Şagirdlər süni intellekt köməkçisi hazırlayıblar

Şagirdlər süni intellekt köməkçisi hazırlayıblar

“Sabahın alimləri” müsabiqəsində Şəki-Zaqatala Regional Təhsil İdarəsinin şagirdləri növbəti uğura imza atıblar. Onlar “ZERO” layihəsi ilə robototexnika və süni intellekt nominasiyası üzrə 3-cü yerə layiq görülüblər.

Şəki şəhər M.Füzuli adına 3 nömrəli tam orta məktəbin 11-ci sinif şagirdi Maarif Rəfili deyib ki, “ZERO” etik hakerlərin (pentesterlərin) fəaliyyətini avtomatlaşdırmaq üçün nəzərdə tutulmuş süni intellekt alətidir.

Onun sözlərinə görə, kibertəhlükəsizliyə dair tapşırıqları sürətləndirmək üçün süni intellekt texnologiyasından istifadə etmək qərarına gəliblər.

Layihənin həmmüəlliflərindən olan Emil Cabbarov Şəki şəhəri 8 nömrəli tam orta məktəbin 9-cu sinif şagirdidir. Emil layihənin bir illik gərgin zəhmətləri nəticəsində ərsəyə gəldiyini bildirib:

“Kibertəhlükəsizlik müasir dövrdə prioritet məsələlərdəndir, lakin bu istiqamətdə görülən işlər çox vaxt aparır. “ZERO” bizə sistem zəifliklərini tez aşkarlayıb sürətlə aradan qaldırmağa imkan verir”.

Şagirdlər qeyd edirlər ki, bu süni intellekt köməkçisi səsli əmrləri qəbul edir, aktiv hücum ssenarilərini həyata keçirə bilir və informasiya təhlükəsizliyi ilə bağlı suallara əhatəli cavablar vermək potensialına malikdir. Layihənin bütün texniki detalları ingilis dilində ayrıca linkdə paylaşılaraq beynəlxalq mütəxəssislərin də diqqətinə çatdırılıb: https://zrsecurity.com/

Layihənin elmi rəhbəri, riyaziyyat və informatika müəllimi İsrafilova Gülbəniz gənclərin böyük potensiala malik olduğunu vurğulayıb:

“Layihə onların tədqiqat bacarıqlarının və yaradıcılıqlarının bariz nümunəsidir. Bu layihə gələcəkdə daha da təkmilləşərək real sahələrdə tətbiq edilə bilər”. 

Onun fikrincə, bu cür uğurlar gənclərə stimul verərək Şəki-Zaqatala bölgəsində elm və innovasiyaya marağın daha da artmasına səbəb olacaq.

Hər iki şagird – Maarif və Emil kibertəhlükəsizlik sahəsində biliklərini daha da dərinləşdirməyi, “ZERO” kimi layihələri inkişaf etdirməyi və bu sahədə böyük uğurlara imza atmağı qarşılarına məqsəd qoyublar. Onlar bildirirlər ki, “Sabahın alimləri” müsabiqəsində qazandıqları 3-cü yer onların gələcəkdə daha çox araşdırma aparmasına və ölkəmizdə kibertəhlükəsizliyin inkişafına töhfə verməsinə böyük təkan verir.