Xaricdə hüquq təhsili almış 113 nəfərdən yalnız 15-nin diplomu tanınıb

Yanvarın 30-da keçirilmiş peşə tanınması imtahanında “hüquqşünaslıq” ixtisası üzrə iştirak edən 113 nəfərdən yalnız 15 nəfəri uğurlu nəticə əldə edib.

Bu barədə "Azərbaycan müəllimi"nə Təhsildə Keyfiyyyət Təminatı Agentliyindən məlumat verilib.

Qeyd olunub ki. uğursuz nəticə əldə etmiş kvalifikasiya sahibləri əsasən 2 ölkənin ali təhsil müəssisələrinin payına düşür.

Belə ki, “hüquqşünaslıq” ixtisası üzrə Ukrayna ali təhsil müəssisələrindən əldə edilmiş kvalifikasiyalar üzrə peşə tanınması üçün müraciət etmiş namizədlərin 94% (64 nəfərdən 4 nəfər uğurlu nəticə əldə edib), Rusiya Federasiyasının ali təhsil müəssisələrindən əldə edilmiş kvalifikasiyalar üzrə peşə tanınması üçün müraciət etmiş namizədlərin 84% (38 nəfərdən 6 nəfər uğurlu nəticə əldə edib) müvafiq imtahanda uğursuz olub.

Ukrayna üzrə ən çox imtina Xarkov Milli Daxili İşlər Universiteti, Y.Mudrıy adına Milli Hüquq Universiteti, T.Şevçenko adına Kiyev Milli Universiteti, Rusiya Federasiyası üzrə ən çox imtinanı Dağıstan Dövlət Universiteti, Moskva Müasir Akademik Təhsil İnstitutu və Saratov Dövlət Hüquq Akademiyası məzunlarına aid olub.