Son 5 ildə qəzalı məktəblərin sayı 2,5 dəfə azalıb

“Təhsil sahəsində ən vacib məsələlərdən biri infrastruktur quruculuğudur”.

“Azərbaycan müəllimi” xəbər verir ki, bunu elm və təhsil naziri Emin Əmrullayev Milli Məclisdə keçirilən Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında deyib.

Nazirin sözlərinə görə, Prezident İlham Əliyevin təhsilin inkişafına göstərdiyi xüsusi diqqət və qayğı, eləcə də Birinci vitse-prezident Mehriban Əliyevanın təşəbbüsü və dəstəyi nəticəsində 2003–2025-ci illər ərzində 3600-dən çox məktəb binası tikilib və əsaslı təmir olunub:

“Bu tədbirlər nəticəsində 1,3 milyondan çox şagirdin təhsil şəraiti əhəmiyyətli dərəcədə yaxşılaşdırılıb. Təkcə 2025-ci ildə dövlət vəsaiti və sahibkarlıq təşəbbüsləri hesabına 47 təhsil müəssisəsində tikinti-quraşdırma işləri aparılıb, 20 təhsil müəssisəsində əsaslı təmir başa çatdırılıb”.

O qeyd edib ki, dövlət vəsaiti hesabına 9 yeni təhsil müəssisəsi istifadəyə verilib, 4 müəssisədə isə təmir-bərpa işləri davam etdirilir. Sahibkarların dəstəyi ilə 2 yeni məktəb binası tikilib, 8 təhsil müəssisəsində təmir işləri həyata keçirilir.

Emin Əmrullayev “Böyük Qayıdış” proqramı çərçivəsində azad edilmiş ərazilərdə görülən işlər barədə də məlumat verib. Nazir qeyd edib ki, 2025-ci ildə Kəlbəcər, Xocavənd, Füzuli, Cəbrayıl və Zəngilan rayonlarında 5 yeni məktəbin tikintisinə başlanılıb.

Son üç ildə işğaldan azad olunmuş ərazilərdə ümumilikdə 20 məktəb bərpa olunub, onların 18-i artıq fəaliyyət göstərir. Hazırda bu məktəblərdə 3500-ə yaxın şagird təhsil alır, 380 pedaqoq və 140 texniki işçi çalışır.

Nazir əlavə edib ki, son illərdə təhsil müəssisələrinin vəziyyətində nəzərəçarpacaq irəliləyişlər müşahidə olunur. “Son beş ildə qəzalı vəziyyətdə olan məktəblərin sayı 2,5 dəfə azalıb”, – deyə E.Əmrullayev bildirib.