Təhsil kreditindən yararlanan tələbələr üçün pulsuz danışıq dərsləri keçirilir

Təhsil kreditindən yararlanan tələbələr üçün pulsuz danışıq dərsləri keçirilir

Təhsil Tələbə Krediti Fondu (TTKF) təhsil tələbə kreditindən (TTK) yararlanan tələbələr üçün 6 həftəlik ödənişsiz onlayn ingilis dili danışıq dərslərinə start verib.

“Azərbaycan müəllimi” xəbər verir ki, layihənin məqsədi müxtəlif öyrənmə üsulları ilə tələbələrin dil bacarıqlarını inkişaf etdirməsinə, dil öyrənməyə maraqlarının artmasına və adaptiv öyrənmə mühitində iştirak etməsinə şərait yaratmaqdır. 

Müasir və effektiv tədris metodlarından istifadə edilərək tətbiq olunan metodlar layihə iştirakçılarının dil baryerini aradan qaldırmaq və nitqlərində sərbəstlik, axıcılıq qazanmaq üçün xüsusi olaraq seçilmişdir. Təcrübəli mütəxəssis Kamandar Dadaşov tərəfindən keçirilən dərslər yalnız nəzəri biliklərə deyil, eyni zamanda praktiki danışıq bacarıqlarının inkişafına əsaslanacaq.

Qeyd edək ki, Fond tərəfindən təhsil tələbə kreditindən yararlanan tələbə və məzunlar üçün mütəmadi olaraq müxtəlif layihələr, təlimlər və təcrübə proqramları təşkil olunur. Bu təşəbbüslərin məqsədi onların əmək bazarına inteqrasiyasını asanlaşdırmaq və rəqabət qabiliyyətliliyini artırmaqdır. TTKF-nin uğurlu əməkdaşlıqları nəticəsində indiyədək 1000-dən çox tələbə və məzun müxtəlif təlim və təcrübə proqramlarına cəlb olunmuş, bu da onların peşəkar bacarıqlarını inkişaf etdirməsinə və müasir bazar tələblərinə uyğun təcrübə qazanmasına töhfə verib.