Bu ay inklüziv siniflərin olduğu 21 məktəbdə monitorinq aparılıb

Elm və Təhsil Nazirliyi ilə BMT-nin Uşaq Fondunun (UNICEF) əməkdaşlığı əsasında Təhsil İnstitutu (ARTİ) tərəfindən icra edilən “İnklüziv sinif təşkil edilən ümumi təhsil müəssisələrinin şəbəkəsinin genişləndirilməsi” layihəsi çərçivəsində dekabr ayı ərzində Bakı şəhəri və regionlarda yeni fəaliyyətə başlayan inklüziv siniflərin olduğu 21 məktəbdə monitorinq təşkil edilib.

Təhsil İnstitutundan “Azərbaycan müəllimi”nə bildirilib ki, monitorinqlərin əsas məqsədi inklüziv təhsilin məktəblərdə tətbiqini müşahidə etmək, qiymətləndirmək və problemləri müəyyənləşdirmək üçün məlumatları toplamaq olub.

Monitorinqlər zamanı məktəbin infrastrukturunun sağlamlıq imkanları məhdud olan şagirdlərin fiziki ehtiyaclarına uyğunluğu nəzərdən keçirilib. Eyni zamanda məktəbdə inklüziv təhsil mühitinin yaradılması üçün tələb olunan resursların mövcudluğu və təminatı qiymətləndirilib. Müəllimlərin inklüziv yanaşma üzrə bacarıqları sinif otağında müşahidə edilib.

Monitorinqdə iştirak edən ARTİ əməkdaşları məktəbdə sağlamlıq imkanları məhdud olan şagirdlərin təhsil almaları üçün yaradılan şəraitlə tanış olub. Məktəb heyətinin və valideynlərin sağlamlıq imkanları məhdud olan uşaqlara qarşı münasibətləri və ümumilikdə inklüziv yanaşma ilə bağlı mövcud vəziyyət qiymətləndirilib.

Qeyd edək ki, layihənin əsas məqsədi Azərbaycanda sağlamlıq imkanları məhdud olan uşaqların təhsil hüququnun təminatına dəstək verilməsi, inklüziv təhsilin keyfiyyətinin yüksəldilməsi və məktəblərdə kadr potensialının gücləndirilməsidir.