Emin Əmrullayev: Müəllimlər üçün standartlar əvvəlkilərdən daha yüksək olmalıdır

“Keyfiyyətli təhsil üçün müəllimlərimizdən daha yüksək standartlar tələb etməliyik”.

“Azərbaycan müəllimi” xəbər verir ki, bunu elm və təhsil naziri Emin Əmrullayev Milli Məclisdə Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında çıxışı zamanı deyib.

Nazir qeyd edib ki, keyfiyyətli təhsil müəllimlərin peşəkarlıq səviyyəsindən birbaşa asılıdır:

“Biz keyfiyyətli təhsil istəyiriksə, müəllimlərimizdən də daha yüksək standartlar tələb etməliyik. Təhsil sisteminin keyfiyyəti onun müəlliminin keyfiyyətindən yuxarı ola bilməz. Bu baxımdan müəllimlər üçün müəyyən etdiyimiz standartlar əvvəlkilərlə müqayisədə daha yüksək səviyyədə olmalıdır. Əlbəttə, bu, müəyyən çətinliklər yarada bilər, amma təhsilin inkişafı naminə bu yoldan çəkinməməliyik”.

Emin Əmrullayev vurğulayıb ki, qarşıdakı illərdə xüsusilə ibtidai təhsildə keyfiyyət göstəricilərinin artırılması əsas hədəflərdəndir:

“Təcrübə göstərir ki, Azərbaycan təhsil sisteminin ən həssas və eyni zamanda ən mühüm hissəsi ibtidai təhsildir. İbtidai təhsildə problemləri həll etmədən orta və ali təhsildə dayanıqlı nəticələr əldə etmək mümkün deyil. Təqribən 40–50 faiz şagird ibtidai mərhələdən sonra təhsildə davamlılıq baxımından çətinliklərlə üzləşir. Buna görə də əsas məqsədimiz ibtidai təhsilin keyfiyyətini yüksəltməkdir”.

Nazirin sözlərinə görə, təhsildə keyfiyyətin formalaşmasına iki əsas amil təsir göstərir – müəllimin peşəkarlığı və ailə mühitinin rolu:

“Uşağın təhsilə münasibətinin formalaşmasında ailə və ev mühiti az rol oynamır. Valideynin təhsilə yanaşması, uşağın öyrənməyə motivasiyası prosesin uğuruna birbaşa təsir edir. Ona görə də biz yalnız məktəb daxilində deyil, ailə mühitində də təhsilə dəyər verən bir mədəniyyəti təşviq etməliyik”.