"Adaptasiya və ambisiya kimi təhsil - Ətraf mühit təhsilinə yeni yanaşma" mövzusunda tədbir keçirilib

"Adaptasiya və ambisiya kimi təhsil - Ətraf mühit təhsilinə yeni yanaşma" mövzusunda tədbir keçirilib

Bakıda keçirilən COP29 tədbiri çərçivəsində iqlim dəyişikliyinə qarşı mübarizədə təhsilin roluna dair yüksək səviyyəli görüş keçirilib.

“Azərbaycan müəllimi” xəbər verir ki, tədbirdə təhsilin davamlı inkişafı və ekoloji problemlərin həllindəki əhəmiyyəti müzakirə edilib.

Azərbaycanın elm və təhsil nazirinin müavini Həsən Həsənli çıxışında təhsilin iqlim dəyişikliyi ilə mübarizədə güclü bir vasitə olduğunu vurğulayıb:

“Məqsədimiz hər bir müəllimin sinifdə iqlim dəyişikliyi mövzusunu inamla tədris etmək üçün lazım olan bacarıq və resurslara sahib olmasını təmin etməkdir”.

Həsən Həsənli Azərbaycanın təhsil sistemində iqlim və ətraf mühit mövzularının inteqrasiyasına xüsusi diqqət yetirildiyini qeyd edib. STEAM təhsilinin uğurla tətbiq olunduğunu və şagirdlərin yaşıl enerji, dayanıqlılıq və texnologiyalarla bağlı layihələr üzərində işləməklə, özünəinam və ekoloji problemlərə həssaslıq qazandıqlarını bildirib:

“Bu il STEAM Azərbaycan Festivalını iqlim dəyişikliyinə həsr edərək ‘Yaşıl STEAM Festivalı’ adlandırdıq”.

Nazir müavini həmçinin ali təhsildə iqlim həllərinə dair tədqiqatların təşviq edildiyini və COP29 çərçivəsində dayanıqlılıq mövzusunda müzakirələrin davam etdiriləcəyini bildirib.

Qeyd edək ki, tədbirin məqsədi təhsil sahəsində beynəlxalq əməkdaşlıqla ətraf mühit təhsilini inkişaf etdirmək və iqlim gündəminə töhfə vermək olub.