SABAH.HUB-ın təşkilatçılığı ilə növbəti "Demo Day" keçirilib

SABAH.HUB-ın təşkilatçılığı ilə növbəti "Demo Day" keçirilib

Bu gün Azərbaycan İnnovasiyalar Mərkəzində SABAH.HUB-ın təşkilatçılığı ilə Baku ID (Baku Investment Day) tədbiri çərçivəsində növbəti “Demo Day” baş tutub.  

“Azərbaycan müəllimi” xəbər verir ki, tədbirin məqsədi müxtəlif komanda layihələrinin investorlar qarşısında təqdim olunması və innovativ ideyaların paylaşılması olub.

Tədbir açılış və təqdimat hissəsi ilə başlayıb. Birinci blokda 6, ikinci blokda isə 4 komanda öz startap layihələrini təqdim edib.

SABAH.HUB-ın PR rəhbəri Nurcan Baxşıyeva bildirib ki, “Demo Day” regionun innovasiya ekosistemini bir araya gətirən və gələcək əməkdaşlıqlar üçün imkanlar yaradan önəmli tədbirlərdəndir. Onun sözlərinə görə, seçilmiş 10 startap gün ərzində layihələrini yerli və xarici investorlar qarşısında təqdim edərək mühüm əlaqələrin qurulmasına nail olub.

Tədbirdə Qazaxıstan, Özbəkistan, Estoniya və Azərbaycan da daxil olmaqla bir sıra ölkələrdən investorlar iştirak edib. Onların arasında Startup Wise Guys, White Hill Capital, MyVentures, Caucasus Ventures, INMerge Ventures və SABAH.fund kimi nüfuzlu fondların nümayəndələri də yer alıb.

Təqdim olunan layihələr sırasında “Invnex”, “LazyLunch”, “Bonpara”, “Snackpack” və “Canscreen” kimi startaplar yer alıb. Bu layihələrin ideyaları, bazar potensialı və texnoloji həlləri investorlar tərəfindən maraqla qarşılanıb.

Tədbirin sonunda investorlarla komandalar arasında fərdi görüşlər təşkil olunacaq və ilkin əməkdaşlıq müzakirələri aparılacaq. 

Nurcan Baxşıyeva qeyd edib ki, bu cür tədbirlər startapların həm daha geniş auditoriyaya çıxışını təmin edir, həm də real investisiya imkanları yaradır. Təqdimatçılardan biri, “LazyLunch” layihəsinin komandası adından çıxış edən Ramil Rəhimzadə bildirib:

“Biz şirkətlərə daha münasib qiymətə və yüksək keyfiyyətli nahar xidməti təqdim etmək məqsədilə fəaliyyət göstəririk. Bunun üçün müxtəlif iaşə şirkətləri ilə əməkdaşlıq edirik və onların idarə olunmasını öz üzərimizə götürürük. Hədəfimiz şirkətlərə keyfiyyətli, vaxtında və münasib qiymətə nahar xidməti təqdim etməkdir”.

O, çatdırılma xidmətinin texnoloji həllərlə optimallaşdırıldığını, keyfiyyətə nəzarət və müştəri məmnuniyyətinə xüsusi diqqət yetirildiyini də vurğulayıb. 

Komanda hazırda layihəni genişləndirmək üçün 200 min ABŞ dolları investisiya cəlb etməyi planlaşdırır. Bu vəsait mobil tətbiqin hazırlanması, xidmət keyfiyyətinin artırılması və əməliyyatların genişləndirilməsi üçün istifadə olunacaq.

Tədbirdə maraqla qarşılanan startaplardan biri də Türkiyədən qatılan Pamir Birlikin təqdim etdiyi layihə olub. Layihə onlayn alış-veriş təcrübəsini daha effektiv və şəffaf etmək məqsədi daşıyır. Süni intellekt əsaslı platforma istifadəçilərin alış-veriş vərdişlərini təhlil edir, fərdiləşdirilmiş təkliflər təqdim edir və həm istifadəçi təcrübəsini, həm də satış göstəricilərini artırır.

Pamir Birlik qeyd edib ki, layihə ilkin istifadəçi qrupu arasında sınaqdan keçirilib və nəticələr ümidvericidir. Onun sözlərinə görə, layihə gələcəkdə beynəlxalq bazarlarda da rəqabət apara biləcək potensiala malikdir.