Yaponiyada uşaqların təhlükəsizliyi belə təmin olunur.

Yaponiyada uşaqların təhlükəsizliyini təmin etmək və onları erkən yaşlardan etibarən müstəqil olmağa hazırlamaq məqsədilə bir sıra xüsusi tədbirlər həyata keçirilir. Bu tədbirlərdən biri də uşaqların məktəbə və ya digər yerlərə gedərkən sarı papaqlar taxmasıdır.

Bu parlaq sarı rəngli papaqlar uşaqların, xüsusilə, sürücülər və piyadalar tərəfindən asanlıqla görülməsini təmin edir. Sarı papaqlar, əsasən, birinci sinif şagirdləri üçün nəzərdə tutulur, çünki onlar gündəlik evdən məktəbə marşrutlarını ilk dəfə müstəqil şəkildə keçməyə başlayırlar. Beləliklə, cəmiyyətin dəstəyinə arxalanaraq uşaqların müstəqil özünü idarə etməsi təşviq edilir.

Uşaqlar əvvəlcə valideynlərinin müşayiəti ilə məktəbin yerləşdiyi yeri, məktəbə gediləcək vasitələri (qatar, avtobus, velosiped, piyada) öyrənir, sonra isə valideynlər arxadan izləyərək onların təkbaşına yolunu tapmasına dəstək olurlar. Bu prosesdə ətrafdakı mağaza sahibləri və qonşular da uşaqlara nəzarət edir və lazım gələrsə, onlara dəstək olurlar.

Eyni zamanda, uşaqların təkbaşına məsuliyyətli olmağı öyrənməsi Yaponiya cəmiyyətində geniş yayılmış mədəniyyət nümunəsidir. Uşaqların məktəbə tək getməsi, kiçik tapşırıqları yerinə yetirməsi, məsələn, marketə gedib alış-veriş etməsi onların özünəinamını artırır və böyüdükcə daha ciddi məsuliyyətləri idarə edə bilmək qabiliyyətini inkişaf etdirir.

Bu prosesin cəmiyyətin dəstəyi və məktəblərin təlim-tərbiyə işindəki rolu arasında korrelyasiya (əlaqə) var. Bildiyimiz kimi, cəmiyyətin aktiv iştirakı məktəbəqədər və ümumi təhsil səviyyəsində uşaqların təhlükəsizliyini təmin etmək üçün vacib faktordur. Misal üçün, Yaponiyada icma və valideyn birliklərinin rolu məktəblərin təşkil etdiyi müxtəlif tədbirlərlə, təhlükəsiz məktəbə gediş-gəliş marşrutlarının təyin edilməsi və könüllü nəzarətçilərin fəaliyyətləri ilə uşaqların təhlükəsizliyinə yönəlib.

Yaponiyada icma fəalları, valideynlər və yerli idarəetmə orqanları birlikdə uşaqların məktəbə gedib-gəlməsi zamanı təhlükəsizliyini təmin etmək üçün çalışırlar. Bu da, öz növbəsində, valideynlər və müəllimlər arasında əlaqəni gücləndirir, məktəbin təlim-tərbiyə prosesinə dəstək verir və uşaqların ictimai həyatın qaydalarına uyğunlaşmasına kömək edir.

Nəticədə, icmanın məktəblə birgə fəaliyyəti uşaqların təhlükəsizliyinin artırılmasına və onların müstəqil hərəkət edə bilmələrinə şərait yaradır. Həmçinin uşaqların sosial bacarıqlarını inkişaf etdirməyə və ictimai qaydalara uyğunlaşmağa kömək edir.

Yapon cəmiyyəti bu yanaşmanı uşaq tərbiyəsində effektiv üsul olaraq qəbul edir. Bu mədəniyyətin formalaşmasında cəmiyyətin bir-birinə olan etibarı və uşaqların özlərinə güvənərək böyüməsi üçün münbit şərait yaradır. Sarı papaqlar kimi simvollar isə bu yanaşmanın bir parçası olaraq həm təhlükəsizliyin təmin edilməsinə, həm də uşaqların real həyat yolunda müstəqil addımlar atmasına dəstək olur.