Ekran asılılığı valideyn-uşaq münasibətlərinə təsir edir

Ekran asılılığı valideyn-uşaq münasibətlərinə təsir edir

Avstraliyada aparılan araşdırma nəticəsində ekran müddətinin valideyn-uşaq münasibətlərinə mənfi təsir etdiyi ortaya çıxıb.

"Azərbaycan müəllimi" xəbər verir ki, araşdırmanın nəticələri "Computers in Human Behavior" jurnalında dərc edilib.

Mütəxəssislər 4-6 yaşlı uşaqların qadcetdən istifadə vərdişləri haqqında araşdırma aparıblar. Məlum olub ki, məktəbəqədər yaşlı uşaqlar uzun müddət ekran qarşısında vaxt keçirdiyi zaman onların davranışları və sosial əlaqələri pisləşir.

Araşdırma qrupunun rəhbəri, Avstraliyanın Deakin Universitetinin əməkdaşı Ceklin Harverson bildirir ki, bu yaşda olan uşaqların valideynləri ilə sağlam münasibəti onların gələcək inkişafı üçün əsasdır.

Araşdırma 4-6 yaşlı övladı olan 83 min valideyndən alınan məlumatlar əsasında aparılıb. Məlum olub ki, ekrandan həddindən çox istifadə ümumilikdə psixososial rifahın azalması, davranış problemləri, zəif sosial fəaliyyət və valideyn-uşaq münasibətlərinin keyfiyyətinin azalmasına səbəb olur. Bununla belə, qeyd edilir ki, ekrandan istifadə zamanı məzmun və kontekst də böyük əhəmiyyət kəsb edir.

Həmçinin bildirilir ki, uşaqlar valideynləri ilə birlikdə rəqəmsal öyrənmə ilə məşğul olduqları zaman mənfi təsirlər daha az nəzərə çarpır. Bu da uşaqların təkcə ekran qarşısında keçirdikləri vaxtın miqdarının deyil, həm də onların nə etdikləri və kiminlə etdiklərinin önəmli olduğunu göstərir.