Cənub bölgəsinin 22 məktəbinin şagirdləri PISA tədqiqatına cəlb ediləcək

Cənub bölgəsinin 22 məktəbinin şagirdləri PISA tədqiqatına cəlb ediləcək 

Lənkəran-Astara Regional Təhsil İdarəsində PISA 2025 – Beynəlxalq Şagird Qiymətləndirilməsi Tədqiqatında iştirak edəcək ümumi təhsil müəssisələrinin direktorları ilə görüş keçirilib.

"Azərbaycan müəllimi" LARTİ-yə istinadən xəbər verir ki, görüşdə idarənin müdiri Bəhruz Mehdiyev, müdir müavini Rəhim Rəhimov, Tədrisin keyfiyyəti sektorunun müdiri Namiq Aslanov, əməkdaşları və məktəb direktorları iştirak ediblər. 

Bəhruz Mehdiyev çıxışı zamanı bildirib ki, PISA – Beynəlxalq Şagird Qiymətləndirilməsi Tədqiqatında 2025-ci ildə Cəlilabad rayonu üzrə 7, Lənkəran rayonu üzrə 5, Masallı rayonu üzrə 4, Astara rayonu üzrə 3, Yardımlı rayonu üzrə 2, Lerik rayonu üzrə isə 1 təhsil müəssisəsi olmaqla, ümumilikdə region üzrə 22 məktəbin şagirdləri iştirak edəcəklər.

Görüşdə tədqiqat prosesində həyata keçiriləcək bütün addımlara yenidən nəzər salındı və prosesin təşkili ilə bağlı müzakirələr aparıldı.

Qeyd edək ki, PISA ümumi təhsil müəssisələri üzrə 15 yaşlı şagirdlərin oxu, riyaziyyat, təbiət elmləri və yaradıcı düşünmə üzrə bilik və bacarıqlarını qiymətləndirmək, eyni zamanda, onları real həyatda tətbiq etmək qabiliyyətlərini müəyyənləşdirmək məqsədilə həyata keçirilən tədqiqatdır. Ölkəmizdə tədqiqat Təhsil İnstitutu tərəfindən həyata keçiriləcək. Tədqiqatda ölkə üzrə 8 minə yaxın şagird iştirak edəcək.