Rektor: RIBA akkreditasiyası AzMİU-nun memarlıq təhsilində dünya standartlarına cavab verdiyini təsdiq edir

Rektor: RIBA akkreditasiyası AzMİU-nun memarlıq təhsilində dünya standartlarına cavab verdiyini təsdiq edir

COP29 çərçivəsində ölkəmizdə səfərdə olan RIBA prezidenti Muyiva Oki Azərbaycan Memarlıq və İnşaat Universitetinin (AzMİU) rektoru, professor Gülçöhrə Məmmədova ilə keçirdiyi görüşdə mövcud əməkdaşlıq, onun nəticələri və gələcək perspektivlər haqqında geniş müzakirə aparıb.

Universitetdən “Azərbaycan müəllimi”nə verilən məlumata görə, G.Məmmədova RIBA-nın universitet üçün vacib bir tərəfdaş olduğunu vurğulayıb. O, universitetin memarlıq fakültəsinin bakalavriat səviyyəsi üzrə RIBA akkreditasiyasından növbəti dəfə uğurla keçməsindən məmnunluğunu ifadə edib: "RIBA akkreditasiyası AzMİU-nun memarlıq təhsilində dünya standartlarına cavab verdiyini təsdiq edir və bu, universitetin beynəlxalq səviyyədə tanınması üçün mühüm addımdır".

Muyiva Oki AzMİU-nun nailiyyətlərini yüksək qiymətləndirərək Bakı memarlığından təsirləndiyini bildirib: “Azərbaycan memarlığı, xüsusilə Bakı şəhərinin memarlıq mənzərəsi zəngin ənənələri və müasir yanaşmaları özündə birləşdirir. AzMİU bu irsi qoruyub saxlayan və inkişaf etdirərək gələcək nəsillərə ötürən aparıcı təhsil ocağıdır”. 

Görüşdə RIBA-nın magistratura səviyyəsi üzrə də akkreditasiyadan keçirilməsi məsələsi müzakirə edilib. 

Muyiva Oki AzMİU-nun bakalavr proqramının 2024-2029-cu illər üçün RIBA akkreditasiyası sertifikatını G.Məmmədovaya təqdim edib. Bu, universitetin tədris keyfiyyətinə verilən yüksək qiymətin rəmzi olaraq qeyd edilib.