Marsın dərinliyində su hövzəsi tapılıb

Marsın dərinliyində su hövzəsi tapılıb

Marsın səthindən 8 kilometr dərinlikdə nəhəng su rezervi aşkarlanıb. 

“Azərbaycan müəllimi” xəbər verir ki, bu barədə Avstraliya, İtaliya və Çin alimlərindən ibarət beynəlxalq tədqiqat qrupu məlumat yayıb. Alimlər xüsusi olaraq vurğulayıblar ki, Marsda ilk dəfə olaraq 5,4-8 kilometr dərinlikdə maye suyun mövcudluğu dəqiq sübut edilib.

Tədqiqatçılar qeyd ediblər ki, son illər planetin dərin qatlarında böyük su hövzələrinin mövcudluğu ilə bağlı bir neçə iddia irəli sürülüb, lakin bu günə qədər bu cür məlumatlar ehtimal səviyyəsində təqdim olunub. Bu dəfə isə alimlər əldə olunan nəticələrin tam etibarlı olduğunu bildiriblər.

Mütəxəssislər NASA-nın 2018-ci ildən Marsda fəaliyyət göstərən “InSight” missiyasının seysmik məlumatlarını təhlil ediblər. Alimlərin sözlərinə görə, iki meteorit zərbəsi və Marsda baş verən güclü zəlzələ nəticəsində yaranan dalğalar planetin dərin qatlarının strukturunu yüksək dəqiqliklə müəyyən etməyə imkan verib. Məhz bu araşdırmalar zamanı dərinlikdə yerləşən su rezervi aşkar olunub.

Alimlərin fikrincə, 4,1-3,7 milyard il əvvəl meteoritlərin təsiri ilə planetin səthində yaranan çatlar vasitəsilə su dərin qatlara süzülüb. Həmin dövrdə Marsın daxilinin temperaturu maye suyun 8 kilometrədək dərinliyə qədər enməsinə şərait yaradıb. Sonradan planet soyuduqca üst qatlar donub və dərinlikdəki su rezervini qapadıb.