Valideynsiz uşaqlara sosial dəstək gücləndirilir: Məktəbi bitirənlər müavinət alacaqlar

Valideynsiz uşaqlara sosial dəstək gücləndirilir: Məktəbi bitirənlər müavinət alacaqlar



Valideynsiz uşaqlara sosial dəstək gücləndirilir: Məktəbi bitirənlər müavinət alacaqlar

“Valideynlərini itirmiş və valideyn himayəsindən məhrum olan uşaqlara göstərilən dəstəyin məqsədi onlara məktəbi bitirdikdən sonra iş tapana qədər sosial-məişət problemlərini həll edə bilmələrinə kömək etməkdir. Bundan əlavə, qanuna edilən əvvəlki dəyişikliklərə əsasən, bu uşaqlara ilk dəfə əmək fəaliyyətinə başlayarkən 6 min manat məbləğində birdəfəlik müavinətin verilməsi nəzərdə tutulur. Bu vəsait onların iş həyatına addım atdığı ilk dövrdə ev kirayəsi, məişət əşyalarının alınması və digər vacib ehtiyaclarını qarşılamağa imkan verir”.

Bu fikirləri “Azərbaycan müəllimi”nə “Valideynlərini itirmiş və valideyn himayəsindən məhrum olan uşaqların sosial müdafiəsi haqqında” qanuna edilmiş son dəyişikliyə münasibət bildirən Milli Məclisin Əmək və sosial siyasət komitəsinin sədri Musa Quliyev deyib.

 

O bildirib ki, valideynlərini itirmiş və valideyn himayəsindən məhrum olan uşaqlara dövlət tərəfindən yüksək səviyyədə qayğı göstərilir. Bu məsələ Azərbaycan Respublikasının Birinci vitse-prezidenti Mehriban Əliyevanın daim diqqət mərkəzindədir: “Son dəyişikliklər “Valideynlərini itirmiş və valideyn himayəsindən məhrum olan uşaqların sosial müdafiəsi haqqında” qanunda bu kateqoriyaya aid uşaqların sosial təminatını daha da gücləndirir. Əvvəllər onlar ümumi, orta ixtisas, peşə və ali məktəbi bitirdikdə birdəfəlik müavinət və mövsümi geyim yardımı alırdılar. Lakin yeni dəyişikliklərə əsasən, onlara daha konkret məbləğdə birdəfəlik pul vəsaiti veriləcək. Bu məbləğ indiyə qədər olan yardımın təxminən iki qatına yüksəldilərək ən azı 2 min manat təşkil edəcək. Beləliklə, valideynlərini itirmiş və valideyn himayəsindən məhrum uşaqlara orta məktəbi, yaxud texniki-peşə məktəbini bitirərkən 2 min manat, işə qəbul olarkən 6 min manat birdəfəlik müavinətin ödənilməsi nəzərdə tutulur”.

Millət vəkili qeyd edib ki, peşə və ya ali təhsil alan uşaqlar üçün isə əlavə dəstək tədbirləri mövcuddur: “Belə ki, onlar oxuduqları müddətdə adi tələbə təqaüdünün iki misli qədər təqaüd alır, dərs ləvazimatları və geyimlə pulsuz təmin olunurlar. Bu da onların sosial müdafiəsinə yönəlmiş əlavə dəstək mexanizmidir. Bununla yanaşı, uşaq evlərini tərk edənlər Mehriban Əliyevanın göstərişi ilə yataqxana və ya onlar üçün nəzərdə tutulmuş mənzillərlə təmin olunurlar. Həmçinin onların işlə təmin olunması kvota sistemi əsasında həyata keçirilir. Belə ki, bu dəyişikliklər valideyn himayəsindən məhrum uşaqların cəmiyyətə daha rahat inteqrasiya olunmasına və müstəqil həyata uğurla başlamalarına mühüm töhfə verir”.

“Maddi dəstəyin göstərilməsi uşaqlara təhsillərini davam etdirməsinə və uğurlu karyera qurmasına imkan yaradacaq”

Məsələ ilə bağlı Elm və Təhsil Nazirliyi yanında İctimai Şuranın üzvü Kəmalə Aşumova “Azərbaycan müəllimi”nə bildirib ki, valideynlərini itirmiş və himayəsiz qalan uşaqlar müstəqil həyata keçid zamanı bir sıra çətinliklərlə üzləşirlər: “Onların əsas problemlərindən biri gələcək təhsilləri və karyeraları ilə bağlı motivasiyanın çatışmazlığıdır. Yeni qanun dəyişikliyi məhz bu məsələnin həllinə yönəlib. Həmin uşaqlara maddi dəstəyin göstərilməsi onların təhsillərini davam etdirməsinə və gələcəkdə uğurlu karyera qurmasına imkan yaradacaq”.

 

K.Aşumova vurğulayıb ki, bu yardım təkcə maddi dəstək kimi deyil, həm də dövlətin həmin gənclərə göstərdiyi diqqət və qayğının göstəricisi kimi qiymətləndirilməlidir. O, qanunla valideyn himayəsindən məhrum olan gənclərin ümumi, peşə və ali təhsili başa vurduqdan sonra birdəfəlik müavinət alacaqlarını və bu vəsaitin onlara müstəqil həyata başlamaq, məişət qayğılarını azaltmaq və əlavə təhsil almağa kömək edəcəyini deyib.

Şura üzvü qeyd edib ki, valideynsiz böyüyən gənclər təhsilini başa vurduqdan sonra maddi çətinliklərlə üzləşir və bəziləri bu səbəbdən təhsillərini davam etdirə bilmirlər: “Yeni sosial müavinət həmin dövrün daha rahat keçməsinə şərait yaradacaq və bu gəncləri motivasiya edəcək. Əvvəllər onlar gələcəkləri ilə bağlı qeyri-müəyyənlik hiss edir, təhsillərini davam etdirməkdə tərəddüd edirdilər. Lakin dövlətin göstərdiyi bu dəstək onların təhsili yarımçıq qoymamasına və inkişaf etməsinə stimul verəcək. Belə ki, qanunun məqsədi cəmiyyətdə sosial bərabərliyi təmin etmək və hər bir uşağa bərabər təhsil imkanları yaratmaqdır. Dövlət bu qanun vasitəsilə valideyn himayəsindən məhrum uşaqların tək olmadığını və onların gələcəyi üçün məsuliyyət daşıdığını bir daha sübut edir. Gənclərin cəmiyyətə inteqrasiyası və uğurlu gələcək qurması üçün belə dəstək proqramlarının həyata keçirilməsi son dərəcə vacibdir”.

Facebookda bizi izləyin

Telegram kanalı

Whatsapp kanalı

Oxşar Xəbərlər