Rektor: ADAU-EGE ikili diplom proqramı kənd təsərrüfatının inkişafında öz effektini göstərəcək

Rektor: ADAU-EGE ikili diplom proqramı kənd təsərrüfatının inkişafında öz effektini göstərəcək

Azərbaycan Dövlət Aqrar Universiteti (ADAU) ilə Türkiyənin Ege Universiteti arasında həyata keçirilən beynəlxalq ikili diplom proqramı ölkəmizdə kənd təsərrüfatı sahəsində ən qabaqcıl elmi yeniliklərdən və innovativ təlim-tədris texnologiyalarından yararlanaraq dayanıqlı kənd təsərrüfatı mütəxəssislərinin yetişdirilməsinə imkan yaradır.

“Azərbaycan müəllimi” xəbər verir ki, bu fikirləri Ege Universitetinin bir qrup professor-müəllim heyəti ilə görüşdə Azərbaycan Dövlət Aqrar Universitetinin rektoru Zəfər Qurbanov deyib.

O bildirib ki, ölkəmizdə kənd təsərrüfatı mütəxəssislərin hazırlanması məqsədilə həyata keçirilən beynəlxalq ikili diplom proqramının təsirləri gələcəkdə kənd təsərrüfatının inkişafında və minlərlə insanların həyatında öz effektini göstərəcək.

“Ötən il ilk məzunları olan ADAU-EGE ikili diplom proqramının 30-a yaxın tələbəsi Ege Universitetində təhsilini magistratura pilləsində davam etdirib. Sevindirici haldır ki, universitetimizin tələbəsi Məhsəti Muradova Ege Universitetinin Kənd təsərrüfatı fakültəsindən ən yüksək ortalama ilə birinciliklə məzun olub. Proqram sayəsində ADAU-nun professor-müəllim heyəti üçün onlarla təlim keçilib, hər iki ali təhsil müəssisəsinin əməkdaşlarının birgə elmi-tədqiqat işləri aparması və yüksək indeksli jurnallarda məqalə çap etdirməsi göstəriciləri dəfələrlə yüksəlib”, – deyə rektor proqramın əhəmiyyətindən bəhs edib.

Sonra ADAU-ya dərs tədris etmək üçün gələn Ege Universitetinin bir qrup professor-müəllim heyəti fikir və təkliflərini səsləndirib, yaradılan şəraitə görə ölkə rəhbərliyinə minnətdarlıqlarını bildiriblər.