Gələn il bu ərazilərdə yeni məktəb binaları istismara veriləcək

Cari il ərzində Lənkəran-Astara Regional Təhsil İdarəsinin tabeliyində olan 93 təhsil müəssisəsində cari və əsaslı təmir işləri yekunlaşdırılıb, 7 müəssisədə isə təmir işləri davam etdirilir.

Bu barədə "Azərbaycan müəllimi"nin sorğusuna cavab olaraq LARTİ-dən məlumat verilib.

Bildirilib ki, Lənkəran-Astara Regional Təhsil İdarəsi tabeliyində olan təhsil müəssisələrinin maddi-texniki bazasının gücləndirilməsi, müasir avadanlıqlarla təmin olunması, yeni binaların tikilməsi və mövcud binaların təmir edilməsi idarənin əsas prioritetləri arasındadır: "Cari il ərzində 93 təhsil müəssisəsində cari və əsaslı təmir işləri yekunlaşdırılıb, 7 müəssisədə isə təmir işləri davam etdirilir. Eyni zamanda, Astara rayonunun Sərək kəndində, Lerik rayonunun Cəngəmiran kəndində və Cəlilabad rayonunun Göytəpə şəhərində yerləşən 2 nömrəli tam orta ümumtəhsil məktəblərinin yeni binaları tikilərək istismara verilib.

Gələn ilin əvvəlində isə Lənkəran şəhər 9 nömrəli tam orta məktəbin (əsaslı təmir), Astara rayonunun Şümrüd və Lənkəran rayonunun Viyən kəndində yeni inşa edilən məktəb binasının istismara verilməsi planlaşdırılır".

Məlumatda qeyd edilir ki, təhsil müəssisələrinin təmiri və tikintisi növbəlilik və prioritetlik prinsipi əsasında həyata keçirilir.