PIRLS 2026 tədqiqatının sınaq mərhələsi başlayıb

PIRLS 2026 tədqiqatının sınaq mərhələsi başlayıb

3 aprel tarixindən etibarən Azərbaycanda dördüncü sinif şagirdlərinin oxuyub-anlama bacarığını qiymətləndirən Oxu Savadlılığının İnkişafı üzrə Beynəlxalq Qiymətləndirmə Tədqiqatının (PIRLS 2026) sınaq mərhələsinin keçirilməsinə başlanılıb.

“Azərbaycan müəllimi” xəbər verir ki, ölkəmizin 4-cü dəfə iştirak edəcəyi PIRLS tədqiqatı 2001-ci ildən etibarən hər 5 ildən bir həyata keçirilir. Bu tədqiqat dövründə Azərbaycanda PIRLS tədqiqatı üzrə ilk dəfə olaraq kompüter əsaslı imtahan təşkil edilir. Sınaq mərhələsində 800-dən çox şagird həm imtahan, həm sorğu mərhələsində, həmçinin valideynlər, direktorlar və müəllimlər də onlar üçün nəzərdə tutulmuş sorğu mərhələsində iştirak edəcəklər.

PIRLS 4-cü sinif şagirdlərinin oxuyub-anlama bacarığını iki istiqamət üzrə qiymətləndirir. Bunlardan biri şagirdlərin bədii oxu savadlılığı, digəri isə məlumatlardan istifadə etmək bacarığıdır. İmtahan müddətində şagirdlərin qarşısına platforma daxilində oxuduqları hekayələrə aid və platforma daxilində verilmiş müxtəlif veb-səhifələrə istinad etməklə cavablandırılması tələb olunan suallar çıxacaq.

Qeyd edək ki, PIRLS 2026 beynəlxalq qiymətləndirmə tədqiqatı Təhsil Nailiyyətlərinin Qiymətləndirilməsi üzrə Beynəlxalq Assosiasiya tərəfindən təşkil edilir və Azərbaycanda Elm və Təhsil Nazirliyi, Təhsil İnstitutu tərəfindən həyata keçirilir. Tədqiqatın əsas mərhələsinin 2026-cı ilin aprel-may aylarında keçirilməsi nəzərdə tutulur.