Ölkədə süni intellekt ekosisteminin formalaşması xeyli sürətlənib

Ölkədə süni intellekt ekosisteminin formalaşması xeyli sürətlənib

Prezident İlham Əliyev tərəfindən Süni İntellekt Strategiyasının qəbulundan sonra bu sahədə ciddi irəliləyiş və canlanma müşahidə olunur. 

“Azərbaycan müəllimi” xəbər verir ki, bu barədə Azərbaycan İnternet Forumunun prezidenti Osman Gündüz sosial şəbəkə hesabında paylaşım edib.

O qeyd edib ki, istiqamət üzrə infrastruktur qurulur (iki Superkompüter Mərkəzi qurulur), bir neçə universitetdə (AzTU, UNEC, ADA və s.) elmi və tədris müstəvisində əhəmiyyətli addımlar atılır, AI Akademiyalar və ixtisaslaşmış kurslar formalaşır, həmçinin özəl sektorun da fəallığı nəzərəçarpacaq dərəcədə artır. Süni intellekt sahəsində startapların sayı getdikcə çoxalır və bu sahəyə maraq genişlənir.

"Yeri gəlmişkən, bu gün KOBİA-da Startap Şəhadətnaməsinin verilməsi üzrə Ekspertlər Şurasında Azərbaycanın çox maraqlı bir süni intellekt startapının təqdimatı da keçirilib. Bütün bunlar onu göstərir ki, artıq ölkəmizdə bu sahədə innovativ təşəbbüslər formalaşmağa başlayıb. Ehtiyac var ki, strategiyanın icrasına cavabdeh qurumlar, İRİA, investorlar və fondlar bu tip təşəbbüslərə diqqəti daha da artırsınlar.  

Bu kontekstdə mühüm addımlardan biri də Azərbaycan Texniki Universitetində atılıb. 

“AI-MED Baku 2025: Süni İntellekt və Biotibbi İnnovasiyalar üzrə Azərbaycan-Almaniya Strateji Tərəfdaşlıq Forumu” çərçivəsində universitetdə yüksək səviyyəli işgüzar görüş keçirilib və “AI-MED LAB” adlı ixtisaslaşmış laboratoriyanın açılışı baş tutub.

Yeni yaradılan “AI-MED LAB” laboratoriyası AzTU-nun Biotibbi Mühəndislik İnstitutunun nəzdində fəaliyyət göstərəcək və burada süni intellekt alqoritmlərinin səhiyyə və biotibbi mühəndislik sahəsində tətbiqinə yönəlmiş qabaqcıl elmi-tədqiqatlar həyata keçiriləcək. Bu təşəbbüs təkcə elmi inkişaf baxımından deyil, həm də süni intellekt sahəsində kadr potensialının yetişdirilməsi baxımından xüsusi əhəmiyyət daşıyır.

Bütün bunların da Azərbaycanda süni intellekt sahəsində yüksək ixtisaslı mütəxəssislərin hazırlanmasına real töhfə verəcəyini proqnozlaşdırmaq olar", - deyə o yazıb.