Yüzlərlə uğur bir ünvanda: Sumqayıtın 27 nömrəli məktəbindən REPORTAJ

Yüzlərlə uğur bir ünvanda: Sumqayıtın 27 nömrəli məktəbindən REPORTAJ    

Təhsil sahəsindəki nailiyyətləri ilə hər zaman fərqlənən Sumqayıtın 27 nömrəli tam orta məktəbi də çoxsaylı uğur hekayələrinin yazıldığı tədris məkanlarından biridir. Bu təhsil ocağı təkcə keyfiyyətli tədrisi ilə deyil, həm də fənn olimpiadalarında, beynəlxalq layihələrdə və idman yarışlarında qazandığı nailiyyətlərlə seçilir. 

“Azərbaycan müəllimi” həmin məktəbdən reportaj hazırlayıb.

112 müəllim, 1907 şagird 

Binaya daxil olanda məktəb rəhbərinin valideynləri qəbul etdiyini öyrənirik. Vaxt itirməmək üçün müəllimlər otağına üz tuturuq. İkinci mərtəbədə yerləşən otağa qalxa-qalxa məktəbin dəhliz və siniflərinə nəzər yetiririk. 

Bina səliqə-səhmanlı uzun dəhlizləri və digər təhsil müəssisələrindən fərqlənən korpusları ilə diqqətimizi çəkir. Fərqli üslubda tikilmiş, 4 hektara yaxın ərazisi olan məktəb 1978-ci ildən fəaliyyətə başlayıb. 1000 yerlik təhsil ocağında 4 məktəbəhazırlıq qrupu da daxil olmaqla, 1907 nəfər şagird təhsil alır. Şagirdlərin 993 nəfərini oğlanlar, 914 nəfərini isə qızlar təşkil edir. Üç korpusdan ibarət məktəbdə 40 sinif otağı, 66 sinif komplekti mövcuddur. 

Təhsil müəssisəsində 112 müəllim çalışır. Onarın 103-ü qadın, 9-u kişidir.

Tədris işləri üzrə direktor müavini Günel Əliyeva deyir ki, peşəkar müəllimlərin zəhməti, innovativ fəaliyyəti, dövrlə ayaqlaşması, yeniliklərə açıq olması nəticəsində nailiyyətlərə imza atırlar: “Respublika fənn müsabiqələri üzrə 4 finalçımız var, ümid edirik ki, burada da medal qazanan şairdlərimiz olacaq. Əlbəttə, daha böyük məqsədlərimiz üçün fəaliyyətimizi daha səmərəli davam edəcəyik”.

“İstedadlı uşaq görəndə düşünürəm ki, ona necə dəstək ola bilərəm”

Təlim, tərbiyə və tədris işləri üzrə direktor müavini Aysel Məmmədova  işlədiyi 8 il müddətində uşaqları, peşəsini sevdiyini və əsas amallarının məktəbin daha yüksək yerlərə çatması olduğunu qeyd edir: “Bu tədris ilində layihə rəhbəri olduğum “EcoFlow” komandasının üzvləri Eldar Şirəliyev və Sürəyya Ağazadə “Sabahın alimləri” müsabiqəsində qızıl medala layiq görülüblər. Məktəbimizin Sumqayıt ümumtəhsil müəssisələri arasındakı reytinqi getdikcə yüksəlir. Ümid edirəm ki, müəllim və şagirdlərimizin sayəsində belə də davam edəcəyik”.

Azərbaycan dili və ədəbiyyat müəllimi Aygün Məmmədova 2016-cı ildən  27 nömrəli tam orta məktəbdə işə başlayıb: 

“Sevindirici haldır ki, dərs keçdiyim hər sinifdə Azərbaycan dili və ədəbiyyat fənni üzrə olimpiada medalçısı var. 5-ci sinifdən dərs keçdiyim sinif hazırda 11-ci sinifdir. Həmin sinifdən Aydan Əkbərli 2023-cü ildə RFO-da Azərbaycan dili və ədəbiyyat fənni üzrə bürünc medal qazanıb. Bu il isə  iki şagirdim – 9-cu sinifdə oxuyan Aişə Tağıyeva qızıl, 8-ci sinifdə oxuyan Məhbubə Pirizadə gümüş medala layiq görülüb. Bu il məktəbimizdə medal qazanan 4 nəfərin ikisi sinif rəhbəri olduğum 8 “a” sinfinin şagirdidir. 

Keçən il bir şagirdim - Ərtoğrul Həşimzadə riyaziyyat, bu il iki şagirdim (Məhbubə Pirizadə ana dili, Ülvi Xudaverdiyev informatika) RFO medalçısı, Aişə Tağıyeva “Ən yaxşı təqdimat” müsabiqəsinin gümüş medalçısı olub. Bu müsabiqədə iştirak ilk təcrübəm idi və bir müəllim olaraq  Aişə qızımla birlikdə çox həyəcanlı, gərgin, qürurverici anlar yaşadıq. İki respublika səviyyəli yarışa eyni zamanda hazırlaşmaq çox çətin idi, ancaq Aişənin zəhmətkeşliyi və əzmi nəticəsində, məktəb rəhbərliyinin, fənn müəllimlərinin və valideynlərinin dəstəyi ilə öhdəsindən gəlməyi bacardıq. İstedadlı uşaq görəndə düşünürəm ki, ona necə dəstək ola bilərəm. Dəfələrlə səmərəli pedaqoji fəaliyyətimə və fəallığıma görə diplomlarla, fəxri fərmanlarla təltif olunmuşam. İşimizin, zəhmətimizin dəyərləndirilməsi məsuliyyətimi daha da artırır, məni yeni hədəflərimə doğru aparır”.

“Həftədə bir filmə baxır, bir kitab oxuyuruq”

Aygün müəllim bildirir ki, son illər şagirdlərin  mütaliəyə üstünlük verməməsi, dünya yazıçılarının əsərlərini az oxuması onu narahat edir: “Azərbaycan ədəbiyyatını, milli-mənəvi dəyərlərimizi təbliğ etmək məqsədilə məktəbdə və məktəb xaricində müxtəlif tədbirlər həyata keçirmişəm. Artıq buraxılış imtahanı vermiş 9 “a” sinif şagirdlərinin boş vaxtlarını səmərəli təşkili məqsədilə həftədə bir filmə baxır, bir kitab oxuyuruq, sonra, təbii ki, müzakirə edirik”.

Xalidə Mənsimova 42 ildir ki, biologiya müəllimi işləyir. O qeyd edir ki, 1996-1997-ci tədris ilində Təbiət elmləri təmayüllü gimnaziyada işləyərkən eyni sinifdən 5 şagirdi Respublika Olimpiadasının qalibi olub: “2004-cü ildən 27 nömrəli tam orta məktəbdə çalışıram. 2017-ci ildə şagirdim İsa İsayev biologiya fənni üzrə gümüş medala layiq görüldü. Hər il şagirdlərimiz SDU-da Ümummilli Lider Heydər Əliyevin anadan olmasının ildönümünə həsr olunuş təbiət fənləri üzrə yarışda iştirak edir və 2-3-cü yerlərə nail olurlar. Bu il də şagirdlərim RFM-də iştirak edərək yüksək balla finala vəsiqə qazanıblar”.

Sumqayıtdan ABŞ məktəbinə

2005-ci ilə qədər xarici şirkətlərdə işləyən Güllər Qazıyeva 20 ildir ki, bu məktəbdə ingilis dili müəllimi kimi çalışır. 2005-ci ildə “Project Harmony” təşkilatı üzrə “Azərbaycan məktəb əlaqələndirmə proqramı”nın və “Ən yaxşı beynəlxalq layihə”nin qalibi kimi ABŞ-də 1 aylıq təcrübə mübadiləsi keçib. 2009-cu ildə “İlin ən yaxşı müəllimi” müsabiqəsinin qalibi olub. Şagirdləri mütəmadi olaraq beynəlxalq layihələrə qoşulur, qalib olurlar: “Keçən tədris ili şagirdim Nicat Məmmədov “Teenagle” beynəlxalq müsabiqəsində yüksək nəticə əldə edib. Bu il də 70-ə yaxın şagirdimiz bu müsabiqədə iştirak edib. Əvvəllər dərsliklərimiz qrammatika üzərində qurulmuşdu, imtahanlarda da qrammatika üzrə bilik tələb olunurdu. Artıq bir neçə ildir ki, dərsliklərimiz dəyişib, qrammatika arxa, dinləmə ön plana çəkilib. Mən dinləmə və danışığı 2004-cü ildən tətbiq edirəm. Biz dərsimizdə yeni innovativ metodlardan istifadə edirik, ABŞ-nin bir çox məktəbləri ilə əməkdaşlıq edirik. Şagirdlərimiz bir-birlərinə məktublar göndərirlər. Oradakı şagirdlərlə canlı ünsiyyət qururuq”.  

İki ildir ki, informatika və riyaziyyat üzrə dərs deyən gənc müəllim Afət Zamanova son illər məktəb rəhbərliyi tərəfindən şagirdlərin müxtəlif müsabiqələrdə iştirakı üçün yaradılan şəraitdən, müəllimlərin fəaliyyətə cəlb edilməsindən və yüksək nəticələr əldə olunmasından söz açır: “Şagirdlərimizin önə çəkilməsi, əməklərinin qiymətləndirilməsi yüksək motivasiyadır. Bu il informatika fənni üzrə sertifikasiya imtahanlarında iştirak edəcəyəm. 5-ci sinif şagirdlərim Lütfi Zadə adına riyaziyyat-məntiq olimpiadasının finalçısı oldular. Ümid edirəm ki, həmin uşaqlar növbəti illərdə daha yüksək nəticələr əldə edəcəklər”.

Şagirdi Əməkdar idman ustası oldu

Vəli Vəliyev 1990-cı ildən məktəbdə fiziki tərbiyə müəllimi işləyir və 35 il ərzində məktəb idman üzrə xeyli nailiyyətlər əldə edib, dəfələrlə müxtəlif idman yarışlarının qalibi olub. Vəli müəllimin işi peşəkar idmançılar hazırlamaq olmasa da, vəzifəsi idman dərslərini yüksək səviyyədə keçmək, gənclərin sağlam və güclü böyüməsini, idmana həvəsini artırmaqdır: “Ən vacibi, onların bacarıq və qabiliyyətlərini görərək hər hansı idman növü ilə məşğul olmaq üçün peşəkar idman mütəxəssislərinə yönəltməkdir. Məsələn, 2009-cu ildə şagirdim 5-ci sinifdə oxuyan Namiq Abbaslının idmana həvəsini gördüyüm üçün ona güləşlə məşğul olmağı məsləhət gördüm. İdman Akademiyasında oxudu, dəfələrlə respublika çempionu oldu, 2021-ci ildə Tokioda keçirilən paralimpiya oyunlarında bürünc mükafat qazandı, Əməkdar idman ustasıdır, Prezident İlham Əliyev tərəfindən “Vətənə xidmətə görə” 3-cü dərəcəli medalla təltif olunub. Namiq məktəbimizin, respublikamızın fəxridir. Daha bir idman uğurları ilə seçilən məzunumuz Vəzir Allahverdiyev 2017-ci ildə İslam Oyunlarında tennis idman növü üzrə bürünc mükafat alıb. Belə yetirmələrimizlə fəxr edirik”.

RFO medalçıları: Gələcəyin hüquqşünasları, filoloqları 

Müəllimlərlə söhbəti yekunlaşdırıb şagirdlərlə tanışlığa başlayırıq. Həmsöhbətimiz 9-cu sinif şagirdi Aişə Tağıyeva RFO-da Azərbaycan dili və ədəbiyyat fənni üzrə birinci yer qazanaraq qızıl medala layiq görülüb. BDU-nun Hüquq fakültəsində təhsil almaq istəyir: 

“Olimpiada ilə bərabər, bu il “Ən yaxşı təqdimat” müsabiqəsinə hazırlaşırdım. Bu proses mənim üçün çox əziyyətli olsa da, uğur qazanacağıma inandım. Hazırlıq zamanı həm dərsliklərdən, həm elektron resurslardan istifadə edirdim. Eyni zamanda, əlavə kitablar alırdım, yeni qaydalar öyrənirdim, ədəbiyyat oxuyurdum. Fənn müəllimim Aygün Məmmədovanın və tarix müəllimi Nizami Cəbrayılovun dəstəyi ilə bütün bildiklərimi sistemləşdirdim. Çıxışımın hazırlanması üçün hər gün bədii qiraət üzrə məşqlər edirdim. Bu müsabiqədə uğurlu çıxış edərək gümüş medala layiq görüldüm. Bundan sonrakı hədəfim RFO-da, “Ən yaxşı təqdimat” müsabiqəsində qızıl medal almaqdır”. 

8-ci sinif şagirdi Məhbubə Pirizadə RFO-da Azərbaycan dili və ədəbiyyat fənni üzrə gümüş medal alıb. Məqsədi qızıl medal üçün hazırlaşmaq, daha uğurlu nəticələr əldə etməkdir: “Hazırlıq prosesi əziyyətli və çətin olsa da, nəticəsiz qalmadı. Düzgün çalışmaqla uğura nail ola bildim. Qarşıma məqsəd qoyurdum ki, bu gün 5- 6 əsər oxuyacam, testlər işləyəcəyəm. Dərslərimə də vaxt ayırırdım. Dərs əlaçısıyam, bütün fənləri yaxşı oxuyuram. Gələcəkdə ya hüquqşünas, ya da filoloq olmaq istəyirəm”.

“Müəllimim məndə fənnə elə böyük sevgi oyatdı ki, tarix müəllimi olacağımı qərarlaşdırdım”

RFO-da tarix fənni üzrə gümüş medala layiq görülən 11-ci sinif şagirdi Nüsrət Mustafazadənin məqsədi BDU-nun “Tarix müəllimliyi” ixtisasında təhsil almaqdır: “Buraxılış imtahanında 275 bal toplamışam. Ali məktəbi bitirdikdən sonra təhsilimi magistratura səviyyəsi üzrə davam etdirib tarixçi olmaq istəyirəm. Mənə bu fənni sevdirən tarix müəllimim və məktəbimizin direktoru Valid Mustafayevdir. Əvvəllər həkim olmağı arzulayırdım. 5-ci sinifdən Valid müəllim bizə tarix fənnini keçməyə başladı və bu fənnə məndə elə böyük sevgi oyandı ki, tarix müəllimi olacağımı qərarlaşdırdım”.

8-ci sinif şagirdi Ülvi Xudaverdiyev RFO-da informatika üzrə bürünc medala layiq görülüb. Arzusu ADA Universitetində “Kompüter elmləri” ixtisası üzrə təhsil almaqdır: “Mənim iki bacım hazırda informatika üzrə Bakı Mühəndislik Universitetində təhsil alırlar. Onlar mənə bu sahədə çox kömək ediblər. İnformatika müəllimlərim Dilşad Rəhimova, ABŞ-da təhsil almış müəllimim Abuzər Xudaverdiyevin sayəsində biliklərimi genişləndirirəm və gələcəkdə məqsədim daha uğurlu nəticələr əldə etmək - qızıl medal almaqdır”.  

“Uğurları artırmağı, məktəbin nailiyyətlərini daha fərqli formaya salmağı planlaşdırıram” 

27 nömrəli tam orta məktəbin direktoru Valid Mustafayev bildirir ki, yeddinci sinfə qədər elə bu məktəbin şagirdi olub, sonradan isə təhsilini Sumqayıt şəhərindəki  “İstedad” liseyində davam etdirib. ADPU-nun Tarix müəllimliyi fakültəsini bitirərək, 2003-cü ildən 27 nömrəli tam orta məktəbdə müəllim işləməyə başlayıb. SDU-da qiyabi formada “Tarix” ixtisası üzrə magistratura təhsili alıb. 2016-cı ildə direktorların işə qəbulu müsabiqəsində iştirak edərək uğur qazanıb və 9 ildir ki, məktəb rəhbəri olaraq fəaliyyətini davam etdirir. Valid müəllimin sözlərinə görə, bu məktəb hələ onun təhsil aldığı vaxtlarda öz nizam-intizamı, savadlı müəllim heyəti, verdiyi yüksək təhsili ilə seçilib: 

“Mənə qədər olan uğurları artırmağı, doğma məktəbin nailiyyətlərini daha fərqli formaya salmağı planlaşdırıram. Yaxın zamanlarda məktəbin əsaslı təmiri, lisey, gimnaziya səviyyəsində bir məktəbə çevrilməsi nəzərdə tutulur. Sevindirici haldır ki, məktəbə böyük axın var. Təhsil ocağının uğurunu bununla da müəyyən etmək olar. Məktəbimizdə beş 11-ci sinif mövcuddur. Onların ikisi təmayül sinifdir. Bu il 11-ci siniflər üzrə buraxılış imtahanlarında orta nəticə 172 baldır, bununla belə 298 bal toplayan şagirdimiz var.  Təmayül siniflər üzrə orta göstərici 237.3 bal təşkil edir”. 

Valid müəllimin sözlərinə görə, qəbul imtahanlarında məktəbin məzunları hər il yüksək nəticə əldə edirlər: “Son 4 ildə məzunlarımızın ali məktəblərə qəbul göstəriciləri 66-70% təşkil edir. Keçən tədris ilində məzunumuz Elvin İsaqov 680 balla ADA Universitetinin Hüquq fakültəsinə qəbul olub və Prezident təqaüdünə layiq görülüb. Həmçinin məzunumuz Nihad Bayramlı 674.1 bal toplayaraq Bakı Ali Neft Məktəbinin “Neft-qaz mühəndisliyi” ixtisasina tədris ingilis dilində qəbul edilib. 20-dən çox şagirdimiz 600-dən çox bal toplayaraq tələbə adı qazanıb. Məktəb rəhbəri olaraq çalışıram ki, şagirdlərimiz tək təhsil deyil, yaradıcılıq, idman daxil olmaqla hərtərəfli uğurlara nail olsunlar. Keçən il məktəbimizin futbol komandası Sumqayıt birincisi olub, qızlardan ibarət voleybol komandamız var”. 

Məktəbə qürur gətirən məzunlar

Valid Mustafayev məktəbin xeyli sayda uğurlu məzunlarının olduğunu diqqətə çatdıraraq onların bir neçəsi haqqında “Azərbaycan müəllimi”nə məlumat verir. 

Qeyd edir ki, məzunlardan biri - Coşqun Siraczadə Almaniyanın Vürtsburq (Würzburg) Universitetində “Hesablama filologiyası” ixtisası üzrə magistr, Trier Universitetində isə “Rəqəmsal humanitar elmlər” üzrə fəlsəfə doktoru (PhD) dərəcəsi alıb. Onun tədqiqat maraqları humanitar elmlərin müxtəlif sahələrində maşın öyrənməsi metodlarının tətbiqinə yönəlib ki, bu sahəyə böyük verilənlər bazaları, mətn korpusları, informasiya portalları, süni intellekt, eləcə də müasir dərin öyrənmə alqoritmləri vasitəsilə yaradılmış iri dil modelləri və korpusları daxildir.

Digər məzun - Şərafət Səmədli qəbul imtahanında birinci ixtisas qrupu üzrə 608 bal toplayaraq ADNSU-nun tədris dili ingiliscə olan “İnformasiya texnologiyaları” ixtisasına qəbul olub. O, hazırda “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı” çərçivəsində Qlazqo Universitetində “Data elmi” ixtisası üzrə təhsil alır.

2019-cu ildə məktəbi bitirmiş Sərmayə Səmədli ADA Universitetinin “Hüquqşünaslıq” ixtisasına qəbul olub. 2023-cü ildə tələbə mübadiləsi proqramı ilə ADA Universitetinin əməkdaşlıq etdiyi Macarıstanın Eötvös Lorand Universitetinə qəbul edilib. 

Sumqayıt şəhəri 27 nömrəli tam orta məktəbin seçilən məzunları arasında tək elm sahəsində uğur qazananlar deyil, Vətən uğrunda canından keçmiş şəhidlər, beynəlxalq idman yarışlarında bayrağımızı dalğalandıran idmançılar da az deyil və onların hər biri təhsil ocağının qürur mənbəyinə çevriliblər.