Azərbaycanı beynəlxalq aləmə tanıdan İSTEDADLAR

Azərbaycanı beynəlxalq aləmə tanıdan İSTEDADLAR 

Bakıdakı 3 nömrəli Uşaq-Gənclər İnkişaf Mərkəzinin “Təsviri sənət və dizayn” dərnəyinin üzvləri - Cəlil Kərimli, Dəniz Quliyeva, Əsma Həsənzadə və İnci Mirzəyeva növbəti dəfə beynəlxalq müsabiqənin qalibləri olublar. 

Dəniz Quliyeva, Cəlil Kərimli Qazaxıstanın Almatı şəhərində keçirilən “The Planet of Art 2024”, Əsma Həsənzadə və İnci  Mirzəyeva  isə Belarusda keçirilən “Zalataya pçelka” beynəlxalq festivalında Azərbaycanı təmsil edib. Bu istedadlı məktəblilər yarışmalarla bağlı təəssüratlarını “Azərbaycan  müəllimi” ilə bölüşüblər. 

“Bayrağımızı qiymətli hədiyyə kimi qəbul edirdilər”
             
Dəniz Quliyeva Bakıdakı Səttar Bəhlulzadə adına Xarici Dillər Təmayüllü Gimnaziyanın 9-cu sinfində təhsil alır. İstedadını daha da inkişaf etdirmək üçün 5 yaşından 3 nomrəli Uşaq-Gənclər İnkisaf Mərkəzinə gedir, müəllimi Nərmin Abdullayevadır. Dənizin dəfələrlə 100-dən artıq  rəsminin nümayiş olunduğu fərdi rəsm sərgisi  keçirilib.  Öz yaradıcılıq nümunələri  ilə ziyarətçilərini heyran qoyan istedadlı yeniyetmənin ilk  uğuru Fransada keçirilən beynəlxalq  rəsm müsabiqəsində olub. O, burada qızıl medal qazanıb. Dənizin  müsabiqələrdə qazandığı uğurlar bununla bitmir. Onun rəsmləri “Azərbaycan və Çin dostlugu” musabiqəsində  II yerə layiq görülüb. Bundan sonra da çoxsaylı uğurlara imza atan Dəniz Rusiyanın Sankt Peterbur şəhərində keçirilən beynəlxalq rəsm müsabiqəsində I yerin, IV beynəlxalq  onlayn olimpiadada  II yerin qalibi olub. O, UNESCO-nun dunya irsinə həsr olunmus, 34 olkənin qatıldığı “The Planet of Art 2024 ”  beynəlxalq gənclər festivalında da qalib seçilib.  

“Bu müsabiqə olduqca məsuliyyətli yaradıcılıq yarışması idi. Şübhəsiz, hamı qalib olmaq arzusu ilə bu müsabiqəyə qatılmışdı, amma güclü olan qazandı” deyən Dəniz bu ölkədən böyük təəssüratla ayrılıb: “Bu səyahət həm dünyagörüşümü artırdı, həm yaradıcılığımı zənginləşdirdi, həm də mənə çoxlu dostlar qazandırdı. Müsabiqədə qazandığım uğur mənə yeni yaradıcılıq yarışmalarında iştirak üçün stimul verdi.  Almatıda olarkən zərrəcə darıxmırdıq. Yaşıdlarımızla rahat ünsiyyət qururduq, çünki türkdilli dostlarımız bizi asanlıqla başa düşürdülər. Müsabiqəyə qatılan iştirakçılar öz xalqlarının milli geyimlərində təmsil olunurdular. Dövlət  rəmzimiz olan bayraqlarımızı başqa xalqların təmsilçiləri olan iştirakçılara hədiyyə edirdik. Onlar bunu ən qiymətli hədiyyələr kimi qəbul edirdilər. Demək olar ki, Almatının bütün tarixi yerlərini ziyarət etdik və şəhər haqda bilgilərimizi kifayət qədər artırdıq. Olduqca maraqlı, zəngin mətbəxləri  bizim milli mətbəximizi xatırladırdı”. 

100-ə yaxın əsər çəkən məktəbli rəssam 

Cəlil Kərimli bildirir ki, Almatıda olduğu müddətdə  mövzu rəngarəngliyini artıraraq yaradıcılığını  zənginləşdirib.

“Orada ikinci gün heyranedici dağ mənzərəsi ilə tanış olduq. Təbiətin gözəlliyi  mənə  xoş təsir  bağışladı və  yaradıcılığıma ilham verdi. Festivalda qazandığım təcrübənin yaradıcılığıma yeni istiqamət verəcəyinə inanıram, bu unudulmaz günlərdən böyük zövq aldım. Münsiflər heyətinin qalib kimi adımı elan etdiyi zaman mənim üçün müsabiqənin ən həyəcanlı anı idi, sevincimin həddi-hüdudu yox idi”.

Paytaxtdakı  210  nömrəli tam orta məktəbin 9-cu sinfində oxuyan Cəlil müsabiqələrdə uğur qazanmaqla yanaşı, öz biliyi və  əzmkarlığı  ilə fərqlənir. Ən çox sevdiyi fənlər riyaziyyat və idman olsa da,  yaradıcılığa daha çox meyil edir. O, xüsusilə rəssamlıq sənətinin vurğunudur. Bu sənəti sanki bütün arzularının qovuşduğu məkan sanır. Cəlilin rəssamlığa marağı erkən yaşlarından başlayıb. 5 yaşından 3 nömrəli Uşaq  Gənclər İnkişaf Mərkəzində fəaliyyət göstərən “Palitra” rəsm studiyasına gedən yeniyetmə rəssam Nərmin Abdullayevanın rəhbərliyi altında sənət dünyasında ilk addımlarını atıb. Bu mərkəzdə  rəssamlıq  sahəsində bacarıqlarını inkişaf etdirən istedadlı şagird potensialını onun üçün bir növ ikinci evə çevrilən studiyada üzə çıxarıb. 

İstər ölkə, istərsə də beynəlxalq  səviyyəli yaradıcılıq yarışmalarında qazandığı nailiyyətlər onu ruhlandırıb. 2019-cu ildə OCEP-2019 "Olimpiya Mədəniyyəti və Təhsil Proqramı" çərçivəsində keçirilən Avropa Gənclərinin XV Yay Olimpiya Festivalına həsr olunmuş respublika rəsm müsabiqəsində və ümumrespublika rəsm müsabiqəsində birinci yerə layiq görülüb. Bundan başqa, Türk Mədəniyyəti və İrsi Fondu tərəfindən təşkil olunan "Dünyamızı qoruyaq: Türk dünyasının adət-ənənələri" adlı müsabiqənin 6-9 yaş kateqoriyasında birinci yeri qazanıb. Sonrakı illərdə də Cəlilin mükafatlarla zəngin uğur yolu davam edib: Macarıstan səfirliyinin təşkil etdiyi “Dyula Bentsur uşaqlar üçün” müsabiqəsində ikinci yeri, “Biz zəfər qazandıq” və “Varlığımsan, Azərbaycan” kimi müsabiqələrdə  yüksək nailiyyətlər əldə edib. 2023-cü ildə Sankt-Peterburqda keçirilən beynəlxalq rəsm müsabiqəsində “Pyotr Perviy” mövzusunda birinci yeri qazanması isə onun istedadının beynəlxalq səviyyədə tanınmasına səbəb olub. Bu il UNESCO və Qazaxıstan Respublikasının dəstəyi ilə təşkil olunan “The Planet of Art” müsabiqəsi və UNICEF-in Tokio ofisinin təşkil etdiyi JQA Beynəlxalq Ətraf Mühit Uşaq Rəsm Müsabiqəsində qazandığı birincilik onun uğurlarına yeni səhifələr əlavə edib.

Cəlil vətənpərvərlik ruhunda çəkdiyi rəsmləri ilə fərqlənir və bu rəsmlərində al-əlvan rənglərə üstünlük verir. O, öz rəsm əsərlərində  təbiətin gözəlliklərini, milli dəyərləri əks etdirməyi sevir. Rəsmlərinin bir çoxu 3 nömrəli UGİM-də saxlanılsa da, bəzilərini dostlarına və yaxınlarına hədiyyə edib. İndiyədək Cəlilin 100-ə yaxın əsəri olub ki, bu da onun rəssamlığa olan sevgisinin və zəhmətinin sübutudur.  Qeyd edək ki, Cəlilin təkcə rəssamlıqda deyil, avtomobil dizaynına da böyük  marağı var.  Maşınlar və onların dizaynı haqqında dərin bilikləri olan bu gənc istedad gələcəkdə avtomobil dizayneri olmaq arzusundadır. 

Ən böyük arzusu “Xalq rəssamı” olmaqdır

Əsma Həsənzadə Belarusda keçirilən  rəsm müsabiqəsinə  vəsiqə qazandığını eşitdikdə çox sevinib və evə tələsib ki, sevincini valideynləri ilə  bölüşsün. Artıq həmin gün arxada qalıb. Hava limanında doğmalarını gördükdə sevincini ilk olaraq, elə onlarla bölüşüb.  

İstedadlı yeniyetmə paytaxtdakı 290 nömrəli tam orta məktəbin  şagirdidir, dərs əlaçısıdır. Ən sevdiyi fənlər riyaziyyat, ingilis dilidir. Əsma beş ildir ki, 3 nömrəli Uşaq Gənclər İnkişaf Mərkəzinin "Palitra"rəsm dərnəyinin üzvüdür. O, plastilinlə işləməyi çox sevir. Ən çox sevdiyi rənglər mavi və yaşıldır. 

Bu istedadlı qız hər mövzuda şəkil çəkməyi xoşlayır, çətinliyin öhdəsindən də gəlməyi bacarır. Bu yaxınlarda Ailə, Qadın və Uşaq Problemləri üzrə Dövlət Komitəsinin təşkilatçılığı ilə keçirilən "Ailə - dəyişməyən dəyərimiz" mövzusunda rəsm sərgisində rəsmləri nümayiş olunub. 

20-dən  çox müsabiqədə iştirak edərək fəxri  fərmanlara, diplomlara layiq görülən yeniyetmə rəssam “Xalq rəssamı” adına layiq görülmək, vətəndən kənarda Azərbaycan xalqını təmsil etmək arzusu ilə yaşayır. Ən böyük arzusu fərdi sərgisinin keçirilməsidir. 

“Çalışıram ki, dərslərimi yaradıcılıq sahəsində qazandığım uğurlara qurban verməyim”

İnci Mirzəyeva da Belarusdan müsabiqə qalib kimi qayıdıb. Artıq  5 ildir ki, rəsmlə məşğul olan İnci beynəlxalq və respublika müsabiqələrinin qalibi olub. “Hər yeni uğur mənə  sonrakı  yaradıcılıq müsabiqələrinə daha böyük məsuliyyətlə hazırlaşmağa həvəsləndirir. Rəsmlərimin hamı tərəfindən hədsiz  sevilməsi məni çox sevindirir. 62 nömrəli məktəb-liseyin 5-çi sinif şagirdiyəm. Çalışıram ki, dərslərimi yaradıcılıq sahəsində qazandığım uğurlara qurban verməyim və məktəbdə də sayılıb-seçilən şagirdlərdən biri kimi tanınım. Bu, mənim üçün çox önəmlidir və  dərslərimə daha ciddi hazırlaşmağa həvəsləndirir”. 

İnci deyir ki, iki dəfə fərdi rəsm sərgisi keçirilib və həmin sərgilərdə 30-dan çox rəsmi nümayiş olunub. Hazırda yeni sərgisinə hazırlaşır: "Daha maraqlı mövzular üzərində çalışıram. Bildiyimiz kimi, bu  il "Yaşıl dünya naminə həmrəylik ili"dir. Yeni işim də elə bununla bağlıdır. Ümumiyyətlə, mən öz rəsmlərimdə təbiəti, heyvanları, bitkiləri necə sevdiyimi və qoruduğumu təsvir etməyə  çalışıram. Bu, hamımızın borcudur. Bu il doğma Bakımızın ev sahibliyi etdiyi COP29-un dünya dövlətləri, xalqları qarşısında qoyduğu tələb də elə budur. Düşünürəm ki, böyüklərlə bərabər, yeniyetmə və gənclər, hətta  kiçik yaşlı məktəblilər də təbiəti  sevməli, onu göz bəbəyi kimi  qorumalıdırlar. Ekologiyası təmiz olmayan ölkədə yaşayan uşaqların gələcək taleyi sual altında ola bilər. Ona görə də dünyanı hamılıqla öz evimiz sanıb təmiz saxlamalıyıq".

İncinin ekologiya ilə bağlı düşüncələri və bu mövzuya həsr etdiyi rəsm əsərləri diqqətimizi daha çox cəlb etdi. Sən demə, bu  mövzu hər zaman onun maraq dairəsində olub. Bu fikirlərini yekunlaşdırdıqdan sonra müsabiqə ilə bağlı fikirlərinə yenidən davam etdi: 

- Rəsmim Belarusda ənənəvi keçirilən  XXII beynəlxalq "Qızıl arı" festivalında ilk turdan keçərək II turda iştirak hüququ qazandı.  Azərbaycanımızı təmsil etmək üçün yola düşdük. Festivalda 4 ölkə - Azərbaycan, Özbəkistan, Rusiya və Belarusun istedadlı uşaqları iştirak edirdilər. İkinci turda canlı rəsm çəkdik . Bu  çətin və məsuliyyətli  işin öhdəsindən gəlməyi bacardım və qaliblərdən biri  oldum. Bu, mənim başqa ölkədə ilk yaradıcılıq hesabatım, ilk uğurum idi. Düzdür, mənim beynəlxalq səviyyəli  diplomlarım çoxdur, amma mən burada canlı rəsm müsabiqəsinə qatılmışdım.  İki gün davam edən festival həqiqətən də möhtəşəm idi. Başqa ölkənin mədəniyyətini, onun yaşayış tərzini yaxından görmək çox xoş idi. Amma  etiraf etməliyəm ki, Azərbaycanımı heç bir ölkəyə dəyişmərəm. Hava limanında məni atam qarşıladı, onun qürurverici baxışları məni yeni yaradıcılıq uğurlarına  həvəsləndirirdi.