Türkiyəli professor: NDU texnoparklar yaratmaqla çox böyük missiyanı öz üzərinə götürüb

“NDU texnoparklar yaratmaqla və belə simpoziumlar keçirməklə çox böyük missiyanı öz üzərinə götürüb. Universitet bütün dünyaya baxaraq texnoparkların önəmli olduğunu görüb”.

“Azərbaycan müəllimi” xəbər verir ki, bu sözləri “Texnoparkların təhsildə və iqtisadi inkişafda rolu” mövzusunda keçirilən III Beynəlxalq Simpoziumda jurnalistlərə müsahibəsində İstanbul Universitetinin İqtisad fakültəsinin dekanı, professor Mahmut Cüneyt Yenigün deyib.

O bildirib ki, bu təkcə Naxçıvanın deyil, Azərbaycanın, bütün bölgənin həm iqtisadi inkişafı, həm də gənclərin yolunun açılması üçün ən önəmli addımlardan biridir:

“Çox uzun zamandır bunun üzərində işləyirlər. Biz də İstanbul Universiteti və Türkiyə olaraq qardaş naxçıvanlılalara əlimizdən gələn köməyi etməyə çalışırıq. Biz burada texnoparkların qurulması, işlək hala gətirilməsi və yeni layihələrin icrası ilə həm Naxçıvanın, həm də Azərbaycanın iqtisadiyatına töhfə vermək üçün iş birliyinə davam edəcəyik”.

Professor əlavə edib ki, gənclərə yer açmağın ən önəmli yeri artıq texnofestlərdir ki, onlar da texnoparkların ən mühüm vasitələrindən biridir:

“Akademik özünü inkişaf etdirməli, köhnə məlumatlarla yekunlaşmamalı, yeni biliklərdən qorxmamalıdır. Yeni ixtiralar etməlidir ki, gələcəyimiz olan gənclərə yeni biliklər öyrədə bilsin. Bunlar isə ancaq texnoparklarda yeni biliklər öyrənərək bu bilikləri universitetdə tələbələrə öyrətməklə mümkündür”.