.

– Eksternat imtahanında iştirak etmədən birbaşa attestat almaq mümkündürmü?

Müxtəlif səbəblərdən ümumi orta və ya tam orta təhsil səviyyəsini vaxtında başa vurmamış şəxslər attestat almaq üçün ilk növbədə eksternat (aralıq) imtahanlarında iştirak etməlidirlər.
Birbaşa attestat verilməsi mümkün deyil.

– Şəxsin təhsil aldığı müəssisə bağlanıb, attestatı yoxdur. Nə etməlidir?

Bu halda müvafiq Regional Təhsil İdarəsinə müraciət edilir. Məktəb bağlandıqdan sonra təhsil sənədlərinin hansı arxivdə saxlanıldığı barədə məlumat əldə olunur və attestatın verilməsi üçün müvafiq tədbirlər görülür.

– Məktəbi rayonda bitirənlər Bakıda imtahan verə bilərmi?

Əgər şəxsin qeydiyyatda olduğu və faktiki yaşadığı yer oxuduğu məktəbin yerləşdiyi regiondan fərqlidirsə, bu zaman yaşadığı ərazi üzrə arayış təqdim etməklə həmin regionun müəyyən etdiyi təhsil müəssisəsində imtahan verə bilər.